സംസ്ഥാനത്ത് സ്വർണവിലയിൽ കനത്ത ഇടിവ്; പവന് ഒറ്റയടിക്ക് 2280 രൂപ കുറഞ്ഞു

കൊച്ചി: (KasargodVartha) സംസ്ഥാനത്ത് സ്വർണവിലയിൽ ചാഞ്ചാട്ടം തുടരുകയാണ്. 2026 മാർച്ച് നാല് ബുധനാഴ്ച 22 കാരറ്റ് സ്വർണത്തിന് ഗ്രാമിന് 285 രൂപയും പവന് 2280 രൂപയുമാണ് കുറഞ്ഞത്. ഇതോടെ ഗ്രാമിന് 15080 രൂപയിലും പവന് 120640 രൂപയിലുമാണ് വിപണിയിൽ വ്യാപാരം നടക്കുന്നത്.

2026 മാർച്ച് മൂന്ന് ചൊവ്വാഴ്ച രണ്ട് തവണ സ്വർണവില കുറഞ്ഞിരുന്നു. അന്ന് ഗ്രാമിന് 265 രൂപയും പവന് 2120 രൂപയുമാണ് ആകെ കുറഞ്ഞിരുന്നത്. ചൊവ്വാഴ്ച രാവിലെ 22 കാരറ്റ് സ്വർണത്തിന് ഗ്രാമിന് 45 രൂപ കുറഞ്ഞ് 15585 രൂപയിലും പവന് 360 രൂപ കുറഞ്ഞ് 124680 രൂപയിലുമാണ് വ്യാപാരം നടന്നത്. പിന്നീട് വൈകാതെ ഗ്രാമിന് 220 രൂപ കുറഞ്ഞ് 15365 രൂപയിലും പവന് 1760 രൂപ കുറഞ്ഞ് 122920 രൂപയിലും വ്യാപാരം നടന്നു.

18 കാരറ്റ് നിരക്കുകളിലെ കുറവ്

18 കാരറ്റ് സ്വർണത്തിന്റെ നിരക്കുകളിലും ഇടിവ് രേഖപ്പെടുത്തിയിട്ടുണ്ട്. ബി ഗോവിന്ദൻ വിഭാഗത്തിന് ഗ്രാമിന് 12455 രൂപയും പവന് 99640 രൂപയുമാണ് നിരക്ക്. കെ സുരേന്ദ്രൻ വിഭാഗത്തിന് ഗ്രാമിന് 230 രൂപ കുറഞ്ഞ് 12390 രൂപയും പവന് 1840 രൂപ കുറഞ്ഞ് 99120 രൂപയിലുമാണ് കച്ചവടം നടക്കുന്നത്.

14, ഒൻപത് കാരറ്റ് വിലകളും താഴോട്ട്

കെ സുരേന്ദ്രൻ വിഭാഗത്തിൽ 14 കാരറ്റ് സ്വർണത്തിന് ഗ്രാമിന് 185 രൂപ കുറഞ്ഞ് 9645 രൂപയും പവന് 1480 രൂപ കുറഞ്ഞ് 77160 രൂപയുമാണ് പുതിയ നിരക്ക്. ഒൻപത് കാരറ്റിന് ഗ്രാമിന് 115 രൂപ കുറഞ്ഞ് 6220 രൂപയും പവന് 920 രൂപ കുറഞ്ഞ് 49760 രൂപയുമായി വില നിലകൊള്ളുന്നു.

വെള്ളി നിരക്കുകളിലും ഇടിവ്

സംസ്ഥാനത്ത് വെള്ളി നിരക്കുകളിലും കുറവ് രേഖപ്പെടുത്തിയിട്ടുണ്ട്. ബി ഗോവിന്ദൻ വിഭാഗത്തിന് വെള്ളിക്ക് 10 രൂപ കുറഞ്ഞ് 285 രൂപയാണ് നിരക്ക്. കെ സുരേന്ദ്രൻ വിഭാഗത്തിനും ഗ്രാമിന് 10 രൂപ കുറഞ്ഞ് 285 രൂപയാണ് നിരക്ക്. 10 ഗ്രാം സാധാരണ വെള്ളിക്ക് 100 രൂപ കുറഞ്ഞ് 2850 രൂപയുമാണ് നിലവിലെ പുതിയ വില.

വിലയിടിവിന് പിന്നിലെ കാരണങ്ങൾ

ബുധനാഴ്ച കേരളത്തിൽ കനത്ത ഇടിവാണ് സ്വർണവില നേരിട്ടത്. രാജ്യാന്തര വിപണിയിലെ ട്രെൻഡാണ് വില കുറയാൻ പ്രധാനമായും വഴിയൊരുക്കിയത്. ഇറാനും യുഎസ്-ഇസ്റാഈൽ സഖ്യവും തമ്മിലുള്ള യുദ്ധത്തെ തുടർന്ന് ഏതാനും ദിവസം മുൻപ് 5400 ഡോളറിന് മുകളിലേക്ക് കുതിച്ചുകയറിയ രാജ്യാന്തരവില ഇപ്പോൾ 5160 ഡോളറിലേക്ക് ഇടിഞ്ഞ പശ്ചാത്തലത്തിലാണ് കേരളത്തിലും വില കുറഞ്ഞത്. യുദ്ധം പോലുള്ള സാഹചര്യങ്ങളിൽ സുരക്ഷിത നിക്ഷേപം അഥവാ സേഫ് ഹാവൻ അസറ്റ് എന്ന പെരുമയുമായി സ്വർണവില കുതിച്ചുകയറാറുണ്ട്. ഇതാണ് കഴിഞ്ഞ വാരം വരെ സംഭവിച്ചതെങ്കിലും പിന്നീട് വിപണിയിലെ ട്രെൻഡ് മാറുകയായിരുന്നു.

ഇറാൻ ഹോർമുസ് കടലിടുക്ക് അടച്ചതും ഗൾഫ് രാഷ്ട്രങ്ങൾക്കുമേലുള്ള ആക്രമണവും ക്രൂഡ് ഓയിൽ വില കുതിച്ചുകയറാൻ ഇടവരുത്തിയിട്ടുണ്ട്. എണ്ണവില കൂടിയതോടെ അമേരിക്കയിലടക്കം അവശ്യവസ്തുക്കളുടെ വിലയും ഇനി കൂടുമെന്നാണ് കരുതുന്നത്. പണപ്പെരുപ്പം വർധിക്കുന്നത് പലിശഭാരവും ഉയർന്ന തലത്തിൽ തുടരാൻ ഇടയാക്കും. ഈ വിലയിരുത്തലിനെ തുടർന്ന് യുഎസ് ഡോളറും ട്രഷറി യീൽഡും കുതിച്ചുമുന്നേറിയത് സ്വർണത്തിന് വലിയ തിരിച്ചടിയായി. രാജ്യാന്തര സ്വർണ വ്യാപാരം ഡോളറിലാണ് നടക്കുന്നത് എന്നതിനാൽ ഡോളർ ശക്തമായത് സ്വർണത്തിന്റെ ഡിമാൻഡിനെ ബാധിച്ചു. കഴിഞ്ഞ ദിവസങ്ങളിലെ വിലക്കയറ്റം മുതലെടുത്ത് സ്വർണത്തിൽ ലാഭമെടുപ്പ് കനത്തതും വില ഇടിയാൻ ഒരു കാരണമായിട്ടുണ്ട്.

തുടർന്നുള്ള വിപണി സാധ്യതകൾ

ഇതേ ട്രെൻഡ് തുടരുകയാണെങ്കിൽ സ്വർണവില 5000 ഡോളറിന് താഴേക്ക് നീങ്ങുമെന്നാണ് വിദഗ്ധരുടെ വിലയിരുത്തൽ. ഇത് കേരളത്തിൽ പവൻ വിലയെ 1.15 ലക്ഷം രൂപയ്ക്കടുത്തേക്ക് വീഴ്ത്തിയേക്കാം. അതേസമയം യുദ്ധം നീളുന്നത് സ്വർണവില ഇടിവിന്റെ ആക്കം കുറയ്ക്കുകയും ചെയ്യും. അതായത് വലിയ ഇടിവിന് സാധ്യതയുണ്ടെങ്കിൽ പോലും അതിന് യുദ്ധം തടയിടും. വില വലിയതോതിൽ കുറയുമ്പോൾ ഉണ്ടാകാവുന്ന ഡിപ് ബയിങ് താത്പര്യം വില തിരിച്ചു കയറാനും ഇടവരുത്തിയേക്കാം.

സ്വർണവിലയിലെമാറ്റങ്ങളും വിപണിയിലെ കൃത്യമായ വിവരങ്ങളും സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. സാമ്പത്തിക വാർത്തകളും അപ്‌ഡേറ്റുകളും ഉടൻ ലഭിക്കാൻ ഞങ്ങളുടെ ഫേസ്ബുക്ക് പേജ് ഫോളോ ചെയ്യാവുന്നതാണ്. വാര്‍ത്ത സുഹൃത്തുക്കൾക്കും കുടുംബാംഗങ്ങൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. വിലക്കുറവിനെക്കുറിച്ചുള്ള നിങ്ങളുടെ അഭിപ്രായം ഫേസ്ബുക്ക് പോസ്റ്റിൽ കമന്റായി രേഖപ്പെടുത്താനും മറക്കരുത്.

Article Summary: Gold prices in Kerala saw a significant drop of ₹2,280 per sovereign due to international market trends influenced by the US-Israel-Iran conflict and a stronger dollar.

#GoldPriceKerala #GoldRateDrop #KeralaNews #BusinessNews #GoldMarketUpdate #Kochi