കാസർകോട്ടെ രണ്ടാമത്തെ കഫെ കുടുംബശ്രീ പ്രീമിയം റസ്റ്റോറന്റ് കല്ലട്ര മാഹിൻ എംഎൽഎ ഉദ്ഘാടനം ചെയ്തു

കാസർകോട്: (KasargodVartha) കാസർകോടിന് ശുചിത്വമുള്ള ഭക്ഷണം വിളമ്പാൻ കഫെ കുടുംബശ്രീയ്ക്കാകട്ടെയെന്ന് കല്ലട്ര മാഹിൻ എംഎൽഎ പറഞ്ഞു. കുടുംബശ്രീ ജില്ലാ മിഷന്റെ നേതൃത്വത്തിൽ കാസർകോട് കെഎസ്ആർടിസി ബസ് സ്റ്റാൻഡിൽ തുളുനാട് ഷോപ്പിങ് കോംപ്ലക്‌സിൽ കുടുംബശ്രീയുടെ പ്രീമിയം റസ്റ്റോറന്റ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. 

ഹോട്ടൽ ബിസിനസ്സിൽ ശുചിത്വമുള്ള ഭക്ഷണം വളരെ പ്രധാനമാണെന്നും പൊതുവേ സ്ത്രീകൾ നടത്തുന്ന കുടുംബശ്രീ ഹോട്ടലുകളിൽ ഇത് കൃത്യമായി പാലിക്കപ്പെടുന്നുണ്ടെന്നും എംഎൽഎ ചൂണ്ടിക്കാട്ടി. ഈ പ്രതിബദ്ധത കുടുംബശ്രീ ഹോട്ടലുകളുടെ വിശ്വാസ്യത വർധിപ്പിക്കുന്നുവെന്നും അദ്ദേഹം കൂട്ടിച്ചേർത്തു.

ചടങ്ങിലെ പ്രമുഖർ

കാസർകോട് നഗരസഭാ വൈസ് ചെയർപേഴ്സൺ കെ എം ഹനീഫ് ചടങ്ങിൽ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്റ് സാബു എബ്രഹാം മുഖ്യാതിഥിയായി പങ്കെടുത്തു. നഗരസഭ ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ഹമീദ് ബെദര, നഗരസഭ വാർഡ് കൗൺസിലർമാരായ രാമകൃഷ്ണ ഹോള്ള, ഉമേഷ്, ബദിയടുക്ക ഗ്രാമ പഞ്ചായത്ത് മെമ്പർ മാഹിൻ കേളോട്ട്, കെഎസ്ആർടിസി എടിഒ കെ പ്രിയേഷ് കുമാർ, നഗരസഭ സിഡിഎസ് ചെയർപേഴ്സൺ ആയിഷത്ത് കുബ്ര, ചെങ്കള സിഡിഎസ് ചെയർപേഴ്സൺ സി എ സക്കീന എന്നിവർ സംസാരിച്ചു.

എഡിഎംസിമാരായ ഡി ഹരിദാസ്, കെ എം കിഷോർ കുമാർ, ഐഫ്രം ഡയറക്ടർ വി സജിത്ത്, കുടുംബശ്രീ ജില്ലാ പ്രോഗ്രാം മാനേജർ കെ ടി ജിതിൻ, കുടുംബശ്രീ ബ്ലോക്ക് കോർഡിനേറ്റർ സജിനി, വിവിധ രാഷ്ട്രീയപ്പാർട്ടി പ്രതിനിധികളായ ടി എം എ കരീം, അഡ്വ. സാജിദ് കമ്മാടം, കെ എം ബഷീർ, കെഎസ്ആർടിസി സർവീസ് സംഘടന നേതാക്കളായ സി ബാലകൃഷ്ണൻ, ജലീൽ മല്ലം തുടങ്ങിയവരും ചടങ്ങിൽ ആശംസകൾ അർപ്പിച്ചു. കുടുംബശ്രീ ഡിഎംസി എം വി ജയൻ സ്വാഗതം ആശംസിച്ച ചടങ്ങിൽ പ്രീമിയം കഫെ സെക്രട്ടറി സുലോചന ഏവർക്കും നന്ദി രേഖപ്പെടുത്തി.

മാതൃകാപരമായ ഇടപെടൽ

കാസർകോട്ടെ രണ്ടാമത്തെ കഫെ കുടുംബശ്രീ പ്രീമിയം റസ്റ്റോറന്റാണ് കെഎസ്ആർടിസി ബസ്റ്റാൻഡിൽ ഉദ്ഘാടനം ചെയ്തത്. സൂക്ഷ്മ സംരംഭമേഖലയിലെ കുടുംബശ്രീയുടെ ശ്രദ്ധേയമായ ഇടപെടലായാണ് കഫെ കുടുംബശ്രീ യൂണിറ്റുകളെ വിലയിരുത്തുന്നത്. വൈവിധ്യമാർന്ന ഭക്ഷ്യവിഭവങ്ങൾ സ്വാദിഷ്ടമായും മായം ചേർക്കാതെയും വനിതകളാൽ തയാറാക്കപ്പെടുന്നു എന്നതാണ് ഇതിന്റെ ഏറ്റവും വലിയ പ്രത്യേകത.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകൾക്കായി ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമന്റായി രേഖപ്പെടുത്താം.

Article Summary: MLA Kallatra Mahin inaugurated the second Cafe Kudumbashree Premium Restaurant in Kasaragod district, located at the Thulunadu Shopping Complex near the KSRTC Bus Stand. Emphasizing the importance of hygiene in the restaurant business, the MLA praised the reliability of Kudumbashree hotels run by women.

#KasaragodNews #Kudumbashree #CafeKudumbashree #WomenEmpowerment #KeralaDevelopment #LocalNews #AparnaNews