മത്സ്യ ലഭ്യത കുറഞ്ഞു, വിപണിയിൽ വീണ്ടും പഴകിയ മീനുകൾ; വില വർധിച്ചതോടെ കോഴിക്കും മുട്ടയ്ക്കും ഡിമാൻഡ്

കാസർകോട്: (KasargodVartha) ഫ്രഷ് മത്സ്യങ്ങൾ വീണ്ടും കിട്ടാക്കനിയായി മാറി. മത്സ്യ ലഭ്യത വൻതോതിൽ കുറഞ്ഞതോടെ വിപണിയിൽ വീണ്ടും പഴക്കം ചെന്ന മത്സ്യങ്ങളുടെ വരവറിയിച്ചു. ഇതിനൊപ്പം സാധാരണക്കാർക്ക് ബുദ്ധിമുട്ടുണ്ടാക്കുന്ന രീതിയിലുള്ള വില വർധനയും പ്രകടമാണ്. ചെറുകിട മത്സ്യബന്ധന തൊഴിലാളികൾക്ക് നിലവിൽ ലഭിക്കുന്നത് അയല മാത്രം. ഇതിൻ്റെ വിലയാകട്ടെ കിലോയ്ക്ക് 280 മുതൽ 300 രൂപ വരെയായി ഉയർന്നു.

ആഴക്കടൽ മത്സ്യബന്ധനത്തിൽ മത്സ്യ ലഭ്യതയുടെ കുറവാണ് മത്സ്യ വിൽപ്പന കേന്ദ്രങ്ങളിൽ മത്സ്യത്തിൻ്റെ വരവ് കാര്യമായി കുറച്ചത്. അന്യസംസ്ഥാനത്തെ വൻകിട ബോട്ടുകൾ ആഴക്കടലിൽ വ്യാപകമായി മത്സ്യബന്ധനത്തിൽ ഏർപ്പെടുന്നതാണ് മീൻ ലഭ്യത കുറഞ്ഞതിന് പ്രധാന കാരണമെന്ന് പ്രാദേശിക മത്സ്യത്തൊഴിലാളികൾ പറയുന്നു. ഇത്തരത്തിൽ നിയമം ലംഘിച്ച് മത്സ്യബന്ധനത്തിൽ ഏർപ്പെട്ട ചില ബോട്ടുകളെ പിടികൂടി അധികൃതർ പിഴ ചുമത്തിയിട്ടുമുണ്ട്. ഫ്രഷ് മത്സ്യങ്ങളുടെ ലഭ്യത കുറഞ്ഞതോടെ ഐസ് ചേർത്ത പഴക്കമുള്ള മത്സ്യങ്ങളാണ് ഇപ്പോൾ മത്സ്യ മാർക്കറ്റുകളിൽ കൂടുതലായും ലഭ്യമായിട്ടുള്ളത്. മറ്റ് മത്സ്യങ്ങൾക്ക് വലിയ വിലയും ഇപ്പോൾ പ്രകടമാണ്.

അയക്കൂറയ്ക്കും അവോലിക്കും ഉയർന്ന വില

വിപണിയിൽ അയക്കൂറ അഥവാ നെയ്മീൻ ചെറിയ ഇനത്തിന് 500 രൂപ മുതൽ 800 രൂപ വരെ ഈടാക്കുന്നുണ്ട്. അതേസമയം ഏകദേശം നാല് മുതൽ അഞ്ച് വരെ കിലോ വലിപ്പമുള്ളവയ്ക്ക് ആയിരം രൂപ മുതൽ 1400 രൂപ വരെയാണ് നിലവിലെ വില. അവോലി അഥവാ മാഞ്ചി കറുപ്പിനാണെങ്കിൽ 650 രൂപ മുതൽ 800 രൂപ വരെയും, വെളുത്തതാണെങ്കിൽ 1200 രൂപ മുതൽ 1400 രൂപ വരെയുമാണ് വില ഈടാക്കുന്നത്.

മാർക്കറ്റുകളിൽ വലിയ മത്തി അഥവാ ചാള പൂർണമായും അപ്രത്യക്ഷമായിട്ടുണ്ട്. പകരം 200 രൂപയ്ക്ക് ഫ്രഷ് മത്തിക്കുഞ്ഞുങ്ങളാണ് ഇപ്പോൾ ലഭിക്കുന്നത്. ചെറിയ മീൻ പിടിക്കുന്നത് ഫിഷറീസ് വകുപ്പ് കർശനമായി വിലക്കിയിട്ടുണ്ടെങ്കിലും ചെറിയ മത്തിക്കുഞ്ഞുങ്ങളുടെ വരവ് ഇതുവരെ നിലച്ചിട്ടില്ല. വിപണിയിൽ ഇതിന് ആവശ്യക്കാരും ഏറെയുണ്ട്.

അപ്രത്യക്ഷമായി പ്രിയപ്പെട്ട മീനുകൾ

കരിമീൻ, ചൂര, നത്തോലി അഥവാ കൊഴുവ, കിളിമീൻ എന്നിവ മാർക്കറ്റുകളിൽ എത്താതെ മാസങ്ങളോളമായി. എന്നിരുന്നാലും വൻകിട മീൻ വിൽപ്പന ശാലകളിൽ ഇവ വല്ലപ്പോഴും ലഭിക്കുമെങ്കിലും സാധാരണക്കാരന് താങ്ങാനാവാത്ത ഉയർന്ന വിലയാണ് ഈടാക്കുന്നത്. കൂന്തൽ ചെറുകിട മത്സ്യബന്ധന തൊഴിലാളികൾക്ക് നിലവിൽ ലഭിക്കുന്നുണ്ട്. 400 രൂപ മുതൽ 500 രൂപ വരെയാണ് ഇതിൻ്റെ വില. വറ്റ, വരാൽ, മുള്ളൻ, കാരി തുടങ്ങിയ മത്സ്യങ്ങളൊക്കെ മത്സ്യമാർക്കറ്റുകളിൽ നിന്ന് അപ്രത്യക്ഷമായിട്ട് മാസങ്ങളോളമായി.

മീൻ കിട്ടാതായതോടെ കോഴിക്കും ഡിമാൻഡ്

വിപണിയിലെ മത്സ്യ ലഭ്യതയുടെ കുറവുമൂലം കോഴി വില കുത്തനെ ഉയരുന്നുണ്ട്. 170 രൂപയാണ് ചൊവ്വാഴ്ച കോഴിയുടെ വില. മുട്ട വിലയിലും വലിയ വർധനയുണ്ട്. ഒരെണ്ണത്തിന് ചൊവ്വാഴ്ചത്തെ വില 6.50 രൂപയാണ്.

വിപണിയിലെ ഈ വിലവിവരങ്ങളെക്കുറിച്ചുള്ള വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും പങ്കുവെക്കുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Fish shortage in Kasaragod causes price hikes for fish, chicken, and eggs.

#KasargodVartha #KasaragodNews #FishMarket #KeralaMarket #PriceHike #ChickenPrice #MalayalamNews #AparnaNews