കാസർകോടിന്റെ വികസനക്കുതിപ്പിന് ജനകീയ ബജറ്റ്; രോഗികൾക്ക് പ്രഭാതഭക്ഷണം നൽകാൻ പ്രത്യേക പദ്ധതി

കാസർകോട്: (KasargodVartha) ജില്ലയിലെ സമഗ്രമായ വളർച്ചയും ജനക്ഷേമവും ലക്ഷ്യമിട്ട് കാസർകോട് ജില്ലാ പഞ്ചായത്തിന്റെ 2026–27 സാമ്പത്തിക വർഷത്തെ ബജറ്റ് വൈസ് പ്രസിഡന്റ് സോയ കെ.കെ അവതരിപ്പിച്ചു. കൃഷി, പാർപ്പിടം, വിദ്യാഭ്യാസം, ആരോഗ്യം തുടങ്ങി എല്ലാ മേഖലകൾക്കും സമഗ്ര പരിഗണന നൽകുന്ന ജനകീയ ബജറ്റാണിതെന്ന് വൈസ് പ്രസിഡന്റ് വ്യക്തമാക്കി.

2026-നെ വനിതാ കർഷക വർഷമായി പ്രഖ്യാപിച്ചതിന്റെ ഭാഗമായി കാർഷിക രംഗത്ത് വലിയ ഉണർവാണ് ലക്ഷ്യമിടുന്നത്. നെൽകൃഷി വികസനം, ജലസേചനം, മണ്ണ്-ജല സംരക്ഷണം എന്നിവയ്ക്കായി 3.88 കോടിയിലധികം രൂപ നീക്കിവെച്ചു.

 കാസർകോട് സീഡ് ഫാമിൽ 50 ലക്ഷം രൂപ ചെലവിൽ അഗ്രികോംപ്ലക്സ് സ്ഥാപിക്കാനും പുല്ലൂർ സീഡ് ഫാമിലെ അടിസ്ഥാന സൗകര്യ വികസനത്തിന് 60 ലക്ഷം രൂപ അനുവദിക്കാനും തീരുമാനിച്ചു. പാർപ്പിട മേഖലയിൽ ‘ലൈഫ് മിഷൻ’ പദ്ധതിയുടെ വിജയകരമായ പൂർത്തീകരണത്തിനായി 6.84 കോടിയിലേറെ രൂപ വകയിരുത്തി.

ആരോഗ്യ രംഗത്ത് ജില്ലാ ആശുപത്രിയുടെ വികസനത്തിന് മാസ്റ്റർ പ്ലാൻ തയ്യാറാക്കും. അലോപ്പതി മേഖലയിൽ 6.26 കോടി രൂപയുടെ പദ്ധതികളാണ് ഉൾപ്പെടുത്തിയിരിക്കുന്നത്. സംസ്ഥാനത്ത് ആദ്യമായി ജില്ലാ ആശുപത്രിയിൽ എത്തുന്ന രോഗികൾക്ക് സൗജന്യ പ്രഭാതഭക്ഷണം നൽകാൻ 10 ലക്ഷം രൂപ വകയിരുത്തിയതും ബജറ്റിലെ ശ്രദ്ധേയ പ്രഖ്യാപനമാണ്. ആയുർവേദ ആശുപത്രികളുടെ മരുന്ന് ലഭ്യതയും കിടത്തി ചികിത്സാ സൗകര്യവും മെച്ചപ്പെടുത്താൻ ഒരു കോടി രൂപയും ഹോമിയോ ആശുപത്രികളുടെ നവീകരണത്തിന് 50 ലക്ഷം രൂപയും മാറ്റിവെച്ചു.

വിദ്യാഭ്യാസ രംഗത്ത് ഐ.എ.എസ് ഡെവലപ്‌മെന്റ് ആൻഡ് എംപവർമെന്റ് അക്കാദമി (IDEA) ഉൾപ്പെടെ വിവിധ പദ്ധതികൾക്കായി 10.03 കോടി രൂപയുടെ ബൃഹത്തായ പദ്ധതി വിഭാവനം ചെയ്തിട്ടുണ്ട്. ജില്ലയിലെ 128 അങ്കണവാടികൾക്ക് സ്വന്തം കെട്ടിടം നിർമ്മിക്കാൻ 82 ലക്ഷം രൂപയും സ്കൂളുകളിൽ ചിൽഡ്രൻസ് പാർക്കുകൾ സ്ഥാപിക്കാനും ബജറ്റിൽ പ്രഖ്യാപിച്ചു.

സ്ത്രീ ശാക്തീകരണത്തിനായി കുടുംബശ്രീ സംരംഭങ്ങൾക്ക് 3.29 കോടിയിലേറെ രൂപ വകയിരുത്തി. വനിതാ ഹോസ്റ്റൽ, തൊഴിൽ പരിശീലന പദ്ധതികൾക്ക് മുൻഗണന നൽകും. പട്ടികജാതി-പട്ടികവർഗ വിഭാഗങ്ങളുടെ ക്ഷേമത്തിനായി 9.19 കോടിയിലേറെ രൂപയും ഭിന്നശേഷിക്കാർക്കും എൻഡോസൾഫാൻ ദുരിതബാധിതർക്കുമായി 1.05 കോടി രൂപയും വകയിരുത്തി. പശ്ചാത്തല സൗകര്യ വികസനത്തിന് 23 കോടി രൂപ നീക്കിവെച്ചതോടെ റോഡുകളുടെയും കെട്ടിടങ്ങളുടെയും നവീകരണം വേഗത്തിലാക്കും.

മാലിന്യ നിർമ്മാർജ്ജനത്തിന് 2.72 കോടി രൂപയും ടൂറിസം വികസനത്തിന് 90 ലക്ഷം രൂപയും അനുവദിച്ചു. യുവജനങ്ങളുടെ ആരോഗ്യത്തിനായി മൾട്ടിപർപ്പസ് ഗ്രൗണ്ട്, ഓപ്പൺ ജിം, ഷി ജിം എന്നിവയ്ക്കായി രണ്ട് കോടി രൂപയും വിജ്ഞാന കേരളം പദ്ധതിക്കായി ഒരു കോടി രൂപയും വകയിരുത്തി. 

വ്യവസായ മേഖലയിൽ 65 ലക്ഷം രൂപയും പ്രവാസി സംരംഭകരുടെ ഡാറ്റ ശേഖരണത്തിന് രണ്ട് ലക്ഷം രൂപയും മാറ്റിവെച്ചു. ജൈവവൈവിധ്യ സംരക്ഷണ പ്രവർത്തനങ്ങൾക്ക് 10 ലക്ഷം രൂപയും വയോജന ക്ഷേമത്തിനായി 72 ലക്ഷം രൂപയും അനുവദിച്ചു.

മൃഗസംരക്ഷണ മേഖലയിലെ എബിസി പദ്ധതിക്ക് 30 ലക്ഷം രൂപയും ക്ഷീര സംഘങ്ങൾക്ക് റിവോൾവിങ് ഫണ്ട്, പാലിന് സബ്സിഡി എന്നിവയ്ക്കായി 1.40 കോടി രൂപയും വകയിരുത്തി. ബേഡകം തെങ്ങിൻ തൈ ഉൽപാദനത്തിനും വിതരണത്തിനും അഞ്ച് ലക്ഷം രൂപയും വിത്ത് ഉൽപാദനത്തിനായി 28 ലക്ഷം രൂപയും അനുവദിച്ചു. 

ആശാവർക്കർമാർക്ക് മെഡിക്കൽ കിറ്റ് വിതരണം ചെയ്യാൻ 20 ലക്ഷം രൂപയും സ്കൂളുകളിലെ പാചക തൊഴിലാളികൾക്ക് യൂണിഫോം, സുരക്ഷാ ഉപകരണങ്ങൾക്കായി അഞ്ച് ലക്ഷം രൂപയും അനുവദിച്ചു. കാസർകോട് തനത് കലാരൂപങ്ങൾ പ്രോത്സാഹിപ്പിക്കാനും എള്ളുള്ളേരി സാംസ്കാരിക സംഗമത്തിനായി 15 ലക്ഷം രൂപയും മാറ്റിവെച്ചു.

ഡ്രോപ്പ് ഔട്ട് മുക്ത ജില്ല ലക്ഷ്യമിട്ട് ‘വിദ്യാഭദ്രം’ പദ്ധതിക്കായി 30 ലക്ഷം രൂപയും വിഷൻ 2031 – പതിനഞ്ചാം പഞ്ചവത്സര പദ്ധതി തയ്യാറാക്കുന്നതിനായി അഞ്ച് ലക്ഷം രൂപയും വകയിരുത്തി. മിതവ്യയവും ദീർഘവീക്ഷണവും കൈകോർക്കുന്ന ഈ ബജറ്റ് കാസർകോടിന്റെ ഭാവി വികസനത്തിന് ശക്തമായ അടിത്തറ പാകുമെന്ന് വൈസ് പ്രസിഡന്റ് വ്യക്തമാക്കി. പ്രസിഡന്റ് സാബു അബ്രഹാം അധ്യക്ഷത വഹിച്ചു.

കാസർകോടിന്റെ വികസന ചരിത്രത്തിൽ നാഴികക്കല്ലാകുന്ന ഈ ജനകീയ ബജറ്റിനെക്കുറിച്ചും തുടർപ്രവർത്തനങ്ങൾ ഉൾപ്പെടെ നാട്ടിലെ കൂടുതൽ വിവരങ്ങൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ജില്ലയുടെ വളർച്ചയ്ക്കായുള്ള ഈ പദ്ധതികൾ സുഹൃത്തുക്കൾക്കും കുടുംബാംഗങ്ങൾക്കും വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമന്റായി രേഖപ്പെടുത്താൻ മറക്കരുത്.

Article Summary: Kasaragod District Panchayat presented a people-friendly budget for 2026-27 with a focus on health, agriculture, and education.

#KasaragodNews #DistrictPanchayatBudget #KeralaDevelopment #HealthCare #EducationSector #WomenEmpowerment #LocalGovernance #KasaragodDistrict