കാസർകോട്ടെ റെയിൽവേ വരുമാനം കുതിച്ചുയർന്നു; ചെറുവത്തൂരിന് വമ്പൻ മുന്നേറ്റം

ചെറുവത്തൂർ: (KasargodVartha) കാസർകോട് ജില്ലയിലെ വിവിധ റെയിൽവേ സ്റ്റേഷനുകളിൽ നിന്നുള്ള വരുമാനം ഗണ്യമായി വർധിച്ചു. കഴിഞ്ഞ സാമ്പത്തിക വർഷമായ 2024–25ലെ കണക്കുകൾ പ്രകാരം കാസർകോട്, കാഞ്ഞങ്ങാട്, നീലേശ്വരം, ചെറുവത്തൂർ തുടങ്ങി നിരവധി സ്റ്റേഷനുകൾ മികച്ച വരുമാന പട്ടികയിൽ ഇടംനേടി. കാസർകോട് സ്റ്റേഷനിൽ മാത്രം കഴിഞ്ഞ സാമ്പത്തിക വർഷം 43.54 കോടി രൂപയുടെ വരുമാനമാണ് രേഖപ്പെടുത്തിയത്. കാഞ്ഞങ്ങാട്ട് 19.12 കോടി രൂപയും നീലേശ്വരത്ത് 7.87 കോടി രൂപയും വരുമാനം ലഭിച്ചു. ഒരു കോടി രൂപയ്ക്ക് മുകളിലുള്ള വരുമാനത്തോടെ മഞ്ചേശ്വരവും ഈ പട്ടികയിൽ ഇടം നേടി (1.36 കോടി രൂപ).

ചെറുവത്തൂർ സ്റ്റേഷൻ 4.73 കോടി രൂപ വരുമാനം നേടി വൻ കുതിപ്പിലെത്തി. യാത്രക്കാരുടെ എണ്ണത്തിലും വരുമാനത്തിലും മികച്ച മുന്നേറ്റമാണ് ചെറുവത്തൂർ റെയിൽവേ സ്റ്റേഷനിൽ രേഖപ്പെടുത്തിയത്. കഴിഞ്ഞ സാമ്പത്തിക വർഷം 4,73,37,028 രൂപയാണ് സ്റ്റേഷനിലെ മൊത്തം വരുമാനം. ഇതിൽ 2.20 കോടി രൂപ റിസർവേഷനിലൂടെയും ബാക്കി സാധാരണ ടിക്കറ്റുകളിലൂടെയുമാണ് ലഭിച്ചത്. പരശുറാം, മാവേലി, മലബാർ, നേത്രാവതി, എഗ്മോർ, എറണാട്, കോയമ്പത്തൂർ ഫാസ്റ്റ് പാസഞ്ചർ, ചെന്നൈ മെയിൽ, തിരുവനന്തപുരം എക്സ്പ്രസ് തുടങ്ങി നിരവധി ദീർഘദൂര ട്രെയിനുകളും രണ്ട് പാസഞ്ചർ ട്രെയിനുകളും ചെറുവത്തൂരിൽ ഒരു മിനിറ്റിനോളം നിർത്തിയിട്ട് മാത്രമാണ് നാലര കോടിയിലധികം വരുമാനം ഉണ്ടായത്.

അതേസമയം, സ്റ്റേഷനിൽ അടിസ്ഥാന സൗകര്യ വികസനത്തിലും പുതിയ വണ്ടികൾക്ക് സ്റ്റോപ്പേജ് അനുവദിക്കുന്നതിലും റെയിൽവേയുടെ ഭാഗത്തുനിന്ന് അനുകൂല സമീപനം ഉണ്ടാകുന്നില്ലെന്ന് യാത്രക്കാർ ആരോപിക്കുന്നു. കോവിഡ് കാലത്ത് നിർത്തിയ വെസ്റ്റ്കോസ്റ്റ് എക്സ്പ്രസിന്റെ സ്റ്റോപ്പേജ് പുനഃസ്ഥാപിക്കണമെന്ന ആവശ്യം ശക്തമാണ്. ചികിത്സയ്ക്കും വ്യാപാരത്തിനുമായി മംഗളൂരുവിലേക്ക് പോകുന്നവർക്ക് തിരിച്ചുവരാൻ ഇത് കാരണം ഏറെ ബുദ്ധിമുട്ട് നേരിടുന്നു. രാവിലെ 10.10-ന് ചെന്നൈ മെയിൽ വടക്കോട്ട് കടന്നുപോയാൽ, അടുത്തുള്ള വടക്കോട്ടുള്ള ട്രെയിൻ 3.05-ന് വരുന്ന എറണാട് എക്‌സ്‌പ്രസ് മാത്രമാണ്. തെക്കോട്ട് പോകാൻ 10.40-ന് കോയമ്പത്തൂർ ഫാസ്റ്റ് പാസഞ്ചർ കഴിഞ്ഞാൽ, പിന്നീട് 3.10-ന് ചെന്നൈ മെയിൽ വരെയാണ് യാത്രക്കാർ കാത്തിരിക്കേണ്ടി വരുന്നത്.

സ്റ്റോപ്പേജ് ആവശ്യം ശക്തം

യാത്രക്കാരുടെ പ്രധാന ആവശ്യങ്ങൾ താഴെ പറയുന്നവയാണ്:

• വെസ്റ്റ്കോസ്റ്റ് എക്സ്പ്രസിന്റെ സ്റ്റോപ്പ് പുനഃസ്ഥാപിക്കുക.

• കണ്ണൂർ–ബെംഗളൂരു യശ്വന്ത്പുര എക്‌സ്‌പ്രസിന് സ്റ്റോപ്പ് അനുവദിക്കുക.

• കണ്ണൂരിൽ നിർത്തുന്ന ചില രാത്രി ട്രെയിനുകൾ കാസർകോടുവരെയാക്കി ചെറുവത്തൂരിൽ സ്റ്റോപ്പ് അനുവദിക്കുക.

യാത്രക്കാരുടെ ആവശ്യം കണക്കിലെടുത്ത് കുറച്ച് ട്രെയിനുകൾക്ക് കൂടി സ്റ്റോപ്പേജ് നൽകി മാത്രമേ യാത്രാസൗകര്യം മെച്ചപ്പെടുത്താനും വരുമാനം വർധിപ്പിക്കാനും സാധിക്കൂമെന്ന് യാത്രക്കാർ പറയുന്നു.

പരശുറാം എക്‌സ്‌പ്രസ് വരുമാനം കൂട്ടി

ചെറുവത്തൂർ റെയിൽവേ സ്റ്റേഷനിൽ പരശുറാം എക്‌സ്‌പ്രസ് ട്രെയിൻ സ്റ്റോപ്പേജ് അനുവദിച്ചതോടെ യാത്രക്കാരുടെ എണ്ണവും വരുമാനവും ഗണ്യമായി വർധിച്ചു. മാസംതോറും ഏകദേശം 5100 യാത്രക്കാർ അധികമായി ഈ സൗകര്യം ഉപയോഗിക്കുന്നു. ഇതിലൂടെ സ്റ്റേഷനിൽ പ്രതിമാസം 4.2 ലക്ഷം രൂപയുടെ അധിക വരുമാനമാണ് ലഭിക്കുന്നത്. ഓൺലൈൻ ടിക്കറ്റുകൾ കൂടാതെയാണിത്. ശരാശരി ഒരു ദിവസം 170 പേർ യാത്ര ചെയ്യുന്നതോടൊപ്പം, 14,000 രൂപ വരുമാനം കൂടി രേഖപ്പെടുത്തപ്പെടുന്നു. ഓരോ യാത്രക്കാരനിൽ നിന്നും ശരാശരി 80–85 രൂപ വരുമാനമാണ് ലഭിക്കുന്നത്. പുതുതായി അനുവദിച്ച ഈ സ്റ്റോപ്പേജ് യാത്രക്കാരുടെ സൗകര്യവും സ്റ്റേഷന്റെ വികസനവും കൂട്ടുന്നതായി റെയിൽവേ അധികൃതർ അറിയിച്ചു. യാത്രക്കാരുടെ ചിരകാല അഭിലാഷമായ ഈ ട്രെയിനിൻ്റെ സ്റ്റോപ്പ് അനുവദിച്ചിട്ട് രണ്ട് വർഷം പൂർത്തിയാകുന്നു.
 

വരുമാനം വർധിച്ചിട്ടും ചെറുവത്തൂർ റെയിൽവേ സ്റ്റേഷനിൽ സൗകര്യങ്ങൾ വർധിപ്പിക്കാത്തതിനെക്കുറിച്ച് നിങ്ങളുടെ അഭിപ്രായം എന്താണ്?

Article Summary: Kasaragod district railway revenue increases significantly; Cheruvathur station sees a boom due to Parashuram Express stop.

#Kasaragod #Cheruvathur #RailwayRevenue #IndianRailways #KeralaNews #TrainTravel