കുമ്പള വഴി ട്രെയിൻ പോയാൽ അനന്തപുരത്തെ വ്യവസായ പാർക്കിലെ യന്ത്രങ്ങൾ നിലയ്ക്കുന്നു; കാസർകോട്ടെ വ്യവസായ മേഖലയ്ക്ക് തിരിച്ചടിയായി വൈദ്യുതി പ്രതിസന്ധി; അടിസ്ഥാന സൗകര്യ വികസനം അടിയന്തര ആവശ്യം

- കുഞ്ഞിക്കണ്ണൻ മുട്ടത്ത്

കാസർകോട്: (KasargodVartha) കുമ്പള വഴി ട്രെയിൻ പോയാൽ അനന്തപുരത്തെ വ്യവസായ പാർക്കിലെ യന്ത്രങ്ങൾ നിലയ്ക്കുന്നതായി വ്യവസായികൾ പറയുന്നു. ജില്ലയുടെ വ്യവസായാന്തരീക്ഷം ഇപ്പോൾ ആകർഷകവും പ്രതീക്ഷാജനകവുമാണെങ്കിലും വൈദ്യുതി പ്രതിസന്ധി വ്യവസായ മേഖലയ്ക്ക് തിരിച്ചടിയായി മാറുകയാണ്.

ജില്ലയിലെ അഞ്ച് വ്യവസായ എസ്റ്റേറ്റുകൾ പ്രവർത്തനസജ്ജമാണ്. അവയിലെ പ്ലോട്ടുകൾ മുഴുവൻ വിവിധ വ്യവസായങ്ങൾക്കായി ഏറ്റെടുത്തിട്ടുണ്ട്. നിരവധി യൂണിറ്റുകൾ ഇതിനകം പ്രവർത്തനം ആരംഭിച്ചുകഴിഞ്ഞു. സർക്കാർ ഭൂമി മതിയായ തോതിൽ ലഭ്യമായതിനാൽ ഭാവിയിൽ കൂടുതൽ നിക്ഷേപങ്ങളും വലിയ വ്യവസായ പാർക്കുകളും എത്തിക്കാനുള്ള സാധ്യതയും ജില്ലയ്ക്കുണ്ട്.

എന്നാൽ, അടിസ്ഥാന സൗകര്യങ്ങളിലെ ദൗർബല്യം, പ്രത്യേകിച്ച് വൈദ്യുതി വിതരണത്തിലെ അസ്ഥിരത വ്യവസായികളുടെ പ്രധാന തലവേദനയായി തുടരുകയാണ്. വൈദ്യുതി മുടക്കം ഇല്ലെങ്കിലും വൈകുന്നേരം ആറുമണിക്ക് ശേഷം വോൾട്ടേജ് ഗണ്യമായി താഴ്ന്നുപോകുന്നതായി വ്യവസായികൾ പരാതിപ്പെടുന്നു.

'വ്യവസായ എസ്റ്റേറ്റിലേക്ക് വരുന്ന വൈദ്യുതി സ്റ്റേഷനുകളിൽ നിന്നാണ് ഇന്ത്യൻ റെയിൽവേയ്ക്കും വൈദ്യുതി നൽകുന്നത്. ഇതുവഴി ട്രെയിൻ കടന്നുപോകുമ്പോൾ വോൾട്ടേജ് കുറയുകയും യന്ത്രങ്ങളുടെ പ്രവർത്തനം നിലയ്ക്കുകയുമാണ് ചെയ്യുന്നതെന്ന് അനന്തപുരം വ്യവസായ എസ്റ്റേറ്റിലെ ചോക്ലേറ്റ് നിർമ്മാണ ഫാക്ടറിയുടെ ഉടമയും വ്യവസായശാല ഉടമകളുടെ പ്രസിഡൻ്റുമായ എൻ. രത്നാകരൻ പറഞ്ഞു. വൈദ്യുതി തടസ്സം കെഎസ്ഇബി ഉദ്യോഗസ്ഥരും സമ്മതിക്കുന്നു.

ഉയർന്ന വോൾട്ടേജ് വേണ്ടിടത്ത് വോൾട്ടേജ് വ്യതിയാനം സംഭവിക്കുന്നത് യന്ത്രങ്ങൾക്ക് കേടുപാടുകൾ സംഭവിക്കുന്നതിനും ലക്ഷങ്ങളുടെ നഷ്ടം വരുത്തുന്നതിനും കാരണമാകുന്നുണ്ട്. വോൾട്ടേജ് വ്യതിയാനത്തെ തുടർന്ന് പല വ്യവസായ യൂണിറ്റുകളിലും യന്ത്രങ്ങൾക്ക് കേടുപാടുകൾ സംഭവിച്ചിട്ടുണ്ടെന്ന് വ്യവസായികൾ പറയുന്നു. അനന്തപുരം എസ്റ്റേറ്റിൽ പ്രവർത്തിക്കുന്ന ഉത്തരേന്ത്യൻ വ്യവസായി പറയുന്നത് ഇങ്ങനെയാണ്: 'വോൾട്ടേജ് പെട്ടെന്ന് കുറയുമ്പോൾ മെഷീനുകൾക്ക് വലിയ ആഘാതമുണ്ടാകുന്നു. ഉൽപാദനം തന്നെ തടസ്സപ്പെടുന്നു.'

ചില യൂണിറ്റുകൾ ഇത്തരം സാഹചര്യങ്ങളിൽ താൽക്കാലികമായി പ്രവർത്തനം നിർത്തിവെക്കാറുണ്ടെങ്കിലും, തുടർച്ചയായ വൈദ്യുതി തടസ്സം പ്ലൈവുഡ് ഉൾപ്പെടെയുള്ള വ്യവസായങ്ങൾക്ക് തിരിച്ചടിയാകുന്നു. കുമ്പള അനന്തപുരം 1, 2 എസ്റ്റേറ്റുകളിൽ പ്ലൈവുഡ് യൂണിറ്റുകളാണ് കൂടുതൽ. 'വോൾട്ടേജ് കുറയുമ്പോൾ ജനറേറ്റർ ഉപയോഗിക്കേണ്ടിവരുന്നു. ദിവസം 30,000 രൂപ വരെ ചെലവാകുന്നു,' ഇത് ഉൽപാദന ചെലവ് കുത്തനെ ഉയരാൻ കാരണമാകുന്നതായി വ്യവസായികൾ ചൂണ്ടിക്കാട്ടുന്നു.

മികച്ച സ്ഥാനം, പക്ഷേ വൈദ്യുതി തടസ്സം വെല്ലുവിളി

ദേശീയപാത 66-ന് സമീപം സ്ഥിതിചെയ്യുന്നതും, സമീപത്തായി മംഗളൂരു - കണ്ണൂർ അന്താരാഷ്ട്ര വിമാനത്താവളങ്ങളും മംഗളൂരു തുറമുഖ സൗകര്യവും ഉള്ളത് കാസർകോടിനെ നിക്ഷേപ സൗഹൃദ ജില്ലയാക്കി മാറ്റുന്നുണ്ടെന്ന് വ്യവസായികൾ പറയുന്നു.

എന്നാൽ വൈദ്യുതിയുടെ ലഭ്യത കുറവ് പരിഹരിക്കാതെ പുതിയ നിക്ഷേപകരെ ആകർഷിക്കാൻ പ്രയാസമുണ്ടാകുമെന്നാണ് വ്യവസായികളുടെ ആശങ്ക. 'ജില്ലയിൽ വൈദ്യുതി അടിസ്ഥാന സൗകര്യം ശക്തിപ്പെടുത്താൻ സംസ്ഥാന സർക്കാർ അടിയന്തര ഇടപെടൽ നടത്തണം,' എന്ന് നോർത്ത് മലബാർ ചേംബർ ഓഫ് കോമേഴ്‌സ് പ്രസിഡൻ്റ് ശ്യാം പ്രസാദും പറഞ്ഞു.

ഓവർലോഡ് പരിഹരിക്കാൻ ട്രാൻസ്മിഷൻ ലൈനായ മൈലാട്ടി–വിദ്യാനഗർ, സീതാംഗോളി–വിദ്യാനഗർ എന്നീ ലൈൻ വഴിയാണ് നിലവിൽ വ്യവസായ എസ്റ്റേറ്റുകൾക്ക് വൈദ്യുതി വിതരണം ചെയ്യുന്നത്. എന്നാൽ ഈ ലൈനുകൾ ഓവർലോഡായി മാറിയിരിക്കുകയാണ്.

സംസ്ഥാന വൈദ്യുതി മന്ത്രി കെ. കൃഷ്ണൻകുട്ടി സ്വാതന്ത്ര്യദിനാഘോഷ വേളയിൽ കാസർകോട് നടത്തിയ പ്രസംഗത്തിൽ ഉടുപ്പി–കരിന്തളം 400 കെവി പവർ കൊറിഡോർ വടക്കൻ കേരളത്തിലെ വൈദ്യുതി വിതരണ രംഗത്ത് വലിയ മുന്നേറ്റമുണ്ടാക്കുമെന്ന് പ്രഖ്യാപിച്ചിരുന്നു. കെഎസ്ഇബി അധികൃതർ ഈ പദ്ധതി ഡിസംബറിൽ പൂർത്തിയാക്കുമെന്ന് വ്യവസായികളെ അറിയിച്ചിരുന്നുവെങ്കിലും, രണ്ട് മാസം പിന്നിട്ടിട്ടും പ്രവർത്തനം പൂർത്തിയായിട്ടില്ല. കേരള ഭാഗത്തെ ജോലികൾ 95 ശതമാനവും പൂർത്തിയായെങ്കിലും കർണാടക ഭാഗത്ത് പ്രവൃത്തി മന്ദഗതിയിലാണ്. 'മേയ് മാസത്തോടെ പദ്ധതി പൂർത്തിയാക്കി സ്ഥിരമായ വൈദ്യുതി വിതരണം ഉറപ്പാക്കുമെന്ന പ്രതീക്ഷയിലാണ്,' വ്യവസായികൾ ഉള്ളത്.

ബജറ്റിൽ പരാമർശമില്ല; വ്യവസായികൾ നിരാശയിൽ

ഇടക്കാല സംസ്ഥാന ബജറ്റിൽ ജില്ലയുടെ വൈദ്യുതി അടിസ്ഥാന സൗകര്യ വികസനത്തെക്കുറിച്ച് പ്രഖ്യാപനമുണ്ടാകുമെന്ന പ്രതീക്ഷ വ്യവസായികൾക്കുണ്ടായിരുന്നു. എന്നാൽ ബജറ്റിൽ ഈ വിഷയത്തിൽ പരാമർശമില്ലാത്തത് വ്യവസായ മേഖലയിൽ നിരാശ സൃഷ്ടിച്ചിരിക്കുകയാണ്. അനന്തപുരത്ത് മാത്രമല്ല ജില്ലയിലെ മറ്റ് മൂന്ന് വ്യവസായ എസ്റ്റേറ്റുകളിലും വോൾട്ടേജ് ക്ഷാമം തടസ്സമായി മാറുന്നുണ്ട്. പകൽ സമയങ്ങളിൽ പ്രശ്നം ഗുരുതരമല്ലെങ്കിലും രാത്രിയിലാണ് വോൾട്ടേജ് ക്ഷാമം കാര്യമായ പ്രതിസന്ധി സൃഷ്ടിക്കുന്നത്.

കാസർകോട്ടെ പ്രധാന വ്യവസായ എസ്റ്റേറ്റുകൾ:

1. അനന്തപുരം 1, 2 വ്യവസായ പാർക്ക്

2. സീതാംഗോളി കിൻഫ്ര ഇൻഡസ്ട്രിയൽ പാർക്ക്

മിനി ഇൻഡസ്ട്രിയൽ എസ്റ്റേറ്റുകൾ:

3. സിഡ്കോ ചട്ടഞ്ചാൽ വ്യവസായ പാർക്ക്

4. മടിക്കൈ ഗുരു വനം വ്യവസായ പാർക്ക്

5. എച്ച്എഎൽ പാർക്ക്

പ്രധാന വ്യവസായ മേഖലകൾ:

• കാർഷിക ഉൽപ്പന്ന സംസ്കരണം

• എൻജിനീയറിങ്

• മരവുമായി ബന്ധപ്പെട്ട വ്യവസായങ്ങൾ

• ധാതു, നിർമ്മാണ സാമഗ്രികൾ

• പെട്രോ കെമിക്കൽസ് വ്യവസായം

ഭൂമിശാസ്ത്രപരവും അടിസ്ഥാനപരവുമായ സാഹചര്യം ഉണ്ടായിട്ടും വൈദ്യുതി വിതരണത്തിലെ അസ്ഥിരത തുടരുകയാണെങ്കിൽ കാസർകോടിന്റെ വ്യവസായ വളർച്ച മന്ദഗതിയിലാകുമെന്നാണ് ഈ മേഖലയിലുള്ളവർ മുന്നറിയിപ്പ് നൽകുന്നത്.

കാസർകോട്ടെ വ്യവസായികളുടെ ദുരിതം ഷെയർ ചെയ്യൂ. അനന്തപുരം വ്യവസായ പാർക്കിലെ പ്രതിസന്ധി ചർച്ചയാകട്ടെ. കൂടുതൽ പുതിയ വാര്‍ത്തകള്‍ അറിയാല്‍ ഞങ്ങളുടെ വ്ടാസ് ആപ്പ് ചാനല്‍ ഫോളോ ചെയ്യൂ.

Article Summary: Industrialists in Kasaragod allege that machines in Ananthapuram Industrial Park stop working due to voltage drops when trains pass through Kumbala. The delay in the Udupi-Karinthalam 400KV line exacerbates the crisis.

#Kasaragod #IndustrialPark #ElectricityCrisis #Ananthapuram #KSEB #KeralaNews #Business #Infrastructure