പ്രവാസികളുടെ ക്രിസ്മസ്-പുതുവത്സര യാത്രകൾ മുടങ്ങും; വിമാന ടിക്കറ്റ് നിരക്ക് 50,000 കടന്നേക്കുമെന്ന് ആശങ്ക, സർവീസുകൾ നിർത്തിവെക്കുമെന്ന് വിമാനക്കമ്പനികൾ

ദുബൈ / സൗദി അറേബ്യ: (KasargodVartha) പശ്ചിമേഷ്യൻ സംഘർഷം രൂക്ഷമായതിനെ തുടർന്ന് വിമാന ഇന്ധന വില കുതിച്ചുയർന്നതോടെ ടിക്കറ്റ് നിരക്കുകൾ വൻതോതിൽ വർധിക്കുന്നത് ഗൾഫ് പ്രവാസികൾക്ക് കനത്ത തിരിച്ചടിയാകുന്നു. കുടുംബത്തോടൊപ്പം ക്രിസ്മസ്-ന്യൂ ഇയർ ആഘോഷങ്ങൾക്ക് നാട്ടിലേക്ക് മടങ്ങാൻ ടിക്കറ്റ് ബുക്ക് ചെയ്യുന്ന പ്രവാസികൾക്ക് നിരക്കിൽ വൻ വർധനവാണ് രേഖപ്പെടുത്തിയിരിക്കുന്നത്. ഇതോടെ ഈ അവധിക്കാലത്ത് നാട്ടിലെത്താനാകുമോ എന്ന കടുത്ത ആശങ്കയിലാണ് പ്രവാസി സമൂഹം.

സാധാരണയായി ഒക്ടോബർ, നവംബർ മാസങ്ങളിൽ ഗൾഫ് രാജ്യങ്ങളിൽ നിന്നുള്ള ടിക്കറ്റ് നിരക്ക് ഗണ്യമായി കുറയാറാണ് പതിവ്. എന്നാൽ ഇപ്രാവശ്യം അതുണ്ടായില്ലെന്ന് പ്രവാസികൾ ചൂണ്ടിക്കാട്ടുന്നു. ഓണാഘോഷവും സ്കൂൾ അവധിയും കഴിഞ്ഞ് നാട്ടിൽനിന്ന് ഗൾഫിലേക്ക് പറക്കുമ്പോൾ തന്നെ ടിക്കറ്റ് നിരക്ക് 35,000 മുതൽ 45,000 രൂപ വരെയായിരുന്നു. ഇനി ഗൾഫിൽ നിന്ന് ക്രിസ്മസിനും പുതുവത്സരത്തിനും നാട്ടിലേക്ക് വരുമ്പോൾ ടിക്കറ്റ് നിരക്ക് 50,000 രൂപ കടന്നേക്കുമോ എന്ന ആശങ്കയിലാണ് പ്രവാസികൾ. നേരത്തെ തന്നെ യാത്രാ നിരക്കുകൾ താങ്ങാനാവാത്ത നിലയിലായിരുന്നു.

തൊഴിൽ മേഖലയിലും ഇരട്ടി പ്രഹരം

ഗൾഫ് മേഖലയിൽ പെട്രോൾ വിലയിലുണ്ടായ വർധനവ് തന്നെ പ്രവാസികളെ ഏറെ സങ്കടത്തിലാക്കിയിരുന്നു. ഇതിന് പുറമെ പശ്ചിമേഷ്യൻ സംഘർഷം ഗൾഫിലെ വിവിധ തൊഴിൽ മേഖലകളിലും വലിയ പ്രതിസന്ധിയാണ് സൃഷ്ടിച്ചിട്ടുള്ളത്. പല കമ്പനികളും ജീവനക്കാരുടെ ശമ്പളം പോലും തടഞ്ഞുവെക്കുന്നുണ്ട്.

സാമ്പത്തിക മാന്ദ്യവും തൊഴിലില്ലായ്മയും കാരണം ഗൾഫിലെ സാധാരണക്കാരായ തൊഴിലാളികൾ വലിയ പ്രതിസന്ധി നേരിടുന്നതിനിടെയാണ് യാത്രാ നിരക്കുകളിലെ ഈ വൻ കൊള്ള. അടിയന്തര ആവശ്യങ്ങൾക്ക് പോലും നാട്ടിലെത്താൻ കഴിയാത്ത വിധം വിമാന ടിക്കറ്റുകൾ സാധാരണക്കാരുടെ ബഡ്ജറ്റിന് പുറത്താകുന്നത് പ്രവാസികൾക്ക് ഇരട്ടി പ്രഹരമാണ് നൽകുന്നത്.

സർവീസുകൾ നിർത്തിയേക്കുമെന്ന് കമ്പനികൾ

അതിനിടെ വിമാന സർവീസുകൾ തന്നെ വലിയ പ്രതിസന്ധിയിലാണെന്ന് കാണിച്ച് വ്യോമയാന കമ്പനികൾ കേന്ദ്ര സർക്കാരിൻ്റെ ഇടപെടൽ ആവശ്യപ്പെട്ട് രംഗത്തുവന്നിട്ടുണ്ട്. ഈ വിഷയം ചൂണ്ടിക്കാട്ടി വ്യോമയാന മന്ത്രി രാം മോഹൻ നായിഡുവിന് കമ്പനികൾ കത്തയക്കുകയും ചെയ്തു.

പശ്ചിമേഷ്യൻ സംഘർഷം കാരണം വ്യോമ പാതകളിൽ കടുത്ത നിയന്ത്രണം വന്നതും, സുരക്ഷാ പ്രശ്നങ്ങൾ കാരണം നീണ്ട ദൂരം ചുറ്റിപ്പറക്കേണ്ടി വരുന്നതുമാണ് കമ്പനികൾ ചൂണ്ടിക്കാണിക്കുന്ന പ്രധാന പ്രതിസന്ധികൾ.

അതുകൊണ്ടുതന്നെ ടിക്കറ്റ് നിരക്ക് വർധിപ്പിക്കാതെ മുന്നോട്ടുപോകാൻ വേറെ നിർവാഹമില്ലെന്നാണ് വിമാനക്കമ്പനികളുടെ പ്രധാന വാദം. ലാഭകരമല്ലാത്ത പല റൂട്ടുകളിലും കമ്പനികൾ നിലവിൽ സർവീസ് നടത്തുന്നുണ്ട്. കേന്ദ്ര സർക്കാരിൻ്റെ ഭാഗത്തുനിന്നും അടിയന്തര ഇടപെടലുകളും സംരക്ഷണവും ലഭിച്ചില്ലെങ്കിൽ ഇത്തരം സർവീസുകൾ നിർത്തിവയ്ക്കേണ്ടി വരുമെന്നും വിമാനക്കമ്പനികൾ സർക്കാരിനെ അറിയിച്ചിട്ടുണ്ട്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: The escalation of the Middle East conflict has led to a severe surge in aviation fuel prices, causing airfares to skyrocket and threatening the Christmas and New Year travel plans of Gulf NRIs, with fears of tickets crossing Rs 50,000

#KasargodVartha #GulfNRIs #AirfareHike #MiddleEastCrisis #DubaiNews #SaudiArabia #AviationNews #RamMohanNaidu #MalayalamNews #AparnaNews