ക്രിസ്മസും പുതുവത്സരവും കഴിഞ്ഞിട്ടും കുറയാതെ കോഴിയിറച്ചി വില; കിലോയ്ക്ക് 165 രൂപയായി വർധിച്ചു

കാസർകോട്: (KasargodVartha) ക്രിസ്മസ്-പുതുവത്സര വിപണി ലക്ഷ്യമിട്ട് ഡിസംബർ ആദ്യവാരത്തിൽ വർധിപ്പിച്ച കോഴിയിറച്ചിയുടെയും കോഴിമുട്ടയുടെയും വില മാറ്റമില്ലാതെ തുടരുന്നു. വെള്ളിയാഴ്ച, കോഴിയിറച്ചിക്ക് കിലോയ്ക്ക് അഞ്ച് രൂപ കൂടി 165 രൂപയായി. 

ചില്ലറ വിൽപ്പന കടകളിലാണ് ഈ വിലയുള്ളത്. കാസർകോട് ടൗണിൽ 160 രൂപയും കുമ്പളയിൽ 160 മുതൽ 165 രൂപ വരെയുമാണ് കോഴിയിറച്ചിയുടെ നിരക്ക്. അതേസമയം, ഒരു മാസം മുമ്പ് ഉയർത്തിയ മുട്ട വിലയിൽ ഇതുവരെ കുറവുണ്ടായിട്ടില്ല. ഒരു കോഴിമുട്ടയ്ക്ക് ഏഴ് രൂപ മുതൽ 7.50 രൂപ വരെയാണ് ഈടാക്കുന്നത്. മൊത്തവ്യാപാര കടകളിൽ ഇതിൽ നേരിയ വ്യത്യാസം മാത്രമാണുള്ളത്.

ആഘോഷ വിപണി ലക്ഷ്യമിട്ട് പഴവർഗങ്ങൾക്കും വില വർധിപ്പിച്ചിട്ടുണ്ട്. ആപ്പിളിന് 180 മുതൽ 280 രൂപ വരെയാണ് വിലയിട്ടിരിക്കുന്നത്. നല്ലയിനം ആപ്പിളുകൾക്കാണ് 280 രൂപ ഈടാക്കുന്നത്. മറ്റുള്ളവയ്ക്ക് 100 രൂപയ്ക്ക് മുകളിലാണ് വില. ഓറഞ്ച്, മുസംബി തുടങ്ങിയവയ്ക്ക് നൂറു രൂപയിൽ താഴെയാണ് നിരക്ക്. എന്നാൽ നേന്ത്രക്കായയ്ക്ക് വിലയിൽ ഇടിവുണ്ട്. 

കഴിഞ്ഞ ഒരു മാസമായി തുടരുന്ന ഈ കുറവ് അനുസരിച്ച് മൂന്ന് കിലോ നേന്ത്രക്കായയ്ക്ക് 100 രൂപയാണ് വില. ചില ചില്ലറ വിൽപ്പന കടകളിൽ രണ്ടര കിലോയ്ക്ക് 100 രൂപ ഈടാക്കുന്നുണ്ട്. കദളിപ്പഴത്തിന് 70 മുതൽ 80 രൂപ വരെയാണ് വില. പപ്പായ, അനാർ, തണ്ണിമത്തൻ എന്നിവയുടെ വിലയിൽ വലിയ മാറ്റങ്ങളില്ല.

ശബരിമല സീസൺ അടുത്തുവരുന്നതിനാൽ പച്ചക്കറി വിലയിലും നേരിയ വർധനവുണ്ട്. തക്കാളിക്ക് 56 രൂപയാണ് വെള്ളിയാഴ്ചത്തെ വില. അതേസമയം അരി, പഞ്ചസാര, മുളക്, പുളി, കടലപ്പരിപ്പ് തുടങ്ങിയ അവശ്യസാധനങ്ങളുടെ വിലയിൽ മാറ്റമില്ലാതെ തുടരുന്നത് ഉപഭോക്താക്കൾക്ക് ആശ്വാസമാകുന്നുണ്ട്.

ഈ വാർത്ത സുഹൃത്തുക്കളിലേക്ക് ഷെയർ ചെയ്യൂ. കമന്റ് ചെയ്യൂ. 

Article Summary: Chicken and egg prices remain high in Kasaragod even after the holiday season, with chicken reaching 165 per kg.

#ChickenPrice #KasaragodNews #MarketUpdate #PriceHike #KeralaNews #FoodPrices