40 ലക്ഷം രൂപ മുടക്കി തുടങ്ങിയ വാഹന സർവീസ് സ്റ്റേഷൻ വ്യാജപ്രചാരണങ്ങളെ തുടർന്ന് അടച്ചുപൂട്ടി; മാനദണ്ഡങ്ങൾ പാലിച്ചാണ് തുടങ്ങിയതെന്നും തുറക്കാൻ അനുവദിക്കണമെന്നും ഉടമ കെ മനോജ്

ചെറുവത്തൂർ: (KasargodVartha) 40 ലക്ഷം രൂപ മുടക്കി തുടങ്ങിയ വാഹന സർവീസ് സ്റ്റേഷൻ വ്യാജപ്രചാരണങ്ങളെത്തുടർന്ന് രണ്ടര മാസത്തിനുള്ളിൽ പൂട്ടി. നിയമപ്രകാരമുള്ള മുഴുവൻ മാനദണ്ഡങ്ങളും പാലിച്ചാണ് 'വെളിച്ചംതോട് മാർക്ക് ലൈൻ ഓട്ടോ സർവീസ് സെൻ്റർ' ആരംഭിച്ചതെന്നും സ്ഥാപനത്തിനെതിരെ ചിലർ നടത്തുന്ന പ്രചാരണങ്ങൾ വസ്തുതാവിരുദ്ധമാണെന്നും ഉടമ കെ മനോജ് മാധ്യമപ്രവർത്തകരോട് പറഞ്ഞു. 

കാങ്കോൽ-ആലപ്പടമ്പ് പഞ്ചായത്തിൽ ലീസിന് എടുത്ത 65 സെൻ്റ് സ്ഥലത്താണ് ചെറുകിട വ്യവസായ സംരംഭമായി ഈ സ്ഥാപനം ആരംഭിച്ചത്. മാർച്ച് 16 പ്രവർത്തനം തുടങ്ങിയ സ്ഥാപനം രണ്ടര മാസം മാത്രമാണ് പ്രവർത്തിച്ചത്. വിവിധ എതിർപ്പുകളെ തുടർന്ന് മെയ് 26 സ്ഥാപനം അടച്ചിടേണ്ടി വന്നതായും അദ്ദേഹം വ്യക്തമാക്കി. വായ്പയെടുത്തും സ്വർണം പണയം വെച്ചുമാണ് ഏകദേശം 40 ലക്ഷം രൂപ ചെലവഴിച്ച് സർവീസ് സ്റ്റേഷൻ ആരംഭിച്ചത്. സ്ഥാപനം അടച്ചതോടെ വലിയ സാമ്പത്തിക ബാധ്യതയാണ് ഉണ്ടായിരിക്കുന്നതെന്നും അദ്ദേഹം പറഞ്ഞു.

മാനദണ്ഡങ്ങളും പ്രവർത്തനവും

പൊല്യൂഷൻ കൺട്രോൾ ബോർഡ്, കാങ്കോൽ-ആലപ്പടമ്പ് പഞ്ചായത്ത്, റവന്യൂ വകുപ്പ് എന്നിവിടങ്ങളിൽനിന്ന് ആവശ്യമായ സർട്ടിഫിക്കറ്റുകളും അനുമതികളും നേടിയ ശേഷമാണ് സ്ഥാപനം പ്രവർത്തനം ആരംഭിച്ചതെന്നാണ് ഉടമയുടെ വിശദീകരണം. വാഹനങ്ങൾ കഴുകുന്നതിന് ഗ്രീസും മറ്റ് രാസവസ്തുക്കളും വ്യാപകമായി ഉപയോഗിക്കുന്നുവെന്ന പ്രചാരണം അടിസ്ഥാനരഹിതമാണ്. 

വളരെ കുറച്ച് വാഹനങ്ങൾ മാത്രമാണ് ഇവിടെ വാഷ് ചെയ്തിട്ടുള്ളത്. ആകെ ഒരു ബസ് മാത്രമാണ് കഴുകിയത്. ബസ് സ്ഥാപനത്തിനകത്ത് കയറ്റാൻ കഴിയാത്തതിനാലാണ് ഇൻ്റർലോക്ക് ചെയ്ത സ്ഥലത്ത് വെച്ച് കഴുകിയത്. സർവീസ് സ്റ്റേഷനിൽ നിന്നുള്ള മലിനജലം പുറത്തേക്ക് ഒഴുകിപ്പോകാത്ത രീതിയിലാണ് പൈപ്പ് വഴിയുള്ള സംവിധാനം ഒരുക്കിയിട്ടുള്ളത്. ഓയിൽ, ഗ്രീസ്, മറ്റ് മാലിന്യങ്ങൾ എന്നിവ ശാസ്ത്രീയമായാണ് സംസ്കരിക്കുന്നത്. ഫിൽട്ടർ ഫീഡ് ടാങ്കിനും സോക്പിറ്റിനും ഇടയിലുള്ള പാർട്ടീഷൻ ഭിത്തിയിൽ ദ്വാരം കണ്ടെത്തിയിട്ടുണ്ടെങ്കിൽ അത് പരിഹരിക്കാൻ തയാറാണെന്നും അദ്ദേഹം പറഞ്ഞു.

വ്യാജ ആരോപണങ്ങളും ആവശ്യവും

സർവീസ് സ്റ്റേഷനിൽനിന്ന് മലിനജലം പുറത്തേക്ക് പോകുന്നില്ലെന്ന് വ്യക്തമായിട്ടും സമീപത്തെ വീടുകളിലെ കിണറുകളിൽ ഗ്രീസിൻ്റെ അംശം കണ്ടെത്തിയെന്ന തരത്തിൽ പ്രചാരണം നടത്തുന്നത് ശരിയല്ലെന്ന് ഉടമ ആരോപിച്ചു. സ്ഥാപനം പ്രവർത്തനം ആരംഭിക്കുന്നതിന് മുമ്പ് കിണർവെള്ളത്തിൽ ഗ്രീസിൻ്റെ അംശം 2 ശതമാനമായിരുന്നുവെന്നും, ഇപ്പോൾ അത് 165 ശതമാനമായെന്നുമുള്ള പ്രചാരണം സംശയകരമാണ്. 

ചതുപ്പ് നിലത്താണ് സ്ഥാപനം നിർമിച്ചതെന്ന പ്രചാരണം വസ്തുതാവിരുദ്ധമാണെന്നും പാറയുടെ മുകളിലാണ് ഇത് പ്രവർത്തിക്കുന്നതെന്നും കെ മനോജ് വ്യക്തമാക്കി. നിയമാനുസൃതമായി അധികൃതർ നിർദേശിക്കുന്ന എല്ലാ മാനദണ്ഡങ്ങളും പാലിക്കാനും ആവശ്യമായ തിരുത്തലുകൾ വരുത്താനും തയാറാണ്. വ്യാജപ്രചാരണങ്ങൾ അവസാനിപ്പിച്ച് അടച്ചുപൂട്ടിയ സർവീസ് സ്റ്റേഷൻ വീണ്ടും തുറന്ന് പ്രവർത്തിപ്പിക്കാൻ അധികൃതർ അവസരമൊരുക്കണമെന്നാണ് ഉടമയും കുടുംബവും ആവശ്യപ്പെടുന്നത്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: A vehicle service station in Kankol-Alapadamba panchayat, started with an investment of Rs 40 lakh, was forced to close within two and a half months due to false campaigns alleging water pollution, while owner K Manoj asserts all legal norms were strictly followed and requests authorities to permit its reopening.

#KasargodVartha #CheruvathurNews #KasaragodNews #LocalNews #BusinessCrisis #KeralaNews #MalayalamNews #MarkLineAutoService #AparnaNews