വിമാന ടിക്കറ്റ് നിരക്കിൽ പരിധി നിശ്ചയിക്കില്ല; കേന്ദ്ര വ്യോമയാന മന്ത്രിയുടെ നിലപാടിൽ കടുത്ത നിരാശയിലായി പ്രവാസി സമൂഹം, ഗൾഫ് യാത്രാനിരക്ക് കുതിക്കുന്നു

ന്യൂഡൽഹി: (KasargodVartha) പ്രവാസികളുടെ വിമാന ടിക്കറ്റ് നിരക്കിൽ പരിധി നിശ്ചയിക്കില്ലെന്ന കേന്ദ്ര വ്യോമയാന മന്ത്രി  റാം മോഹൻ നായിഡു വിൻ്റെ പ്രസ്താവനയിൽ നിരാശരായി പ്രവാസികൾ. മുൻ സർക്കാരുകളുടെ അതേ നിലപാട് ആവർത്തിച്ച് വിമാനക്കമ്പനികൾക്ക് അനുകൂലമായ നിലപാടാണ് ഇപ്പോഴും കേന്ദ്രം സ്വീകരിക്കുന്നതെന്നാണ് പ്രവാസി സംഘടനകളുടെയും ഗൾഫ് മലയാളി കൂട്ടായ്മകളുടെയും പ്രധാന ആക്ഷേപം.

ആവശ്യം തള്ളി മന്ത്രി

ഉത്സവ സീസണുകളിൽ ടിക്കറ്റ് നിരക്ക് കുത്തനെ കൂട്ടുന്ന നടപടിക്കെതിരെ സർക്കാർ നേരിട്ട് ഇടപെട്ട് അപ്പർ സീലിങ് അഥവാ പരമാവധി നിരക്ക് നിശ്ചയിക്കണമെന്ന ആവശ്യമാണ് മന്ത്രി കഴിഞ്ഞ ദിവസം പൂർണമായും തള്ളിക്കളഞ്ഞത്. പകരം വിമാനക്കമ്പനികളോട് നിരക്കുകൾ ന്യായമായ രീതിയിൽ നിർത്താൻ നിർദേശിക്കുക മാത്രമാണ് സർക്കാരിന് ചെയ്യാനാകൂ എന്നും, വിപണിയിലെ ഡിമാൻഡും ഇന്ധനവിലയുമാണ് ടിക്കറ്റ് നിരക്കിനെ സ്വാധീനിക്കുന്നതെന്നും മന്ത്രി വ്യക്തമാക്കിയിരുന്നു. വിമാന ടിക്കറ്റ് നിരക്ക് വിമാനക്കമ്പനികൾ നിശ്ചയിക്കുന്നതിൽ കാലങ്ങളായി പ്രവാസികൾ പ്രതിഷേധത്തിലാണ്. എന്നാൽ കേന്ദ്രത്തിലെ ഇതുവരെയുള്ള ഒരു സർക്കാരും ഈ വിഷയത്തിൽ പ്രവാസികളുടെ ഒപ്പം നിന്ന ചരിത്രമില്ലെന്നാണ് വിമർശനം.

കൊള്ളനിരക്കും വാദങ്ങളും

നാട്ടിൽ ഓണം, പെരുന്നാൾ, ക്രിസ്മസ് പോലുള്ള വിവിധ ആഘോഷങ്ങളിൽ കുടുംബത്തോടൊപ്പം പങ്കുചേരാനും, ഗൾഫിലെ സ്കൂൾ അവധിക്കാലത്തുമാണ് പ്രവാസികൾ നാട്ടിൽ വരാറുള്ളത്. ഈ സമയത്താണ് വിമാനക്കമ്പനികൾ ടിക്കറ്റ് നിരക്ക് കുത്തനെ ഉയർത്തുന്നത്. ഓരോ സീസണിലും മൂന്ന് മുതൽ എട്ട് വരെ ഇരട്ടി തുകയാണ് ടിക്കറ്റ് നിരക്കിൽ ഈടാക്കുന്നത്. മംഗളൂരു, കണ്ണൂർ, കോഴിക്കോട്, കൊച്ചി, തിരുവനന്തപുരം വിമാനത്താവളങ്ങളിൽ എല്ലാം തന്നെ ഇതാണ് സ്ഥിതി

പശ്ചിമേഷ്യൻ സംഘർഷ സാഹചര്യവും സർവീസുകൾ വെട്ടിച്ചുരുക്കിയതുമാണ് നിരക്ക് വർധനയ്ക്ക് കാരണമെന്നാണ് വിമാനക്കമ്പനി അധികൃതരുടെ വാദം. എന്നാൽ സംഘർഷ സാഹചര്യമില്ലാത്ത മുൻകാലങ്ങളിലെ അവസ്ഥയും ഇതുതന്നെയായിരുന്നില്ലേയെന്ന് പ്രവാസികൾ ചോദിക്കുന്നു. ആഘോഷങ്ങളില്ലാത്ത സമയങ്ങളിൽ നാട്ടിലേക്ക് കുറഞ്ഞ നിരക്കിൽ ടിക്കറ്റ് കിട്ടാറുണ്ടെന്നും പ്രവാസികൾ ചൂണ്ടിക്കാട്ടുന്നു.

പ്രതിഷേധത്തിനൊരുങ്ങി പ്രവാസികൾ

2026 ഓണാഘോഷം കഴിഞ്ഞ് നാട്ടിൽ നിന്ന് തിരിച്ചുപോകുന്ന മലയാളികളുടെ ടിക്കറ്റ് നിരക്ക് കഴിഞ്ഞാഴ്ച വരെ കോഴിക്കോട്, കണ്ണൂർ, കൊച്ചി, തിരുവനന്തപുരം, മംഗളൂരു എന്നിവിടങ്ങളിൽ നിന്ന് 40,000 മുതൽ 50,000 രൂപ വരെയായിരുന്നു. അതേസമയം ഗൾഫിൽ നിന്ന് നാട്ടിലേക്ക് വരാനുള്ള ടിക്കറ്റ് നിരക്ക് ഈ സമയങ്ങളിൽ 6000 രൂപ മുതൽ 17,000 രൂപ വരെയായിരുന്നു. 

വരാനിരിക്കുന്ന ഉത്സവ സീസണുകളിലെങ്കിലും ടിക്കറ്റ് നിരക്കിൽ കേന്ദ്രസർക്കാർ ഇടപെടണമെന്ന ആവശ്യമാണ് ഇപ്പോൾ വ്യോമയാന മന്ത്രി തള്ളിക്കളഞ്ഞത്. ഇതോടെ വരാനിരിക്കുന്ന ക്രിസ്മസ്-പുതുവത്സര അവധിക്കാലത്തും ടിക്കറ്റ് നിരക്ക് നിയന്ത്രണമില്ലാതെ കുതിച്ചുയരുമെന്ന ആശങ്കയിലാണ് പ്രവാസികൾ. വിഷയത്തിൽ കടുത്ത പ്രതിഷേധം ഉയർത്താനാണ് വിവിധ പ്രവാസി സംഘടനകളുടെ തീരുമാനം.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Union Civil Aviation Minister K. Ram Mohan Naidu stated that the government will not cap airfares, leaving Gulf expatriates disappointed ahead of upcoming holiday seasons.

#KasargodVartha #AirfareHike #GulfMalayali #NRIDisappointment #CivilAviationMinister #KRamMohanNaidu #KeralaAirports #MalayalamNews #AparnaNews