കാസർകോട്ടെ പുതിയ ടൂറിസം ഹബ്ബായി ആരിക്കാടി; കായൽയാത്രയും കയാക്കിങ്ങും സ്പീഡ് ബോട്ടും ആസ്വദിക്കാൻ സഞ്ചാരികളുടെ ഒഴുക്ക്

കുഞ്ഞിക്കണ്ണൻ മുട്ടത്ത്

കുമ്പള: (KasargodVartha) കയാക്കിങ് സൗകര്യം ആരംഭിച്ചതോടെ കാസർകോട് ജില്ലയിലെ ആരിക്കാടി കായൽ സഞ്ചാരികളുടെ പുതിയ ആകർഷണകേന്ദ്രമായി മാറുന്നു. മൂന്ന് ആഴ്ച മുൻപാണ് ജില്ലാ ടൂറിസം പ്രൊമോഷൻ കൗൺസിലിൻ്റെ നേതൃത്വത്തിൽ കയാക്കിങ് പദ്ധതി പൊതുജനങ്ങൾക്കായി തുറന്നുകൊടുത്തത്. വൈകുന്നേരങ്ങളിൽ നിരവധി പേരാണ് ആരിക്കാടിയിലേക്ക് എത്തുന്നത്. 2026 മെയ് 1-ന് പദ്ധതി ഉദ്ഘാടനം ചെയ്യാനായിരുന്നു നേരത്തെ തീരുമാനിച്ചിരുന്നത്. 

എന്നാൽ തെരഞ്ഞെടുപ്പ് ജോലികൾ ഉൾപ്പെടെയുള്ള കാരണങ്ങളാൽ ഉദ്ഘാടനം വൈകുകയായിരുന്നു. വലിയ പ്രചാരണങ്ങളൊന്നുമില്ലാതെയാണ് പദ്ധതി കേന്ദ്രം പിന്നീട് സഞ്ചാരികൾക്കായി തുറന്നത്. പ്രവർത്തനം ആരംഭിച്ച് ചുരുങ്ങിയ കാലത്തിനുള്ളിൽ തന്നെ പ്രദേശത്തേക്ക് സന്ദർശകരുടെ ഒഴുക്ക് വർധിച്ചു. വെള്ളമണൽ നിറഞ്ഞ തീരപ്രദേശങ്ങൾ, കണ്ടൽക്കാടുകൾ, കായലുകൾ എന്നിവയാൽ പ്രകൃതിരമണീയമായ ആരിക്കാടി തീരദേശ ഗ്രാമത്തെ ജില്ലയിലെ പ്രധാന ടൂറിസം കേന്ദ്രമാക്കി മാറ്റുകയെന്ന ലക്ഷ്യത്തോടെയാണ് പദ്ധതി നടപ്പാക്കിയത്. ഏകദേശം 80 ലക്ഷം രൂപ ചെലവിൽ ഡിടിപിസി ഒരുക്കിയ വാക്ക്‌വേയിലൂടെയാണ് ഇവിടേക്ക് പ്രവേശിക്കുന്നത്.

കയാക്കിങ് സവാരി

കയാക്കിങ് നടത്തിപ്പുകാരായ കെപിഎസ് കയാക്കിങ് എട്ട് കയാക്കുകളാണ് ഇവിടെ ഒരുക്കിയിട്ടുള്ളത്. തുടക്കക്കാർക്കും പരിശീലനം നേടിയവർക്കും അനുയോജ്യമായ രീതിയിൽ രണ്ട് തരത്തിലുള്ള കയാക്കിങ് സൗകര്യമാണ് ഉള്ളത്. പരിശീലനം നേടിയ കയാക്കിങ് വിദഗ്ധർക്ക് ഡോക്കിൽ നിന്ന് ഷിറിയ പുഴയിലെ ഇച്ചിലങ്കോട് അണക്കെട്ട് വരെയുള്ള ഏകദേശം മൂന്ന് മുതൽ നാല് കിലോമീറ്റർ വരെ ദൈർഘ്യമുള്ള പാത തിരഞ്ഞെടുക്കാം. 

കയാക്കിങ്ങിൽ പരിചയമില്ലാത്തവർക്ക് ഡോക്കിന് സമീപത്തെ ഏകദേശം 400 മീറ്റർ ജലപാതയിലൂടെ സുരക്ഷിതമായി സവാരി നടത്താം. രാവിലെ ആറ് മണി മുതൽ കയാക്കിങ് സൗകര്യം ലഭ്യമാണ്. എന്നാൽ മുൻകൂട്ടി ബുക്കിങ് ആവശ്യമാണ്. വിനോദസഞ്ചാരികൾക്ക് കയാക്കിങ്ങിൻ്റെ അടിസ്ഥാന പരിശീലനവും നൽകുന്നുണ്ട്. വൈകിട്ട് മൂന്ന് മണി മുതൽ ആദ്യം എത്തുന്നവർക്ക് ആദ്യം എന്ന ക്രമത്തിലാണ് സൗകര്യം ലഭ്യമാക്കുന്നത്. പ്രൊഫഷണൽ കയാക്കർമാർക്ക് 7907681818 എന്ന നമ്പറിൽ ബന്ധപ്പെടാം.

സ്പീഡ് ബോട്ട് യാത്രയും കഫേയും

കയാക്കിങ് ആരംഭിച്ചതോടെ ആരിക്കാടിയുടെ ടൂറിസം സാധ്യതകൾ കൂടുതൽ പ്രയോജനപ്പെടുത്താനുള്ള ശ്രമത്തിലാണ് നാട്ടുകാർ. ആരിക്കാടി ഇക്കോ ടൂറിസം പ്രൊട്ടക്ഷൻ കമ്മിറ്റി പ്രദേശത്തെ കൂടുതൽ ശ്രദ്ധേയമായ വിനോദസഞ്ചാര കേന്ദ്രമാക്കി മാറ്റുന്നതിനുള്ള പ്രവർത്തനങ്ങൾ ആരംഭിച്ചിട്ടുണ്ട്. 

പ്രദേശത്തെ ടൂറിസം വികസനത്തിൽ വലിയൊരു പങ്കും നാട്ടുകാരുടെ നിക്ഷേപത്തിലൂടെയാണ് നടക്കുന്നത്. സഞ്ചാരികൾക്കായി നാട്ടുകാർ ചേർന്ന് എഡി കഫേ എന്ന പേരിൽ കഫേയും ആരംഭിച്ചിട്ടുണ്ട്. ലഘുഭക്ഷണങ്ങളും ജ്യൂസുകളും ഇവിടെ ലഭിക്കും. കയാക്കിങ്ങിനൊപ്പം സഞ്ചാരികൾക്ക് മറ്റൊരു ആകർഷണമായി സ്പീഡ് ബോട്ട് യാത്രയും ആരംഭിച്ചിട്ടുണ്ട്. 

പ്രവാസിയായ ഹക്കീം ആരിക്കാടിയാണ് കുമ്പള, ഷിറിയ പുഴകളിലെ വിശാലമായ കണ്ടൽക്കാടുകളിലൂടെ സ്പീഡ് ബോട്ട് സൗകര്യം ഒരുക്കിയത്. നിബിഡമായ കണ്ടൽക്കാടുകൾ നിരവധി പക്ഷികളുടെ ആവാസകേന്ദ്രം കൂടിയായതിനാൽ പ്രകൃതിസ്നേഹികൾക്ക് ഏറെ ആസ്വദിക്കാവുന്ന അനുഭവമാണിതെന്ന് അദ്ദേഹം പറഞ്ഞു.

ഭാവി പദ്ധതികൾ

ആരിക്കാടിയിൽ കയാക്കിങ് പദ്ധതി ആരംഭിക്കുന്നതിൽ മുൻ ജില്ലാ കലക്ടർ അർജുൻ പാണ്ഡ്യൻ നിർണായക പങ്കുവഹിച്ചിരുന്നു. ഭാവിയിൽ കൂടുതൽ ടൂറിസം സൗകര്യങ്ങൾ ഇവിടെ ഒരുക്കാനുള്ള പദ്ധതികളും പരിഗണനയിലുണ്ട്. വിവാഹച്ചടങ്ങുകൾ ഉൾപ്പെടെയുള്ള പരിപാടികൾക്കായി ഉപയോഗിക്കാവുന്ന മനോഹരമായ വേദിയും ഇവിടെ ഒരുക്കാൻ പദ്ധതിയുണ്ട്. 

കാസർകോട് ജില്ലയിൽ നിന്നുള്ളവർക്ക് പുറമെ അയൽജില്ലകളിൽ നിന്നും മംഗ്ളൂരിൽ നിന്നും ആളുകൾ ആരിക്കാടിയിലെത്തുന്നുണ്ടെന്ന് പ്രദേശവാസികൾ പറഞ്ഞു. പ്രകൃതിസൗന്ദര്യവും കായൽ യാത്രയും കണ്ടൽക്കാടുകളും ഒരുമിച്ച് ആസ്വദിക്കാനാകുന്ന കേന്ദ്രമെന്ന നിലയിൽ ആരിക്കാടി ചുരുങ്ങിയ കാലത്തിനുള്ളിൽ തന്നെ കാസർകോട്ടെ പുതിയ വിനോദസഞ്ചാര ഹബ്ബായി മാറുകയാണ്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം. 

Article Summary: Arikkadi in Kasaragod is emerging as a popular tourism hub with its new kayaking and speedboat facilities, complemented by an ₹80 lakh walkway.

#KasargodVartha #ArikkadiTourism #KasaragodNews #KayakingKerala #Kumbla #MangroveTourism #KeralaTourism #MalayalamNews #AparnaNews