നൂറു രൂപയ്ക്ക് മൂന്നു കിലോ: മാമ്പഴക്കാലം ആഘോഷമാക്കുന്നു!

കാസർകോട്: (KasargodVartha) മാമ്പഴക്കാലം അതിന്റെ പൂർണ്ണതയിൽ എത്തിയിരിക്കുന്നു. നാടെങ്ങും മാമ്പഴങ്ങൾ സുലഭമാണ്. പഴക്കടകളിലും വഴിയോരങ്ങളിലും മാമ്പഴങ്ങളുടെ ലഭ്യത വർധിച്ചതോടെ വില ഗണ്യമായി കുറഞ്ഞു. 

കാലാവസ്ഥാ വ്യതിയാനം ഉൽപ്പാദനത്തെ കാര്യമായി ബാധിച്ചിട്ടില്ല എന്നതിന്റെ തെളിവാണ് വഴിയോരങ്ങളിൽ പോലും സുലഭമായി ലഭിക്കുന്ന മാമ്പഴങ്ങൾ. സ്വാദിഷ്ടമായ വിവിധയിനം മാമ്പഴങ്ങൾക്ക് പോലും ഇപ്പോൾ തുച്ഛമായ വിലയേയുള്ളൂ. നൂറു രൂപ നൽകിയാൽ മൂന്ന് കിലോ വരെ മാമ്പഴം ലഭിക്കുമെന്ന നിലയിലാണ് ഈ മാമ്പഴക്കാല വിപണി.

അന്യസംസ്ഥാനങ്ങളിൽ നിന്നാണ് ഏറ്റവും കൂടുതൽ മാമ്പഴം കേരളത്തിലേക്ക് എത്തുന്നത്. മൊത്ത വിതരണക്കാരാണ് ഇത് കേരളത്തിലെ വിവിധ ജില്ലകളിലേക്ക് എത്തിക്കുന്നത്. ഇന്ത്യയിൽ ഏറ്റവും കൂടുതൽ മാമ്പഴം ഉൽപ്പാദിപ്പിക്കുന്ന സംസ്ഥാനം ആന്ധ്രാപ്രദേശാണ്. 

പ്രതിവർഷം 30 മുതൽ 35 ലക്ഷം ടൺ വരെ മാമ്പഴം ആന്ധ്രയിൽ നിന്ന് കയറ്റി അയക്കപ്പെടുന്നുണ്ടെന്നാണ് കണക്ക്. തൊട്ടുപിന്നിൽ തമിഴ്നാടാണ്. ഉത്തർപ്രദേശ്, പശ്ചിമബംഗാൾ, കർണാടക, കേരളം എന്നീ സംസ്ഥാനങ്ങളും മാമ്പഴം ഉൽപ്പാദിപ്പിക്കുന്നുണ്ട്. ഓരോ സംസ്ഥാനത്തിനും അതിൻ്റേതായ തനതും സ്വാദിഷ്ടവുമായ ഒരിനം മാമ്പഴം ഉണ്ടാകും, അതാണ് അവിടത്തുകാരുടെ പ്രിയപ്പെട്ട ഇനവും.

മഹാരാഷ്ട്രയിലെ രത്നഗിരി ജില്ലയിൽ വ്യാപകമായി കൃഷി ചെയ്തുവരുന്ന ‘അൽഫോൺസോ’ എന്ന ഇനമാണ് മാമ്പഴങ്ങളിലെ രാജാവായി അറിയപ്പെടുന്നത്. ഇതിനാണ് വിപണിയിൽ ഏറ്റവും കൂടുതൽ വിലയും ഈടാക്കുന്നത്. 

കൊങ്കൺ വഴിയുള്ള ട്രെയിൻ യാത്രക്കാർ പലപ്പോഴും രത്നഗിരിയിൽ വെച്ച് ഈ മാമ്പഴം വാങ്ങി കഴിക്കുന്നത് ഒരു പതിവ് കാഴ്ചയാണ്. മഹാരാഷ്ട്രയിൽ ഏറ്റവും കൂടുതൽ വിറ്റഴിക്കപ്പെടുന്ന മാമ്പഴവും അൽഫോൺസോ തന്നെയാണ്.

കേരളത്തിൽ കാലാവസ്ഥയനുസരിച്ച് നവംബർ, ഡിസംബർ മാസങ്ങളിലാണ് മാവുകൾ പൂത്തുതുടങ്ങുന്നത്. ഇത് മാമ്പഴം നേരത്തെ പാകമാകുന്നതിനും വിപണനം നടത്തുന്നതിനും സഹായകരമാകുന്നുണ്ട്. സംസ്ഥാനത്ത് ഏറ്റവും കൂടുതൽ മാവ് കൃഷി ചെയ്യുന്നത് പാലക്കാട്, മലപ്പുറം ജില്ലകളിലാണ്.

ഇപ്പോൾ പഴക്കടകളിലും വഴിയോരങ്ങളിലും കണ്ടുവരുന്ന മാമ്പഴങ്ങളൊക്കെ ആന്ധ്ര, തമിഴ്നാട് സംസ്ഥാനങ്ങളിൽ നിന്ന് വരുന്നവയാണ്. ലോഡ് കണക്കിന് മാമ്പഴങ്ങളാണ് ദിവസേന കാസർഗോഡ് ജില്ലയിലെത്തുന്നത്. മൊത്തക്കച്ചവടക്കാരാണ് ഇവ വിപണിയിലെത്തിക്കുന്നത്. 

നീലം, തോട്ടാപുരി (തോട്ടൻകോണം), മല്ലിക, കാലാപ്പാടി, കിളിച്ചുണ്ടൻ, മൂവാണ്ടൻ തുടങ്ങിയ മാമ്പഴങ്ങൾ വിപണിയിൽ സുലഭമാണ്, ഒപ്പം വിലക്കുറവുമുണ്ട്. അതുകൊണ്ടുതന്നെ മാമ്പഴത്തിന് ആവശ്യക്കാർ ഏറെയാണെന്ന് കച്ചവടക്കാർ പറയുന്നു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക 

Article Summary: Mango season brings abundant supply and low prices to markets, with consumers enjoying various varieties including Alphonso.

#MangoSeason #Kerala #FruitMarket #Alphonso #LowPrices #Agriculture