മലബാർ മിൽമയിൽ ക്രമക്കേടുകൾ; കാസർകോട് ഡയറിയിൽ മണ്ണെണ്ണ മണമുള്ള പാൽ വിതരണം ചെയ്തെന്ന് റിപ്പോർട്ട്; ഗുണനിലവാരമില്ലാത്ത പാൽ വാങ്ങി 27 ലക്ഷം നഷ്ടം വരുത്തിയെന്നും ആക്ഷേപം

-കുഞ്ഞിക്കണ്ണൻ മുട്ടത്ത്

കാഞ്ഞങ്ങാട്: (KasargodVartha) മലബാർ മേഖലാ ക്ഷീരോൽപാദക യൂണിയനിൽ (എംആർസിഎംപിയു അഥവാ മലബാർ മിൽമ) സാമ്പത്തികവും ഭരണപരവുമായ ക്രമക്കേടുകൾ ചൂണ്ടിക്കാട്ടി ക്ഷീരവികസന വകുപ്പ് നടപടിക്ക് നിർദേശം നൽകി. 1969-ലെ കേരള സഹകരണ സംഘം നിയമത്തിലെ വിവിധ വ്യവസ്ഥകൾ പ്രകാരം യൂണിയൻ്റെ പ്രവർത്തനങ്ങളിൽ കൂടുതൽ പരിശോധനയും തുടർനടപടികളും നടത്തണമെന്നാണ് 2026 സെപ്റ്റംബർ 18-ന് പുറത്തിറക്കിയ ഉത്തരവിൽ വ്യക്തമാക്കുന്നത്.

യൂണിയൻ്റെ വാർഷിക റിപ്പോർട്ടുകളും ഓഡിറ്റ് ചെയ്ത കണക്കുകളും യഥാസമയം സമർപ്പിച്ചിട്ടില്ലെന്നതടക്കമുള്ള കാര്യങ്ങളാണ് പ്രാഥമിക പരിശോധനയിൽ ചൂണ്ടിക്കാട്ടിയിരിക്കുന്നത്. സഹകരണ നിയമത്തിലെ വ്യവസ്ഥകൾ പ്രകാരം സബ്സിഡിയറി സ്ഥാപനങ്ങളുടെ കണക്കുകളും വാർഷിക റിപ്പോർട്ടുകളും കൃത്യമായി അവതരിപ്പിക്കേണ്ടതുണ്ടെന്നും ഉത്തരവിൽ ഓർമിപ്പിക്കുന്നു.

മണ്ണെണ്ണ മണമുള്ള പാൽ; നഷ്ടം 27.45 ലക്ഷം

മലബാർ മേഖലാ സഹകരണ ക്ഷീരോൽപാദക യൂണിയൻ്റെ കാസർകോട് മാവുങ്കാൽ ഡയറിയിൽ ഗുണനിലവാരമില്ലാത്ത പാൽ സംഭരിച്ചതിനെ തുടർന്ന് 27.45 ലക്ഷം രൂപയുടെ സാമ്പത്തിക നഷ്ടമുണ്ടായതായി ക്ഷീരവികസന വകുപ്പ് ഡയറക്ടറുടെ റിപ്പോർട്ടിൽ പറയുന്നു. നഷ്ടത്തുകയ്ക്ക് ഉത്തരവാദികളായവരിൽ നിന്ന് തുക ഈടാക്കാതെ യൂണിയൻ്റെ കണക്കിൽ കുറവ് വരുത്തിയതായും രേഖയിൽ ചൂണ്ടിക്കാട്ടുന്നു.

2025 മാർച്ച് 19-ന് സമ്പത്രാവു ദേശ്മുഖ് കോ-ഓപ്പറേറ്റീവ് മിൽക്ക് യൂണിയനിൽ നിന്ന് മുൻകൂർ പണം നൽകി 33,062 ലിറ്റർ ഗുണനിലവാരമില്ലാത്ത പാൽ വാങ്ങിയെന്നാണ് കണ്ടെത്തൽ. രാസവസ്തുക്കൾ അടങ്ങിയതായി കരുതുന്നതും മണ്ണെണ്ണയുടെ പോലുള്ള മണമുണ്ടായിരുന്നതുമായ പാലാണ് അന്ന് വാങ്ങിയതെന്ന് റിപ്പോർട്ടിൽ വ്യക്തമാക്കുന്നു. ഈ പാൽ പ്രാദേശികമായി സംഭരിക്കുകയും കർണാടക മിൽക്ക് ഫെഡറേഷനിൽ നിന്ന് വാങ്ങിയ 55,000 ലിറ്റർ പാലുമായി ചേർത്ത് ആകെ 88,000 ലിറ്റർ പാൽ വിതരണത്തിനായി തയ്യാറാക്കുകയും ചെയ്തതായും അന്വേഷണ റിപ്പോർട്ടിലുണ്ട്.

വാങ്ങിയ പാൽ ഗുണനിലവാര പരിശോധനകൾ നടത്താതെയാണ് നിലവിലുണ്ടായിരുന്ന പാലുമായി ചേർത്ത് സംസ്കരിച്ചത്. ഇതുമൂലം മേഖലാ യൂണിയന് 27.45 ലക്ഷം രൂപയുടെ നഷ്ടമുണ്ടായതായി റിപ്പോർട്ടിൽ പറയുന്നു. ഉത്തരവാദികൾക്കെതിരെ നടപടിയും സ്വീകരിക്കാതെ 27.45 ലക്ഷം രൂപ യൂണിയൻ്റെ കണക്കിൽ കുറച്ചത് ഭരണസമിതിയുടെ വീഴ്ചയാണെന്നും ഉത്തരവിൽ ചൂണ്ടിക്കാട്ടുന്നു.

സാധാരണയായി മറ്റു ഡയറിയിൽ നിന്ന് പാൽ വാങ്ങുമ്പോൾ ഡയറിയിലെത്തിയ ഉടൻ ഉദ്യോഗസ്ഥർ ഗുണനിലവാര പരിശോധന നടത്തുകയും ഗുണമേന്മ ഉറപ്പാക്കിയശേഷം മാത്രമാണ് പണം നൽകുകയും ചെയ്യുന്നത്. എന്നാൽ കാസർകോട് മാവുങ്കാൽ ഡയറിയുമായി ബന്ധപ്പെട്ട ഈ ഇടപാടിൽ മുൻകൂർ പണം നൽകിയതും ഗുണനിലവാര പരിശോധന നടത്താതിരുന്നതും രേഖയിൽ പ്രത്യേകം ചൂണ്ടിക്കാട്ടുന്നു.

മലപ്പുറം ഡയറിയിലെ പരിശോധന

മലപ്പുറം ഡയറിയുമായി ബന്ധപ്പെട്ട് 84.45 ലക്ഷം രൂപയുടെ സ്റ്റോക്കുമായി ബന്ധപ്പെട്ട് പരിശോധനയിൽ ഉദ്യോഗസ്ഥർ ചോദ്യങ്ങൾ ഉയർത്തിയിട്ടുണ്ട്. സ്റ്റോക്കിൻ്റെ കണക്കുകളിലും രേഖകളിലും വ്യക്തത വരുത്തേണ്ടതുണ്ടെന്നും തുകയുടെ വിനിയോഗം സംബന്ധിച്ച് കർശന പരിശോധന നടത്തണമെന്നും നിർദേശമുണ്ട്.

മലപ്പുറം ഡയറിയുടെ വികസനവുമായി ബന്ധപ്പെട്ട് 50 ലക്ഷം രൂപ ഗ്രാന്റ് അനുവദിച്ചതുമായി ബന്ധപ്പെട്ടും ഉത്തരവിൽ വിശദീകരണം തേടിയിട്ടുണ്ട്. ഇതിൽ 25 ലക്ഷം രൂപ മാത്രമാണ് ചെലവഴിച്ചതെന്നും ബാക്കിയുള്ള തുകയുടെ വിനിയോഗം സംബന്ധിച്ച് വ്യക്തത ആവശ്യമാണെന്നും ക്ഷീര വികസന വകുപ്പ് ഡയറക്ടറുടെ രേഖയിൽ പറയുന്നു. മലപ്പുറം ഡയറിയിലെ വിവിധ നിർമാണ, വികസന പ്രവർത്തനങ്ങളുമായി ബന്ധപ്പെട്ട് ചെലവഴിച്ച തുകകൾ, പൂർത്തിയാക്കിയ പ്രവൃത്തികൾ, അവശേഷിക്കുന്ന പ്രവൃത്തികൾ തുടങ്ങിയവയും വിശദമായി പരിശോധിക്കേണ്ടതുണ്ട്.

ഭരണസമിതിക്കെതിരെ നടപടിക്ക് സാധ്യത

കണക്കുകളും സ്റ്റാറ്റ്യൂട്ടറി രേഖകളും തയ്യാറാക്കി ഓഡിറ്റിന് സമർപ്പിക്കുന്നതിൽ വീഴ്ച വരുത്തിയാൽ ഭരണസമിതി അംഗങ്ങൾക്കെതിരെ അച്ചടക്ക നടപടിയെടുക്കാവുന്ന വ്യവസ്ഥകൾ സഹകരണ നിയമത്തിലുണ്ടെന്നും ഉത്തരവിൽ വ്യക്തമാക്കുന്നു. കേരള സഹകരണ സംഘം നിയമത്തിലെ 64(4എ) വകുപ്പ് പ്രകാരം സാമ്പത്തികവും നിയമപരവുമായ രേഖകൾ തയ്യാറാക്കി ഓഡിറ്റിന് സമർപ്പിക്കേണ്ടത് ഭരണസമിതിയുടെ ബാധ്യതയാണ്. ഇതിൽ വീഴ്ച വരുത്തുന്നത് ഭരണസമിതി അംഗങ്ങളുടെ അയോഗ്യതയ്ക്ക് കാരണമാകാമെന്നും നിയമവ്യവസ്ഥ ഉദ്ധരിച്ച് ഡയറക്ടറുടെ ഉത്തരവിൽ വ്യക്തമാക്കിയിട്ടുണ്ട്.

മലബാർ മേഖലാ ക്ഷീരോൽപാദക യൂണിയൻ്റെ വിവിധ സ്ഥാപനങ്ങളിലെ സാമ്പത്തിക ഇടപാടുകളും രേഖകളും വിശദമായി പരിശോധിക്കാനും ആവശ്യമായ എല്ലാ രേഖകളും ശേഖരിക്കാനും പ്രത്യേക നിർദേശമുണ്ട്.

കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. 

Article Summary: Director orders action against Malabar Milma over financial irregularities.

#KasargodVartha #MalabarMilma #KasaragodNews #FinancialFraud #DairyDevelopmentDepartment #MalayalamNews #RenuNews