അധികാരികളുടെ കണ്ണുതുറപ്പിക്കാന്‍ ജി എച്ച് എമ്മിന്റെ കുളിസമരം

കാസര്‍കോട്: (www.kasargodvartha.com 06.02.2017) പ്രസ്ക്ലബ് ജംഗ്ഷന്‍ രണ്ടുദിവസമായി പൈപ്പ് ലൈന്‍ പൊട്ടി നഗരമധ്യത്തില്‍ കുടിവെള്ളം പാഴാകുന്നതിനെതിരെ അഴിമതി വിരുദ്ധ കൂട്ടായ്മയായ ജി എച്ച് എം പ്രവര്‍ത്തകര്‍ നടത്തിയ കുളിസമരം അധികാരികളുടെ കണ്ണു തുറപ്പിച്ചു. പൈപ്പ് പൊട്ടി വെള്ളം പാഴാകുന്ന സംഭവം വാട്ടര്‍ അതോറിട്ടി അധികൃതരുടെ ശ്രദ്ധയില്‍ പെടുത്തിയിട്ടും ഒരുവിധത്തിലുള്ള ഇടപെടലുകള്‍ നടത്താത്തതില്‍ പ്രതിഷേധിച്ചാണ് ജി എച്ച് എം പ്രവര്‍ത്തകര്‍ കുളിസമരം നടത്തിയത്.

ആയിരക്കണക്കിന് വീടുകളില്‍ കുടിവെള്ളം കിട്ടാതെ ബുദ്ധിമുട്ട് അനുഭവപ്പെടുമ്പോള്‍ വെള്ളം പാഴാക്കി കളയുന്നതിനെതിരെ ജല അതോറിറ്റി മന്ത്രി മാത്യു ടി തോമസിനും, കാസര്‍കോട് ജില്ലാകളക്ടര്‍ക്കും പരാതിനല്‍കുകയും ചെയ്തതിന്റെ തൊട്ടുപിന്നാലെ വാട്ടര്‍അതോറിട്ടി അധികാരികള്‍ താല്‍കാലികമായി പരിഹാരം കാണുകയായിരുന്നു.



കൃഷികള്‍ക്കും മറ്റും അനധികൃതമായി വെള്ളം ഉപയോഗിക്കുന്നവരെ തടയും എന്ന് കളക്ടര്‍ കഴിഞ്ഞ ദിവസം പ്രസ്താവന ഇറക്കിയിരുന്നു. എന്നാല്‍ ഇതുപോലെ ആയിരക്കണക്കിന് കുടുംബങ്ങള്‍ക്ക് ഉപകാരപ്പെടേണ്ട കുടിവെള്ളം പാഴായിപോകുന്നതില്‍ ജില്ലാ കളക്ടര്‍ പ്രതികരിക്കണമെന്നും ജി എച്ച് എം ആവശ്യപ്പെട്ടിരുന്നു.

വെള്ളം അമൂല്യമാണ് അത് പാഴാക്കരുതെന്ന് പലരും പലയിടങ്ങളിലായി പ്രസംഗിക്കുകയും എഴുതിവെക്കുകയും ചെയ്യുന്നുണ്ടെങ്കിലും പൈപ്പ് പൊട്ടി വെള്ളം പാഴാകുന്നതിനെതിരെ പ്രതികരിക്കാന്‍ ആരും ഉണ്ടാകാറില്ലെന്ന് കുളി സമരത്തിന് നേതൃത്വം നല്‍കിയ ബുര്‍ഹാന്‍ തളങ്കരയും അമീന്‍ അടുക്കത്ത് ബയലും പറഞ്ഞു.