NA Nellikunnu | 'എന്ത് ആവശ്യപ്പെട്ടാലും ഈ ചെറുപ്പക്കാരന് നോ പറയാന്‍ അറിയുമായിരുന്നില്ല, ഈ നഷ്ടവും ദുഃഖവും താങ്ങാവുന്നതില്‍ ഏറെ'; അഡീഷണല്‍ പി എ മനുവിന്റെ വിയോഗത്തില്‍ വൈകാരിക കുറിപ്പുമായി എന്‍ എ നെല്ലിക്കുന്ന് എംഎല്‍എ

കാസര്‍കോട്: (www.kasargodvartha.com) 10 വര്‍ഷത്തോളമായി തന്റെ അഡീഷണല്‍ പി എ ആയ ടി മനുവിന്റെ വിയോഗത്തില്‍ വൈകാരിക കുറിപ്പുമായി എന്‍ എ നെല്ലിക്കുന്ന് എംഎല്‍എ. കാസര്‍കോട്ട് നിന്നും തിരുവനന്തപുരത്ത് എത്തുന്ന തന്റെ മണ്ഡലത്തിലെയും മറ്റു മണ്ഡലങ്ങളിലെയും ആളുകള്‍ക്ക് ഒരു വ്യത്യാസവുമില്ലാതെ ആവശ്യമായ സേവനങ്ങള്‍ ചെയ്തു കൊടുക്കുന്നതില്‍ മനു കാണിച്ച താത്പര്യം എടുത്തു പറയേണ്ടതാണെന്ന് അദ്ദേഹം ഫേസ്ബുകില്‍ കുറിച്ചു. അസുഖത്തെ തുടര്‍ന്ന് ദീര്‍ഘനാളായി ചികിത്സയിലായിരുന്ന ടി മനു (32) വ്യാഴാഴ്ചയാണ് മരിച്ചത്. തിരുവനന്തപുരം ബാലരാമപുരം സ്വദേശിയാണ്.
      
തിരുവനന്തപുരമായി ബന്ധപ്പെടുന്ന കാസര്‍കോട്ടെ എല്ലാ പൊതുപ്രവര്‍ത്തകര്‍ക്കും മനുവിനെ അറിയാമെന്നും എംഎല്‍എ പറഞ്ഞു. അവര്‍ എന്ത് ആവശ്യപ്പെട്ടാലും ഈ ചെറുപ്പക്കാരന് നോ പറയാന്‍ അറിയുമായിരുന്നില്ല. എല്ലാവരെയും ഏത് നേരത്തും സഹായിക്കുമായിരുന്നു. മനു എന്റെ അഡിഷണല്‍ പി.എ ആയിരുന്നുവെങ്കിലും എല്ലാ എംഎല്‍എമാര്‍ക്കും അവനെ ഏറെ ഇഷ്ടമായിരുന്നു. ചില മന്ത്രിമാര്‍ പോലും മനുവിനെ വളരെ കണ്ട് ഇഷ്ടപ്പെട്ടിരുന്നു. ചില മന്ത്രിമാരെ ആവശ്യങ്ങള്‍ക്കായി സമീപിക്കുമ്പോള്‍ എന്നോട് അവര്‍ പറയാറുള്ളത് ഞാന്‍ വരേണ്ടതില്ലായിരുന്നു, നമ്മുടെ പയ്യനെ അയച്ചാല്‍ മതിയായിരുന്നു എന്നാണെന്നും എന്‍ എ നെല്ലിക്കുന്ന് എംഎല്‍എ കുറിച്ചു.