Found Dead | പുനർനിർമാണം നടക്കുന്ന കെട്ടിടത്തിനകത്ത് അജ്ഞാതനെ രക്തം ഛർദിച്ച് മരിച്ച നിലയിൽ കണ്ടെത്തി

കാസർകോട്: (www.kasargodvartha.com) ദേശീയപാത വികസനത്തിന്റെ ഭാഗമായി പൊളിച്ചുകെട്ടുന്ന കെട്ടിടത്തിനകത്ത് അജ്ഞാതനെ രക്തം ഛർദിച്ച് മരിച്ച നിലയിൽ കണ്ടെത്തി. കറന്തക്കാട് പെട്രോൾ പമ്പിന് സമീപത്തെ കെട്ടിടത്തിലാണ് 60 വയസിന് മുകളിൽ പ്രായം തോന്നിക്കുന്ന അജ്ഞാതനെ മരിച്ച നിലയിൽ കണ്ടെത്തിയത്. രക്തം ഛർദിച്ച് കമിഴ്ന്ന് കിടക്കുന്ന നിലയിലായിരുന്നു മൃതദേഹം. മുണ്ടും ചുവന്ന ടീ ഷർടുമായിരുന്നു വേഷം.

സമീപത്ത് നിന്ന് ഏതാനും മദ്യക്കുപ്പികളും കണ്ടെത്തിയിട്ടുണ്ട്. അമിതമായി മദ്യം കഴിച്ചതിനെ തുടർന്ന് രക്തം ഛർദിച്ച് മരിച്ചതാകാമെന്നാണ് പൊലീസിന്റെ പ്രാഥമിക നിഗമനം. മൃതദേഹത്തിൽ പരുക്കുകളോ അസ്വാഭാവികമായ മറ്റെന്തെങ്കിലുമോ കണ്ടെത്താൻ കഴിഞ്ഞിട്ടില്ലെന്ന് കാസർകോട് ടൗൺ ഇൻസ്‌പെക്ടർ പി അജിത് കുമാർ കാസർകോട് വാർത്തയോട് പറഞ്ഞു.

തിങ്കളാഴ്ച രാവിലെയാണ് സമീപവാസികൾ വിവരം നൽകിയതിന്റെ അടിസ്ഥാനത്തിൽ പൊലീസ് സ്ഥലത്തെത്തിയത്. മൃതദേഹം ഇൻക്വസ്റ്റ് നടപടികൾ പൂർത്തിയാക്കി പോസ്റ്റ് മോർടത്തിനായി കാസർകോട് ജെനറൽ ആശുപത്രി മോർചറിയിലേക്ക് മാറ്റി. മരിച്ചയാളെ തിരിച്ചറിയാൻ കഴിയുന്ന ഒന്നും കണ്ടെത്താൻ കഴിഞ്ഞിട്ടില്ലെന്ന് പൊലീസ് വ്യക്തമാക്കി.

Keywords: News, Kasaragod, Kerala, Karandakkad, Obituary, Found Dead, Police, Dead Body, Postmortem, Dead body of unidentified man found.
< !- START disable copy paste -->