Jifri Thangal | മസ്‌ജിദ്‌ പരിപാലനത്തിൽ സൂക്ഷ്മത പ്രധാനമെന്ന് ജിഫ്രി മുത്തുക്കോയ തങ്ങൾ; 'ചിന്തയിലും, വാക്കിലും, പ്രവൃത്തിയിലും ദോഷങ്ങൾ കലരാതെ നോക്കണം'

മൊഗ്രാൽ: (www.kasargodvartha.com) നാടിന് വെളിച്ചമേകുന്ന മത സിരാ കേന്ദ്രങ്ങളായ മസ്ജിദുകളുടെ പരിപാലനം പുണ്യകർമങ്ങളാണെന്നും, അവ പരിപാലിക്കുമ്പോൾ സൂക്ഷ്മത കാത്തുസൂക്ഷിക്കണമെന്നും സമസ്ത കേരള ജംഇയ്യതുൽ ഉലമ സംസ്ഥാന അധ്യക്ഷൻ ജിഫ്രി മുത്തുക്കോയ തങ്ങൾ പറഞ്ഞു. മൊഗ്രാലിലെ ഹൃദയഭാഗത്ത് പുതുക്കിപ്പണിത ശാഫി ജുമാ മസ്ജിദ് പ്രാർഥനയ്ക്കായി തുറന്നുകൊടുത്ത് സംസാരിക്കുകയായിരുന്നു അദ്ദേഹം.
  
ജീവിത വിശുദ്ധിയിലേക്കുള്ള സമ്പൂർണ യാത്രയാണ് പള്ളികൾ. തന്റെതെല്ലാം പ്രപഞ്ചനാഥനായ അല്ലാഹുവിനുള്ളതാകുന്നു എന്ന പ്രഖ്യാപനമാണിത്. അതുകൊണ്ട് തന്നെ ചിന്തയിലും, വാക്കിലും, പ്രവൃത്തിയിലും ദോഷങ്ങൾ കലരാതെ സൂക്ഷ്മത പാലിച്ച് കൊണ്ടാകണം പള്ളികളിൽ പ്രാർഥന നടത്തേണ്ടതും, പരിപാലിക്കേണ്ടതെന്നും ജിഫ്രി മുത്തുക്കോയ തങ്ങൾ പറഞ്ഞു. മഗ്‌രിബ് നിസ്കാരത്തിന് നേതൃത്വം നൽകി കൊണ്ടാണ് ജിഫ്രി മുത്തുകോയ തങ്ങൾ ജുമാമസ്ജിദ് തുറന്നുകൊടുത്തത്.