പ്രാദേശിക തനിമയുള്ള ഉത്സവങ്ങളും ഉൽപന്നങ്ങളും കൂട്ടിയിണക്കി ഉത്തരവാദിത്ത ടൂറിസം മിഷൻ പാകേജുകളും ഉൽപന്ന വിപണന ശൃംഖലയും ആരംഭിക്കുന്നു

കാസർകോട്: (www.kasargodvartha.com 18.01.2022) അനുഭവവേദ്യ വിനോദ സഞ്ചാരത്തിന് പ്രാധാന്യം നൽകിക്കൊണ്ട് സംസ്ഥാന ഉത്തരവാദിത്ത ടൂറിസം മിഷൻ പുതിയ പാകേജുകളും ഉത്പന്ന വിപണന ശൃംഖലയും ആരംഭിക്കുന്നു. കോവിഡാനന്തര ടൂറിസത്തിന്റെയും ന്യൂ നോർമൽ ടൂറിസത്തിന്റെയും സാധ്യതകൾ പരമാവധി ഉപയോഗപ്പെടുത്തുന്നതിന് ലക്ഷ്യമാക്കിയാണ് ഈ പദ്ധതി രൂപപ്പെടുത്തുന്നത്.
                  
പ്രാദേശിക തനിമയുള്ള ഉത്പന്നങ്ങൾ (ഉദാ: ആറന്മുള കണ്ണാടി, പയ്യന്നൂർ പവിത്രമോതിരം ), കാർഷിക വിളകൾ (ഉദാ: ഞവര, ജീരകശാല, ഗന്ധകശാല), ഭക്ഷ്യവിഭവങ്ങൾ (ഉദാ: രാമശ്ശേരി ഇഡലി, മറയൂർ ശർക്കര), പ്രത്യേകതയുള്ള ഉത്സവങ്ങൾ (ഉദാ: ആറ്റ് വേല, കെട്ട് കാഴ്ചകൾ) എന്നിവ കോർത്തിണക്കിയുള്ള ടൂർ പാകേജുകളും ഉത്പന്ന വിപണന ശൃംഖലയും ഉത്തരവാദിത്ത ടൂറിസം മിഷൻ തയ്യാറാക്കി തദ്ദേശീയ - വിദേശ വിനോദ സഞ്ചാരികൾക്ക് അനുഭവവേദ്യമാക്കുകയാണ് പദ്ധതിയുടെ ലക്ഷ്യം.