തിരുപ്പിറവിയുടെ ഓര്‍മ പുതുക്കി നാടെങ്ങും ക്രിസ്മസ് ആഘോഷം

കാസർകോട്: (www.kasargodvartha.com 25.12.2021) ബത് ലഹേമിലെ തിരുപ്പിറവിയുടെ ഓര്‍മ പുതുക്കി നാടെങ്ങും ക്രിസ്മസ് ആഘോഷം. സ്‌നേഹത്തിന്റെയും സന്തോഷത്തിന്റെയും നന്മയുടെയും സന്ദേശം ലോകം മുഴുവന്‍ പകര്‍ന്നുനല്‍കിയ ദൈവപുത്രന്റെ പിറവി ദിനം ആഘോഷമാക്കുകയാണ് വിശ്വാസികള്‍.


ബത് ലഹേമിലെ കാലിത്തൊഴുത്തില്‍ കരുണയുടെയും ശാന്തിയുടെയും സന്ദേശവുമായി പിറന്നുവീണ വലിയ ഇടയന്റെ ഓര്‍മ പുതുക്കുകയാണ് നാടെങ്ങും. തിരുപ്പിറവി ശുശ്രൂഷകള്‍ക്കായി ആയിരക്കണക്കിന് വിശ്വാസികള്‍ ദേവാലയങ്ങളില്‍ ഒത്തുചേര്‍ന്നു. ദേവാലയങ്ങളില്‍ പാതിരാ കുര്‍ബാന അടക്കമുള്ള പ്രാർഥന ശുശ്രൂഷകള്‍ പുലർചെ വരെ നടന്നു.

വിവിധ ക്രൈസ്തവ സഭാ പുരോഹിതർ ദേവാലയങ്ങളില്‍ പ്രാർഥനകള്‍ക്ക് നേതൃത്വം നല്‍കി. നന്മയുടെയും സ്നേഹത്തിന്റെയും സന്ദേശം പങ്കുവെച്ച്‌ പ്രാർഥനയോടെയാണ് വിശ്വാസികള്‍ ദേവാലയങ്ങളില്‍ ഒത്തുകൂടിയത്. ദൈവപുത്രന്റെ തിരുപ്പിറവി ആഘോഷങ്ങളുടെ ഭാഗമായി ദേവാലയങ്ങളില്‍ പ്രത്യേക പാതിരാ കുര്‍ബാനകളും തിരുപ്പിറവി ചടങ്ങുകളുമാണ് നടന്നത്.
കോവിഡിൻ്റെയും ഒമിക്രോണ്‍ വ്യാപനത്തിന്റെയും പശ്ചാത്തലത്തില്‍ കൃത്യമായ മുന്നൊരുക്കങ്ങളുമായാണ് ദേവാലയങ്ങളില്‍ ശ്രശ്രൂഷകള്‍ നടന്നത്. വീടുകളിൽ വർണദീപങ്ങൾ കൊണ്ടലങ്കരിച്ച ക്രിസ്തുമസ് ട്രീ ഒരുക്കി വിശ്വാസികൾ ആഘോഷം ധന്യമാക്കി. ക്രിസ്മസ് കേക് മുറിച്ചും മധുരം വിളമ്പിയും ഇഷ്ട ഭക്ഷണങ്ങൾ ഉണ്ടാക്കിയും ആഘോഷം ഗംഭീരമാക്കി.

Keywords:  Kerala, News, Kasaragod, Top-Headlines, World, Christmas Celebration, Food, Cake, Covid, Religion, World celebrates Christmas.