മഞ്ചേശ്വരം മണ്ഡലത്തിലെ ആരോഗ്യരംഗത്തെ അപര്യാപ്തതകൾക്കും അസൗകര്യങ്ങൾക്കും പരിഹാരം തേടി എ കെ എം അശ്‌റഫ് എംഎൽഎ മന്ത്രി വീണാ ജോർജിനെ കണ്ടു

തിരുവനന്തപുരം: (www.kasargodvartha.com 28.05.2021) മഞ്ചേശ്വരം മണ്ഡലത്തിലെ ആരോഗ്യമേഖലയിൽ നേരിടുന്ന അപര്യാപ്തതകൾക്കും അസൗകര്യങ്ങൾക്കും പരിഹാരമാവശ്യപ്പെട്ട് എ കെ എം അശ്‌റഫ് എംഎൽഎ ആരോഗ്യ വകുപ്പ് മന്ത്രി വീണാ ജോർജിനെ സന്ദർശിച്ച് നിവേദനം നൽകി. എൻ എ നെല്ലിക്കുന്ന് എം എൽ എയും കൂടെ ഉണ്ടായിരുന്നു.

മംഗൽപാടി താലൂക് ആശുപത്രി, മഞ്ചേശ്വരം, കുമ്പള സി എച് സികൾ എന്നിവയുടെ സൗകര്യങ്ങളും തസ്തികകളും വർധിപ്പിക്കുന്നതിനും നിലവിലുള്ള ഒഴിവുകളിൽ അടിയന്തിര നിയമനം നടത്തുന്നതിനും നടപടി സ്വീകരിക്കണമെന്നും ഇവയുടെ അടിസ്ഥാനവും ഭൗതികവുമായ വികസനങ്ങൾക്ക് വേണ്ടി പ്രത്യേക പദ്ധതികൾ ആവിഷ്കരിക്കണമെന്നും എംഎൽഎ ആവശ്യപ്പെട്ടു. ഉക്കിനടുക്കയിലെ മെഡികൽ കോളജിന്റെ വികസന കാര്യവും കൂടിക്കാഴ്ചയിൽ സംസാരിച്ചു.