മദ്യ നിരോധനം ആവശ്യപ്പെട്ട് എസ്.എസ്.എഫ്. ബിവറേജസ് ഔട്ട്‌ലറ്റുകള്‍ ഉപരോധിച്ചു
Dec 31, 2012, 19:56 IST
കാസര്‍കോട്: കേരളത്തില്‍ സമ്പൂര്‍ണ മദ്യ നിരോധനം നടപ്പിലാക്കണമെന്നാവശ്യപ്പെട്ട് എസ്.എസ്.എഫ്. സംസ്ഥാന വ്യാപകമായി ബിവറേജസ് ഔട്ട്‌ലറ്റുകള്‍ ഉപരോധിച്ചു. കാസര്‍കോട് പുതിയ ബസ്സ്റ്റാന്‍ഡ് പരിസരത്ത് നിന്ന് പ്രകടനമായെത്തിയ എസ്.എസ്.എഫ്. പവര്‍ത്തകര്‍ ഐ.സി. ഭണ്ഡാരി റോഡിലെ ഔട്ട് ലെറ്റിലെ വില്‍പന തടഞ്ഞു.
മദ്യ ഉപയോഗത്തിന്റെ പ്രത്യാഘാതങ്ങള്‍ വിളിച്ചോതുന്നതായിരുന്നു ഉപരോധത്തിന് മുന്നോടിയായി നടന്ന പ്രകടനം. യുവ തലമുറയില്‍ വര്‍ധിച്ച് വരുന്ന മദ്യ ഉപയോഗം കുറക്കുവാന്‍ ശക്തമായ ബോധവല്‍ക്കരണ പ്രവര്‍ത്തനങ്ങളുടെ തുടക്കമായാണ് സമരം. മദ്യ നിരോധനം നടപ്പിലാക്കും വരെ ശക്തമായ സമര പരിപാടികള്‍ തുടരുമെന്ന് എസ്.എസ്.എഫ്. നേതാക്കള്‍ അറിയിച്ചു.
റവന്യു വരുമാനത്തിന്റെ പേരില്‍ മദ്യ ഉപയോഗം സര്‍ക്കാര്‍ പ്രോത്സാഹിപ്പിക്കുകയാണെന്ന് സമരം ഉദ്ഘാടനം ചെയ്ത് എസ്.എസ്.എഫ്. സംസ്ഥാന അസി. പ്രസിഡന്റ് മൂസ സഖാഫി കളത്തൂര്‍ അഭിപ്രായപ്പെട്ടു. മലയാളിയെ മദ്യത്തില്‍ മുക്കിക്കൊല്ലുന്ന നയം സര്‍ക്കാര്‍ അവസാനിപ്പിക്കണം. റവന്യു വരുമാനത്തിന്റെ പതിന്മടങ്ങ് പ്രത്യാഘാതങ്ങളാണ് സര്‍ക്കാര്‍ കണ്ടില്ലെന്ന് നടിക്കുന്നത്. വര്‍ധിച്ച് വരുന്ന വാഹന അപകടങ്ങളുടേയും കുറ്റകൃത്യങ്ങളുടേയും പ്രധാന ഹേതു മദ്യമാണ് -അദ്ദേഹം ചൂണ്ടിക്കാട്ടി.
യോഗത്തില്‍ ജില്ലാ പ്രസിഡന്റ് അബ്ദുര്‍ റസാഖ് സഖാഫി അധ്യക്ഷത വഹിച്ചു. എസ്.വൈ.എസ്. നേതാക്കളായ പള്ളങ്കോട് അബ്ദുല്‍ ഖാദര്‍ മദനി, സുലൈമാന്‍ കരിവെള്ളൂര്‍, അഷ്‌റഫ് കരിപ്പോടി, ഹസ്ബുല്ലാഹ് തളങ്കര പ്രസംഗിച്ചു.
സുന്നീ സെന്റര്‍ പരിസരത്ത് നിന്നാരംഭിച്ച പ്രകടനത്തിന് ജില്ലാ നേതാക്കളായ അബ്ദുര്‍ റസാഖ് സഖാഫി കോട്ടക്കുന്ന്, റഫീഖ് സഖാഫി ചേടിക്കുണ്ട്, അബ്ദുര്‍ റഹീം സഖാഫി ചിപ്പാര്‍, സിദ്ദീഖ് പൂത്തപ്പലം, ഫാറൂഖ് കുബണൂര്‍, ജമാലുദ്ദീന്‍ സഖാഫി ആദൂര്‍ നേതൃത്വം നല്‍കി. ജാഫര്‍ സി.എന്‍. സ്വാഗതം പറഞ്ഞു.
Keywords: Kasaragod, SSF, Kerala, Busstand, Liqour, Protest, Outlet, SSF Protest against liquor sale
Tags
Share this story
