വനത്തില്‍ ദുരൂഹസാഹര്യത്തില്‍ മനുഷ്യന്റെ തുടയെല്ല്; പോലീസ് അന്വേഷണം ആരംഭിച്ചു

അഡൂര്‍: (www.kasargodvartha.com 18.05.2019) വനത്തില്‍ ദുരൂഹസാഹര്യത്തില്‍ മനുഷ്യന്റെ തുടയെല്ല് കണ്ടെത്തി. അഡൂര്‍ നൂജിബെട്ടുവില്‍ വനംവകുപ്പിന്റെ തേക്കിന്‍ തോട്ടത്തിന്റെ അരികിലായാണ് വെള്ളിയാഴ്ച ഉച്ചയ്ക്ക് മനുഷ്യ അസ്ഥി കണ്ടെത്തിയത്. കാട്ടിലേക്ക് തേന്‍ ശേഖരിക്കാന്‍ പോയ ആദിവാസി യുവാവാണ് കരിയിലകള്‍ക്കിടയില്‍ അസ്ഥി കിടക്കുന്നത് ആദ്യം കണ്ടത്.

വിവരമറിയിച്ചതിന്റെ അടിസ്ഥാനത്തില്‍ ആദൂര്‍ സി ഐ എ വി ജോണ്‍, എസ് ഐ പി നളിനാക്ഷന്‍, സെക്ഷന്‍ ഫോറസ്റ്റ് ഓഫീസര്‍ എന്‍ വി സത്യന്‍ എന്നിവരുടെ നേതൃത്വത്തില്‍ സ്ഥലത്തെത്തി പരിശോധന നടത്തി. അസ്ഥിക്ക് ഒരു വര്‍ഷത്തിലേറെ പഴക്കമുണ്ടെന്നാണ് നിഗമനം. ഇതിന്റെ അരകിലോമീറ്റര്‍ അകലെ നിന്ന് ഒരു ഷര്‍ട്ടിന്റെ കഷണവും കണ്ടെത്തിയിട്ടുണ്ട്.

ഡോഗ് സ്‌ക്വാഡും പരിശോധനയ്‌ക്കെത്തി. ഒരു വര്‍ഷം മുമ്പ് നൂജിബെട്ടുവില്‍ നിന്നും കാണാതായയാളുടേതായിരിക്കുമോ തുടയെല്ല് എന്ന സംശയത്തിലാണ് പോലീസിപ്പോള്‍. ഡിഎന്‍എ പരിശോധനയ്ക്കായി തുടയെല്ല് പരിയാരം മെഡിക്കല്‍ കോളജിലേക്ക് മാറ്റി. സംഭവത്തില്‍ പോലീസ് അന്വേഷണം ആരംഭിച്ചിട്ടുണ്ട്.