അഞ്ച് ലക്ഷം കോടി രൂപയുടെ വികസനപ്രവര്‍ത്തനങ്ങള്‍ നടപ്പാക്കും: മന്ത്രി ജി സുധാകരന്‍

കാസര്‍കോട്: (www.kasargodvartha.com 24.11.2017) സംസ്ഥാന സര്‍ക്കാര്‍ കാലാവധി പൂര്‍ത്തിയാകുമ്പോള്‍ സംസ്ഥാനത്താകെ അഞ്ച് ലക്ഷം കോടി രൂപയുടെ വികസനപ്രവര്‍ത്തനങ്ങള്‍ക്ക് തുക അനുവദിക്കുമെന്ന് പൊതുമരാമത്ത് വകുപ്പ് മന്ത്രി ജി സുധാകരന്‍ പറഞ്ഞു. 18 മാസത്തിനിടെ അവതരിപ്പിച്ച രണ്ടു ബജറ്റുകളിലായി അനുവദിക്കപ്പെട്ട 75,000 കോടി രൂപയുടെ വികസനപ്രവര്‍ത്തനങ്ങളാണ് ഇപ്പോള്‍ നടന്നുകൊണ്ടിരിക്കുന്നതെന്നും പൊതുമരാമത്ത് വകുപ്പുമാത്രം 25,000 കോടിയുടെ നിര്‍മ്മാണ പ്രവര്‍ത്തനങ്ങളാണ് നടത്തിക്കൊണ്ടിരിക്കുന്നതെന്നും മന്ത്രി പറഞ്ഞു.

കാസര്‍കോട് ദേലംപാടിയില്‍ പളളത്തൂര്‍ പാലത്തിന്റെയും പളളത്തൂര്‍ - അഡൂര്‍ പാണ്ടി റോഡിന്റെയും പ്രവൃത്തി ഉദ്ഘാടനം നിര്‍വ്വഹിച്ചു സംസാരിക്കുകയായിരുന്നു മന്ത്രി. അടിസ്ഥാന സൗകര്യ വികസന പദ്ധതി വഴി പൊതുഖജനാവില്‍ നിന്നും പണമെടുക്കാതെ മറ്റ് ധനകാര്യസ്ഥാപനങ്ങളില്‍ നിന്ന് വായ്പയെടുത്താണ് വന്‍കിടവികസന പ്രവര്‍ത്തനങ്ങള്‍ക്ക് ഫണ്ട് കണ്ടെത്തുന്നത്. ഗ്രാമനഗര വ്യത്യാസമില്ലാതെ സമഗ്രമായ വികസനമാണ് സര്‍ക്കാറിന്റെ ലക്ഷ്യം.