കൊച്ചിയിലെ നാസാപഠനസംഘത്തില്‍ മേല്‍പറമ്പിലെ ജുമാനയും

Jumana Fathima

പത്താം ക്ലാസുവരെ ഷാര്‍ജയില്‍ പഠിച്ച ജുമാന കഴിഞ്ഞ വര്‍ഷമാണ് തിരുവാണിയൂര്‍ ഗ്ലോബല്‍ സ്‌കൂളില്‍ പ്ലസ് വണ്ണിന് ചേര്‍ന്നത്. പഠനത്തിനും കായിക മത്സരങ്ങളിലും മിടുക്കിയായ ജുമാനയ്ക്ക് നാസയെ കുറിച്ച് പഠിക്കാനുള്ള സംഘത്തില്‍ ഉള്‍പെടാന്‍ കഴിഞ്ഞത് വലിയ സന്തോഷം പകരുന്നു. അതേ സ്‌കൂളില്‍ മൂന്നാം ക്ലാസില്‍ പഠിക്കുന്ന ലിയാനയ്ക്കും ചേച്ചിയുടെ ആകാശ യാത്ര സന്തോഷം നല്‍കുന്നു.

തിരുവാണിയൂര്‍ ഗ്ലോബല്‍ പബ്ലിക് സ്‌കൂളിലെ 25 വിദ്യാര്‍ത്ഥികളും രണ്ട് അധ്യാപകരും ട്രാവല്‍ ഏജന്‍സിയിലെ രണ്ട് ഗൈഡുകളും അടങ്ങുന്ന സംഘം ബുധനാഴ്ച പുലര്‍ചെ നാല് മണിക്ക് ഖത്തര്‍ എയര്‍വേയ്‌സില്‍ നെടുമ്പാശേരി വിമാനത്താവളത്തില്‍ നിന്നാണ് അമേരിക്കയിലേക്ക് പറന്നത്. ബുധനാഴ്ച രാത്രി ഇന്ത്യന്‍ സമയം എട്ടു മണിയോടെ സംഘം ന്യൂയോര്‍ക്ക് വിമാനത്താവളത്തില്‍ ഇറങ്ങും. ഏപ്രില്‍ 13നാണ് ഇവരുടെ നാട്ടിലേക്കുള്ള മടക്കയാത്ര.

സ്‌കൂളിലെ എട്ടു മുതല്‍ പ്ലസ് വണ്‍ വരെയുള്ള ക്ലാസുകളിലെ കുട്ടികളാണ് ലോക രഹസ്യങ്ങളുടെ വാതില്‍ തുറന്നുകാണാനായി അമേരിക്കയിലേക്ക് പറന്നത്. വിദ്യാര്‍ത്ഥികളില്‍ സ്‌പേസ് സയന്‍സില്‍ കൂടുതല്‍ അഭിരുചി വളര്‍ത്താനും വിഷയത്തില്‍ കൂടുതല്‍ അവഗാഹം ഉണ്ടാക്കാനുമാണ് ഈ യാത്ര.