Collectorate march | കാട്ടാനശല്യം: അധികൃതരുടെ അനാസ്ഥയ്‌ക്കെതിരെ ആനക്കാര്യം കൂട്ടായ്മയുടെ കലക്ടറേറ്റ് മാർച് ചൊവ്വാഴ്ച

കാസർകോട്: (www.kasargodvartha.com) കാട്ടാനശല്യത്തിൽ അധികൃതരുടെ അനാസ്ഥയ്‌ക്കെതിരെ ആനക്കാര്യം കർഷക കൂട്ടായ്മയുടെ കലക്ടറേറ്റ് മാർച് ഓഗസ്റ്റ് 23-ന് രാവിലെ 10ന് നടക്കുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു. മുളിയാർ, കാറഡുക്ക, കുറ്റിക്കോൽ , ദേലംപാടി, ബേടഡുക്ക പഞ്ചായതുകളിലെ വിവിധ പ്രദേശങ്ങളിൽ രൂക്ഷമായ കാട്ടാന ശല്യം കാരണം നിരാലമ്പരായ കർഷകർക്ക് എല്ലാം ഉപേക്ഷിച്ച് പാലായനം ചെയ്യേണ്ടതോ ആത്മഹത്യ ചെയ്യേണ്ടതോ ആയ അതീവ ഗുരുതരമായ സാഹചര്യമാണ് നിലവിലുള്ളത്.
   
അധികൃതരുടെ അനാസ്ഥയ്‌ക്കെതിരെ പല തരത്തിലുള്ള പ്രക്ഷോഭ പരിപാടികൾ നടത്തിയെങ്കിലും അധികൃതരുടെ ഭാഗത്ത് നിന്നും ആനകളെ തുരത്തുന്നതുമായി ബന്ധപ്പെട്ട് അനുകൂലമായ സമീപനങ്ങളൊന്നും ഉണ്ടായില്ല. ഈ സ്ഥിതി തുടർന്നു പോയാൽ കൃഷി മാത്രമല്ല, ജീവൻ തന്നെ നഷ്ടമാകുന്ന ഭീതിതമായ അവസ്ഥയിലേക്ക് കാര്യങ്ങൾ എത്തും.