കേരള ബ്ലാസ്‌റ്റേഴ്‌സ് ജൂനിയര്‍ താരങ്ങള്‍ അണ്ടര്‍ 16 ദേശീയ ഫുട്‌ബോള്‍ ക്യാമ്പിലേക്ക്; തിരഞ്ഞെടുക്കപ്പെട്ടത് കാസര്‍കോട് സ്വദേശിയുള്‍പെടെ രണ്ടു പേര്‍

കൊച്ചി: (www.kasargodvartha.com 24.06.2019) കേരള ബ്ലാസ്‌റ്റേഴ്‌സ് ജൂനിയര്‍ താരങ്ങളായ രണ്ടു പേര്‍ അണ്ടര്‍ 16 ദേശീയ ഫുട്‌ബോള്‍ ക്യാമ്പിലേക്ക് തിരഞ്ഞെടുക്കപ്പെട്ടു. കാസര്‍കോട് സ്വദേശി ആദില്‍ അബ്ദുല്ല, തൃശൂര്‍ സ്വദേശി വിബിന്‍ മോഹന്‍ എന്നിവരാണ് തിരഞ്ഞെടുക്കപ്പെട്ടത്. ഭുവനേശ്വറിലാണ് ക്യാമ്പ് നടക്കുക. ഏപ്രിലില്‍ കേരളത്തില്‍ നടന്ന സെലക്ഷന്‍ ട്രയലിലും, മേയ് മാസം കൊല്‍ക്കത്തയില്‍ നടന്ന ഹീറോ ജൂനിയര്‍ ലീഗിലും നടത്തിയ മികച്ച പ്രകടനമാണ് ഇരുവരെയും ഇന്ത്യന്‍ ക്യാമ്പില്‍ എത്തിച്ചത്.

വിബിനും, ആദിലും മികച്ച സാങ്കേതിക മികവും, ഒത്തിണക്കവും ഉള്ള കളിക്കാരാണെന്നും അവര്‍ അണ്ടര്‍ 16 ഇന്ത്യന്‍ ടീമിലെത്തുമെന്നാണ്  കരുതുന്നതെന്നും കേരള ബ്ലാസ്റ്റേഴ്‌സിന്റെ അണ്ടര്‍ 15 ടീം പരിശീലകനായ ഷമീല്‍ ചെമ്പകത്തില്‍ പറഞ്ഞു.