കുട്ടി ഡ്രൈവിംഗ് വേണ്ട! നടപടി കര്‍ശനമാക്കി പോലീസ്, മകന് ബൈക്കോടിക്കാന്‍ നല്‍കിയതിന് പിതാവിനെതിരെ കേസ്

കാസര്‍കോട്: (www.kasargodvartha.com 05.12.2018) പ്രായപൂര്‍ത്തിയാകാത്ത കുട്ടികള്‍ വാഹനമോടിക്കുന്നതിനെതിരെ നടപടി കര്‍ശനമാക്കി പോലീസ്. മകന് ബൈക്കോടിക്കാന്‍ നല്‍കിയതിന് പിതാവിനെതിരെ പോലീസ് കേസെടുത്തു. ചൊവ്വാഴ്ച വൈകിട്ട് 5.30 മണിയോടെ പരവനടുക്കത്ത് നടത്തിയ പരിശോധനയില്‍ പ്രായപൂര്‍ത്തിയാകാത്ത കുട്ടി ഓടിച്ച ബൈക്ക് പോലീസ് പിടികൂടി.

കെ എല്‍ 14 ക്യു 8701 നമ്പര്‍ ബൈക്കാണ് പോലീസ് കസ്റ്റഡിയിലെടുത്തത്. തുടര്‍ന്ന് കുട്ടിയുടെ പിതാവ് ചെമ്മനാട് കുന്നുമ്മല്‍ ഹൗസില്‍ കൊട്ടന്റെ മകന്‍ നാരായണനെതിരെ കാസര്‍കോട് ടൗണ്‍ പോലീസ് കേസെടുത്തു. കുട്ടികള്‍ ബൈക്കില്‍ പറപറക്കാന്‍ അനുവദിക്കില്ലെന്നും ലൈസന്‍സില്ലാതെ ഹെല്‍മറ്റ് ധരിക്കാതെയും ഇരുചക്രവാഹനങ്ങള്‍ ഓടിക്കുന്നവരെയും പിടികൂടാന്‍ വരുംദിവസങ്ങളില്‍ പോലീസ് പരിശോധന വ്യാപിപ്പിക്കുമെന്നും പോലീസ് അറിയിച്ചു.