Holi Colors | കണ്ണിനെയും ശ്വാസകോശത്തെയും അടക്കം ഗര്‍ഭസ്ഥ ശിശുവിനെവരെ ബാധിക്കുന്നു; ഹോളി നിറങ്ങള്‍ ഉപയോഗിക്കുമ്പോള്‍ ഉണ്ടാകുന്ന ആരോഗ്യപ്രശ്‌നങ്ങള്‍ അറിഞ്ഞിരിക്കാം!

കൊച്ചി: (KasargodVartha) നിറങ്ങളുടെ ഉത്സവമെന്നും വസന്തോത്സവമെന്നും വിശേഷിപ്പിക്കുന്ന ഹോളി വസന്തകാലത്തെ എതിരേല്‍ക്കാന്‍ ഹിന്ദുക്കള്‍ ആഘോഷിക്കുന്ന ഉത്സവമാണ്. ഉത്തരേന്‍ഡ്യയിലാണ് പ്രധാനമായും ഹോളി ആഘോഷിച്ചുവരുന്നതെങ്കിലും ഇപ്പോള്‍ ദക്ഷിണേന്‍ഡ്യയിലും ആഘോഷിക്കുന്നുണ്ട്.

മാര്‍വാടികളും പഞ്ചാബികളും ഗുജറാതികളുമാണ് ഹോളി ആഘോഷത്തിന് മുന്‍പന്തിയില്‍ നില്‍ക്കുന്നവരെങ്കിലും മുംബൈ, ഡെല്‍ഹി പോലുള്ള നഗരങ്ങളില്‍ ഹോളി ആഘോഷിക്കാത്തവര്‍ തന്നെ ചുരുക്കമാണെന്ന് പറയാം. പരസ്പരം നിറം പുരട്ടുമ്പോള്‍ ശത്രുത അകലുമെന്ന വിശ്വാസമുള്ളതിനാല്‍ ജാതി മതഭേദമന്യേ ജനങ്ങള്‍ ഹോളി ആഘോഷങ്ങളില്‍ പങ്കുചേരുന്നു.

എന്നാല്‍ ഹോളിയ്ക്കുവേണ്ടി സന്തോഷം പ്രകടിപ്പിക്കാന്‍ നിറങ്ങള്‍ ഉപയോഗിക്കുമ്പോള്‍ ഉണ്ടാകുന്ന ആരോഗ്യപ്രശ്‌നങ്ങള്‍ തീര്‍ച്ചയായും അറിഞ്ഞിരിക്കേണ്ടതാണ്. അതിനാല്‍ ചര്‍മത്തിലും മുടിയിലും അടക്കം ശാരീരികമായും ഹോളി നിറങ്ങള്‍ നാശമുണ്ടാക്കുമെന്ന വസ്തുതയും നിസ്സാരമാക്കി തള്ളി കളയരുത്.

ഗര്‍ഭസ്ഥ ശിശുവിനെ ബാധിക്കുന്നു: ഹോളി നിറങ്ങളില്‍ മെര്‍കുറി അടങ്ങിയിട്ടുള്ളതിനാല്‍ ഇത് വൃക്കകള്‍, കരള്‍, ഗര്‍ഭസ്ഥ ശിശുക്കളുടെ ആരോഗ്യം തുടങ്ങിയ ആന്തരിക അവയവങ്ങളെ ബാധിക്കും.

കണ്ണിനെ ബാധിക്കാം: മെര്‍കുറി, ആസ്ബറ്റോസ്, സിലിക്ക, മൈക, ലെഡ് തുടങ്ങിയ രാസവസ്തുക്കള്‍ കൊണ്ടാണ് ഹോളി നിറങ്ങള്‍ നിര്‍മിച്ചിരിക്കുന്നത്. സിന്തറ്റിക് കെമികല്‍ നിറങ്ങള്‍ കാഴ്ചയെ പ്രതികൂലമായി ബാധിച്ചേക്കാമെന്ന് വിദഗ്ധര്‍ പറയുന്നു. കണ്ണുകളെ ശരിയായി പരിപാലിക്കാത്തത് അണുബാധ, അലര്‍ജി, കോര്‍ണിയല്‍ അബ്രേഷന്‍ കണ്‍ജങ്ക്റ്റിവിറ്റിസ്, കണ്ണിന് പരുക്കുകള്‍ തുടങ്ങിയ പ്രശ്‌നങ്ങള്‍ക്ക് കാരണമാകുമെന്നും വിദഗ്ധര്‍ ചൂണ്ടിക്കാട്ടുന്നു.