Obituary | നട്ടുച്ചക്ക് റോഡരികിലൂടെ നടന്നുവരികയായിരുന്ന മധ്യവയസ്‌കന്‍ കുഴഞ്ഞുവീണ് മരിച്ചു; ആളെ തിരിച്ചറിഞ്ഞില്ല

കാസര്‍കോട്: (KasargodVartha) നട്ടുച്ചക്ക് റോഡരികിലൂടെ നടന്നുവരികയായിരുന്ന മധ്യവയസ്‌കന്‍ കുഴഞ്ഞുവീണ് മരിച്ചു. മരിച്ചയാളെ തിരിച്ചറിഞ്ഞില്ല. ബുധനാഴ്ച ഉച്ചയ്ക്ക് 1.10 മണിയോടെ നുള്ളിപ്പാടിയിലെ റോഡരികിലൂടെ  നടന്നുപോകുന്നതിനിടയിലാണ് കുഴഞ്ഞുവീണത്.

പ്രദേശവാസികള്‍ വിവരമറിയിച്ചതിന്റെ അടിസ്ഥാനത്തില്‍ 108 ആംബുലന്‍സ് എത്തി ഇയാളെ കാസര്‍കോട് ജെനറല്‍ ആശുപത്രിയിലെ തീവ്രപരിചരണ വിഭാഗത്തില്‍ പ്രവേശിപ്പിച്ചെങ്കിലും വൈകാതെ മരണം സംഭവിച്ചു. ഇയാളുടെ കീശയിൽ നിന്നും പാരസെറ്റമോള്‍ ഗുളിക കണ്ടെത്തിയിട്ടുണ്ട്.

ഏതെങ്കിലും അസുഖത്തിന് ചികിത്സയ്ക്ക് വന്നതാണോയെന്നാണ് സംശയിക്കുന്നത്.  സൂര്യാഘാതമൊന്നുമല്ല മരണകാരണമെന്നാണ് ആശുപത്രി അധികൃതര്‍ പറയുന്നത്. മരിച്ചയാള്‍ക്ക് ഹൃദയ സംബന്ധമായ അസുഖമുണ്ടോയെന്ന് സംശയം ഉയര്‍ന്നിട്ടുണ്ട്. ഇദ്ദേഹത്തെകുറിച്ച് വിവരമറിയുന്നവര്‍ ജെനറല്‍ ആശുപത്രിയുമായി ബന്ധപ്പെടണം.