Hair Grow | മുടി കൊഴിച്ചിലിന് ശേഷം സ്വാഭാവികമായി മുടി വളരാൻ 4 ഭക്ഷണങ്ങൾ

ന്യൂഡെൽഹി: (KasargodVartha) നീണ്ടതും കരുത്തുള്ളതുമായ മുടി ആഗ്രഹിക്കാത്തവർ ആരുണ്ട്? മുടി കൊഴിച്ചിൽ പലരെയും അലട്ടുന്ന ഒരു സാധാരണ പ്രശ്നമാണ്. ജീവിതശൈലി, ഹോർമോൺ വ്യതിയാനങ്ങൾ, പോഷകാഹാരക്കുറവ് എന്നിവയെല്ലാം മുടി കൊഴിച്ചിലിന് കാരണങ്ങളാകാം.  മുടി വളർച്ചയ്ക്ക് സഹായിക്കുന്ന പ്രകൃതിദത്ത മാർഗങ്ങളും ഭക്ഷണക്രമവും തേടുന്നവർ ഏറെയാണ്. മുടി കൊഴിച്ചിലിന് ശേഷം സ്വാഭാവികമായി മുടി വളരാൻ ഭക്ഷണത്തിൽ ഏറെ ശ്രദ്ധവേണം. മുടി കൊഴിച്ചിൽ കുറയ്ക്കാനും മുടി വളർച്ചയ്ക്കും സഹായിക്കുന്ന നാല് പ്രധാന ഭക്ഷണങ്ങളെക്കുറിച്ച് അറിയാം.

1. കൊഴുപ്പുള്ള മീനുകൾ 

സാൽമൺ (Salmon), അയല, ചെറുമീൻ പോലുള്ള കൊഴുപ്പുള്ള മീനുകൾ ഒമേഗ-3 ഫാറ്റി ആസിഡുകളും പ്രോട്ടീനും ധാരാളം അടങ്ങിയ സൂപ്പർഫുഡ് ആണ്.  ഇവ  മുടിക്കും തലയോട്ടിക്കും ആരോഗ്യം നൽകുന്നു.  ഒമേഗ-3 കൊഴുപ്പുകൾ തലയോട്ടി ഈർപ്പമുള്ളതാക്കി നിർത്താനും മുടി വളർച്ചയെ  ഉത്തേജിപ്പിക്കാനും സഹായിക്കും.

2. മുട്ട 

പ്രോട്ടീനും ബയോട്ടിനും ധാരാളം അടങ്ങിയ മുട്ട മുടിക്ക് ആരോഗ്യം നൽകുന്ന മികച്ച ഭക്ഷണമാണ്. ബയോട്ടിൻ ഭക്ഷണത്തെ ഊർജ്ജമാക്കി മാറ്റുന്നതിന് ശരീരത്തെ സഹായിക്കുന്ന ഒരു ബി വിറ്റാമിൻ ആണ്. ഇത് മുടി വളർച്ചയെ പ്രോത്സാഹിപ്പിക്കുകയും ചെയ്യുന്നു.

3. പച്ച ഇലക്കറികൾ 

വിറ്റാമിൻ എ, സി, ഇ എന്നിവ ധാരാളം അടങ്ങിയ പാലക്,  മുരിങ്ങയില പോലുള്ള പച്ച ഇലക്കറികൾ  ആന്റിഓക്സിഡന്റുകളുടെ സമ്പന്നമായ ഉറവിടമാണ്. ഇവ തലയോട്ടി  പോഷിപ്പിക്കുകയും മുടി വളർച്ചയെ പ്രോത്സാഹിപ്പിക്കുകയും ചെയ്യുന്നു. വിറ്റാമിൻ എ സെബം ഉൽപാദനം നിയന്ത്രിക്കാൻ സഹായിക്കുന്നു, ഇത് തലയോട്ടി  ഈർപ്പമുള്ളതും ആരോഗ്യമുള്ളതുമായി നിലനിർത്തുന്നു. വിറ്റാമിൻ സി, ഇ എന്നിവ രക്തചംക്രമണം മെച്ചപ്പെടുത്തി തലയോട്ടിലേക്കുള്ള പോഷകങ്ങൾ എത്തിക്കാൻ സഹായിക്കുന്നു.

4. നട്സും വിത്തുകളും 

ബദാം, ചണവിത്ത് പോലുള്ള നട്സും വിത്തുകളും സെലിനിയം, ഇരുമ്പ് എന്നിങ്ങനെയുള്ള വിറ്റാമിനുകളും ധാതുക്കളും അടങ്ങിയ  സമ്പുഷ്ടമായ ഭക്ഷണ വിഭവമാണ്. ഇവയെല്ലാം മുടിയുടെ ആരോഗ്യത്തിന്  പ്രധാനമാണ്.  മുടി കൊഴിച്ചിൽ  തടയാനോ  മുടി വളർച്ചയ്ക്കോ  വേണ്ടിയുള്ള ഏതൊരു ചികിത്സയും ആരംഭിക്കുന്നതിന് മുമ്പ് ഡോക്ടറുടെ നിർദേശം തേടുക.