7 വയസുകാരിയെ പീഡിപ്പിച്ച 60 കാരനെ 10 വര്‍ഷം കഠിന തടവിനും ഒരു ലക്ഷം രൂപ പിഴയടക്കാനും ശിക്ഷിച്ചു

കാസര്‍കോട്: (www.kasargodvartha.com 04.09.2018) ഏഴ് വയസുകാരിയെ പീഡിപ്പിച്ച കേസില്‍ 60 കാരനെ കോടതി പത്ത് വര്‍ഷം കഠന തടവിനും ഒരു ലക്ഷം രൂപ പിഴയടക്കാനും ശിക്ഷിച്ചു. പൈവളിഗെ കയ്യാറിലെ മുന്നൂര്‍  ഇസ്മായിലി (60)നെയാണ് ജില്ലാ അഡീഷണല്‍ സെഷന്‍സ് കോടതി (ഒന്ന്) ശിക്ഷിച്ചത്. പിഴ അടച്ചാല്‍ പെണ്‍കുട്ടിയുടെ കുടുംബത്തിന് നല്‍കാനും കോടതി ഉത്തരവിട്ടു. അടച്ചില്ലെങ്കില്‍ രണ്ട് വര്‍ഷം കൂടി കഠിന തടവ് അനുഭവിക്കണമെന്നും ജഡ്ജ് പി എസ് ശശികുമാര്‍ വിധിച്ചു.

മഞ്ചേശ്വരം പോലീസ് സ്‌റ്റേഷന്‍ പരിധിയില്‍ 2015 എപ്രില്‍ ഒമ്പതിനാണ് കേസിനാസ്പദമായ സംഭവം. മാതാപിതാകള്‍ക്കൊപ്പം ബന്ധുവീട്ടില്‍ വന്നപ്പോള്‍  ഏഴ് വയസുകാരിയെ ഇസ്മായില്‍ തന്റെ നിര്‍മാണം നടക്കുന്ന വീട്ടില്‍  കൊണ്ട് പോയി പീഡിപ്പിക്കുകയായിരുന്നു. പ്രതിയെ പിന്നീട് പോക്‌സോ നിയമപ്രകാരം കേസെടുത്ത് പോലീസ് അറസ്റ്റുചെയ്യുകയുമായിരുന്നു. നിര്‍മ്മാണം നടന്നുകൊണ്ടിരിക്കുന്ന വീടിന്റെ പുറത്ത് ജോലിക്കാര്‍ ഉള്ളപ്പോള്‍ തന്നെയാണ് ഇയാള്‍ വീട്ടിനകത്തുവെച്ച് പെണ്‍കുട്ടിയെ ഉപദ്രവിച്ചത്. പ്രോസിക്യൂഷന് വേണ്ടി സ്‌പെഷ്യല്‍ പബ്ലിക് പ്രോസിക്യൂട്ടര്‍ പ്രകാശ് അമ്മണ്ണായ ഹാജരായി.