Booked | എസ് ഡി പി ഐയുടെ പതാക കീറിയതിന് നിങ്ങളെന്തിനാണ് ദേഷ്യപ്പെടുന്നത്? പോര്‍ചുഗലിന്റെ ഫ് ളാഗ് കീറിയത് ചോദ്യം ചെയ്ത ആരാധകരോട് ബി ജെ പി പ്രവര്‍ത്തകന്‍; പിന്നീട് സംഭവിച്ചത്

കണ്ണൂര്‍: (www.kasargodvartha.com) നാടെങ്ങും ലോക കപിന്റെ ആവേശം അലയടിക്കുകയാണ്. അതിനിടെ കണ്ണൂരില്‍ നിന്ന് രസകരമായൊരു സംഭവമാണ് റിപോര്‍ട് ചെയ്യുന്നത്. കണ്ണൂര്‍ പാനൂര്‍ വൈദ്യര്‍ പീടികയില്‍ ചൊവ്വാഴ്ച വൈകിട്ട് ഏഴരയോടെയാണ് സംഭവം. പോര്‍ചുഗലിന് പിന്തുണ അറിയിച്ച് കൊണ്ട് പ്രദേശത്തെ ആരാധകര്‍ പോര്‍ചുഗല്‍ പതാക കെട്ടിയിരുന്നു. എന്നാല്‍ രാത്രി ഏഴ് മണിയോടെ ഒരാള്‍ ഈ പതാക പ്രത്യേകിച്ച് കാരണമൊന്നും കൂടാതെ വലിച്ച് കീറി നശിപ്പിക്കുകയായിരുന്നു.

സംഭവം നേരില്‍കണ്ട ചിലര്‍ ഇത് കാമറയില്‍ പകര്‍ത്തി പ്രചരിപ്പിച്ചു. ഇത് കണ്ട പോര്‍ചുഗല്‍ ആരാധകര്‍ എത്തി യുവാവിനെ ചോദ്യം ചെയ്തു. അപ്പോള്‍ അയാളുടെ ചോദ്യം കേട്ട് യുവാക്കള്‍ അക്ഷരാര്‍ഥത്തില്‍ ഞെട്ടിപ്പോയി. എസ് ഡി പി ഐയുടെ പതാക കീറിയതിന് നിങ്ങളെന്തിനാണ് ദേഷ്യപ്പെടുന്നത് എന്നായിരുന്നു യുവാവിന്റെ ചോദ്യം. യുവാവിന്റെ 'അറിവില്ലായ്മ'ക്കുമുന്നില്‍ പകച്ചുനില്‍ക്കാനേ ആ പാവം ആരാധകര്‍ക്ക് കഴിഞ്ഞുള്ളു.