ജനപ്രിയ എസ് ഐ അജിത് കുമാറിന് ഊഷ്മള യാത്രയയപ്പ്; പുതിയ എസ് ഐയായി ജി ഗോപകുമാര്‍ ചുമതലയേറ്റു

കാസര്‍കോട്: (www.kasargodvartha.com 01.03.2019) കാസര്‍കോടിന്റെ സമാധാനാന്തരീക്ഷം നിലനിര്‍ത്തുന്നതിനും പാവപ്പെട്ടവനെന്നോ ധനികനെന്നോ വ്യത്യാസമില്ലാതെ ഏതു പരാതികള്‍ക്കും നിഷ്പക്ഷമായ അന്വേഷണം നടത്തി നീതി നിര്‍വ്വഹണം നടത്തിവന്ന കാസര്‍കോട്ടുകാരുടെ പ്രിയ എസ് ഐ അജിത് കുമാറിന് ഊഷ്മള യാത്രയയപ്പ്. തിരഞ്ഞെടുപ്പോനുബന്ധിച്ച് കണ്ണൂരിലേക്കാണ് അദ്ദേഹത്തിന് സ്ഥലം മാറ്റം ലഭിച്ചിരുന്നത്. പകരം കാസര്‍കോട് ടൗണ്‍ എസ് ഐയായി ജി ഗോപകുമാര്‍ ചുമതലയേറ്റു.

പത്തനംതിട്ട സ്വദേശിയായ ഗോപകുമാര്‍ നേരത്തെ കോഴിക്കോട് ഫറൂഖ് സിറ്റി പോലീസ് സ്‌റ്റേഷന്‍ എസ് ഐ ആയാണ് സേവനമനുഷ്ടിച്ചുവന്നത്. അജിത്ത് കുമാറിനെ യാത്രയയക്കുന്നതിനായി നിരവധി പേരാണ് കാസര്‍കോട് ടൗണ്‍ സ്‌റ്റേഷനിലേക്കെത്തിയത്. കുടുംബ ബന്ധങ്ങളിലുണ്ടാകുന്ന വിള്ളലുകളില്‍ പോലും അജിത് കുമാര്‍ ഇടപെട്ട് പരിഹാരങ്ങള്‍ നിര്‍ദേശിച്ചിരുന്നു. കുട്ടികളിലെ ലഹരി ഉപയോഗത്തിനെതിരെ ശക്തമായ നടപടിയാണ് അദ്ദേഹം സ്വീകരിച്ചുവന്നിരുന്നത്.

സി ഐ അബ്ദുര്‍ റഹീമുമായി ചേര്‍ന്ന് വര്‍ഗീയ സംഘര്‍ഷ സാധ്യത നിലനില്‍ക്കുന്ന കാസര്‍കോട്ട് സമാധാനം നിലനിര്‍ത്തുന്നതിന് നടത്തിയ ശ്രമങ്ങള്‍ ഏറെ പ്രശംസ പിടിച്ചുപറ്റിയിരുന്നു.