ജലനിരപ്പ് കുത്തനെ താഴുന്നു; പഴശ്ശി അണക്കെട്ടിന്റെ ഷട്ടറുകള്‍ അടച്ചു

By WebDesk OmegaNov 24, 2019, 10:33 IST

കണ്ണൂര്‍: (www.kasargodvartha.com 24.11.2019) ജലനിരപ്പ് കുത്തനെ താഴ്ന്നതിനാല്‍ പഴശ്ശി അണക്കെട്ടിന്റെ ഷട്ടറുകള്‍ അടച്ചു. ജില്ലയില്‍ നിരവധി ആളുകള്‍ക്ക് കുടിവെള്ളം വിതരണം ചെയ്യുന്ന പദ്ധതികള്‍ നടപ്പിലാക്കുന്നത് പഴശ്ശി അണക്കെട്ടിനെ ആശ്രയിച്ചാണ്. നീരൊഴുക്ക് തീരെ കുറഞ്ഞത് പദ്ധതിയില്‍ നിന്നുള്ള കുടിവെള്ള പമ്പിങ്ങിനെ ബാധിക്കുന്നു. അതിനാല്‍ ജലം സംഭരിക്കണമെന്നും ആവശ്യപ്പെട്ട് പഴശ്ശി അധികൃതര്‍ക്ക് ജല അതോറിറ്റി കത്ത് നല്‍കിയിരുന്നു.

പ്രളയവും തുലാവര്‍ഷവും കനത്ത നിലയില്‍ ലഭിച്ചതിനെ തുടര്‍ന്ന് പഴശ്ശി സംഭരണിയായ വളപട്ടണം പുഴയടക്കം നിറഞ്ഞു കവിഞ്ഞൊഴുകിയെങ്കിലും മഴക്കാലം മാറിയതോടെ പുഴകള്‍ ഒരിക്കലും ഇല്ലാത്ത വിധം വറ്റിവരണ്ടിരുന്നു. തുലാവര്‍ഷം കിട്ടിയെങ്കിലും ജലനിരപ്പ് ഉയരാതിരുന്ന സാഹചര്യത്തിലാണ് അണക്കെട്ടിന്റെ ഷട്ടറുകള്‍ അടച്ചത്.