ജാമ്യത്തിലെടുക്കാന്‍ ആളില്ല; കാമുകിയെ കൊന്ന യുവാവ് ഒരു മാസമായി ജയിലില്‍
Sep 29, 2012, 16:45 IST
കാഞ്ഞങ്ങാട്: പരപുരുഷ ബന്ധം ആരോപിച്ച് കാമുകിയെ ചുറ്റിക കൊണ്ട് തലക്കടിച്ച് കൊലപ്പെടുത്തിയ കേസിലെ പ്രതിയുടെ റിമാന്‍ഡ് കോടതി നീട്ടി. ബളാന്തോട് കാപ്പിത്തോട്ടത്തെ ബാലകൃഷ്ണന്‍ മണിയാണിയുടെ മകന്‍ വേണുവി(30)ന്റെ റിമാന്റാണ് ഹൊസ്ദുര്‍ഗ് ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് (ഒന്ന്) കോടതി രണ്ടാഴ്ചത്തേക്ക് കൂടി നീട്ടിയത്.
വേണുവിന് വേണ്ടി ജാമ്യാപപേക്ഷ സമര്‍പിക്കാന്‍ ആരും എത്താതിരുന്നതിനെ തുടര്‍ന്നാണ് കോടതി നടപടി. ഒരു മാസക്കാലമായി വേണു ഹൊസ്ദുര്‍ഗ് സബ് ജയിലില്‍ റിമാന്‍ഡില്‍ കഴിയുകയാണ്. സെപ്തംബര്‍ ഒന്നിനാണ് വേണുവിനെ പോലീസ് അറസ്റ്റ് ചെയ്ത് കോടതിയില്‍ ഹാജരാക്കിയത്. ഹോംനേഴ്‌സായ ബളാന്തോട് കാപ്പിത്തോട്ടത്തിലെ ശ്രീദേവി (50)യെ കൊലപ്പെടുത്തിയ കേസില്‍ പ്രതിയാണ് വേണു.
ഇക്കഴിഞ്ഞ ആഗസ്ത് മാസം ഉത്രാട ദിനത്തിലാണ് വേണു കാമുകിയായ ശ്രീദേവിയെ ചുറ്റിക കൊണ്ട് തലക്കടിച്ച് കൊലപ്പെടുത്തിയത്. മദ്യവുമായി ശ്രീദേവിയുടെ വീട്ടിലെത്തിയ വേണുവും ശ്രീദേവിയും മദ്യപിച്ച ശേഷം ഭാവികാര്യങ്ങളെ കുറിച്ചും മറ്റും സംസാരിക്കുന്നതിനിടെ ഇരുവരും തമ്മില്‍ വാക്ക് തര്‍ക്കത്തിലേര്‍പ്പെടുകയായിരുന്നു.
വേണു തന്റെ വിവാഹക്കാര്യം സംസാരിച്ചപ്പോള്‍ ശ്രീദേവി ഇതിനെ എതിര്‍ത്തതോടെയാണ് കലഹം മൂര്‍ച്ഛിച്ചത്. ശ്രീദേവിക്ക് പലരുമായും ബന്ധമുണ്ടെന്ന് വേണു ആരോപിച്ചതോടെ വഴക്ക് ഇരുവരും തമ്മിലുള്ള സംഘട്ടനത്തില്‍ കലാശിക്കുകയായിരുന്നു. അമിത മദ്യ ലഹരിയിലായതിനാല്‍ തളര്‍ന്ന് കിടന്ന ശ്രീദേവിയെ വേണു ചുറ്റിക കൊണ്ട് തലങ്ങും വിലങ്ങും അടിച്ച് കൊലപ്പെടുത്തുകയാണുണ്ടായത്.
Keywords: Kanhangad, Murder-case, case, Remand, Court, Kerala,Venu
Tags
Share this story
