രാത്രി വീടിന്റെ അടുക്കള ഭാഗത്തു കണ്ട പോലീസുകാരനു സസ്‌പെന്‍ഷന്‍

കാസര്‍കോട്: (www.kasargodvartha.com 21.04.2014) രാത്രിയില്‍ മറ്റൊരാളുടെ വീടിന്റെ അടുക്കള ഭാഗത്ത് സംശയ സാഹചര്യത്തില്‍ കാണപ്പെട്ട പോലീസുകാരനെ ജില്ലാ പോലീസ് സൂപ്രണ്ട് അന്വേഷണ വിധേയമായി സസ്‌പെന്‍ഡ് ചെയ്തു.

ഡി.സി.ആര്‍.ബി.യിലെ പോലീസുകാരന്‍ കാഞ്ഞങ്ങാട് തോയമ്മല്‍ സ്വദേശി പി. ശങ്കരനാണ് സസ്‌പെന്‍ഷനിലായത്. ശനിയാഴ്ച രാത്രി മഞ്ചേശ്വരം ചെക്ക് പോസ്റ്റിനടുത്ത വീട്ടിനടുത്തു നിന്നാണ് പോലീസുകാരനെ നാട്ടുകാര്‍ പിടികൂടിയത്.

നാട്ടുകാര്‍ ചോദ്യം ചെയ്തപ്പോള്‍ പരസ്പരവിരുദ്ധമായ മറുപടി പറഞ്ഞ പോലീസുകാരനെ കൈകാര്യം ചെയ്ത ശേഷം മഞ്ചേശ്വരം പോലീസിനു കൈമാറുകയായിരുന്നു. പോലീസാകട്ടെ ഇയാളുടെ പേരില്‍ പെറ്റിക്കേസെടുത്ത് വിട്ടയക്കുകയായിരുന്നു. ഇത് വിവാദമായതോടെയാണ് എസ്. പി. പോലീസുകാരനെ അന്വേഷണവിധേയമായി സസ്‌പെന്‍ഡ് ചെയ്തത്.