Protest | കോയിപ്പാടിയിലെ ആരോഗ്യ ഉപകേന്ദ്രം: പ്രവർത്തിക്കുന്നത് ലൈബ്രറി മാത്രം; നാട്ടുകാർ പ്രതിഷേധത്തിൽ

കുമ്പള: (KasargodVartha) കോയിപ്പാടി കടപ്പുറത്തെ ആരോഗ്യ ഉപകേന്ദ്രം അധികൃതരുടെ അലംഭാവം മൂലം അവഗണിക്കപ്പെട്ടുകൊണ്ടിരിക്കുന്നു. ഏഴു വർഷം മുമ്പ് നിർമ്മാണം പൂർത്തിയാക്കിയ ഈ കേന്ദ്രം ഇപ്പോഴും പൂർണമായും പ്രവർത്തനം ആരംഭിച്ചിട്ടില്ല.

തീരദേശ വികസന കോർപ്പറേഷൻ ലക്ഷങ്ങൾ ചിലവഴിച്ചു നിർമ്മിച്ച ഈ കെട്ടിടത്തിൽ ഇപ്പോൾ പ്രവർത്തിക്കുന്നത് ഒരു ലൈബ്രറി മാത്രമാണ്. പഞ്ചായത്ത് ഇടപെട്ട് കുറച്ചു പുസ്തകങ്ങളും മറ്റും ലഭ്യമാക്കിയാണ് ഇത് ആരംഭിച്ചത്. പിന്നീട് സന്നദ്ധ സംഘടനകൾ മെഡിക്കൽ ക്യാമ്പുകൾ ഉൾപ്പെടെയുള്ള പരിപാടികൾ ഇവിടെ സംഘടിപ്പിച്ചിട്ടുണ്ട്.

എന്നാൽ ആരോഗ്യ ഉപകേന്ദ്രം എന്ന നിലയിൽ ഇത് ഇപ്പോഴും ഒരു പാഴായ കെട്ടിടമായി തന്നെ തുടരുന്നു. കെട്ടിടം പൂർണ്ണമായും തുറക്കാത്തതിനാൽ ഇപ്പോൾ തകർച്ചാ ഭീഷണിയും നേരിടുന്നുണ്ട്. വാതിലുകളും, ജനാലകളും തുരുമ്പെടുക്കാൻ തുടങ്ങിയിട്ടുമുണ്ട്. ഇടയ്ക്കിടെ കുമ്പള ഗ്രാമപഞ്ചായത്ത് അറ്റകുറ്റപ്പണികൾ നടത്താറുണ്ടെങ്കിലും അത് തികച്ചും പര്യാപ്തമല്ല.

ഈ തീരപ്രദേശത്ത് ആരോഗ്യ ഉപകേന്ദ്രം അനിവാര്യമായിരുന്നു. മത്സ്യത്തൊഴിലാളികൾ തിങ്ങിപ്പാർക്കുന്ന ഈ മേഖലയിൽ അസുഖം വന്നാൽ ആശുപത്രിയിൽ ചെല്ലണമെങ്കിൽ കുമ്പള (സിഎച്ച്സി) സാമൂഹിക ആരോഗ്യ കേന്ദ്രത്തെ തന്നെ ആശ്രയിക്കണം. ഈ ഭാഗത്ത് ബസ് ഗതാഗതസൗകര്യം ഇല്ലാത്തതിനാൽ കുട്ടികളും, പ്രായമായവരും ആശുപത്രിയിൽ ചെല്ലാൻ ഏറെ പ്രയാസപ്പെടുന്നു.

ആരോഗ്യ ഉപകേന്ദ്രം പ്രവർത്തനസജ്ജമാക്കേണ്ടത് ആരോഗ്യ വകുപ്പ് ജില്ല അധികാരികളാണ്. നിരവധി തവണ ജനപ്രതിനിധികളും, കുമ്പള ഗ്രാമ പഞ്ചായത്ത് ഭരണസമിതിയും ജില്ലാ മെഡിക്കൽ ഓഫീസറെ കണ്ട് കത്ത് നൽകിയിരുന്നുവെങ്കിലും തുടർനടപടികൾ ഉണ്ടായിട്ടില്ലെന്നാണ് പറയുന്നത്. ആരോഗ്യ കേന്ദ്രം പ്രവർത്തനസജ്ജമാക്കാൻ അടിയന്തിര നടപടി വേണമെന്നാണ് നാട്ടുകാരുടെ ആവശ്യം. അല്ലാത്തപക്ഷം സമരപരിപാടികൾക്ക് രൂപം നൽകാനാണ് നാട്ടുകാരുടെ തീരുമാനം.

ഈ പ്രദേശത്തെ ജനങ്ങളുടെ അടിസ്ഥാന ആരോഗ്യ സൗകര്യങ്ങൾക്കായി അധികൃതർ അനാസ്ഥ കാണിക്കുകയാണെന്നാണ് നാട്ടുകാർ പറയുന്നത്. കോവിഡ് മഹാമാരിയുടെ കാലത്തുപോലും ഈ കേന്ദ്രം പ്രവർത്തിച്ചിരുന്നില്ല എന്നത് വലിയ അപാകതയാണ്. ഈ പ്രശ്‌നം പരിഹരിക്കുന്നതിന് അധികൃതർ ഉടൻ തന്നെ ഇടപെടണമെന്നാണ് ആവശ്യം.

#KeralaHealth #HealthcareCrisis #GovernmentNegligence #RuralHealth #CommunityProtest #AbandonedBuildings