Theft | അങ്കണവാടിയിൽ കള്ളന്മാർ കയറി സദ്യ!

പിലിക്കോട്: (KasargodVartha) മട്ടലായി കമ്യൂണിറ്റി ഹാളിന് സമീപത്തുള്ള അങ്കണവാടിയിൽ കള്ളന്മാർ കയറി സാമ്പാറും ചോറും ഉണ്ടാക്കി കഴിച്ച് സ്ഥലം വിട്ട സംഭവം നാടിനെ ഞെട്ടിച്ചു. ബുധനാഴ്ച രാത്രിയാണ് ഈ അപ്രതീക്ഷിത സംഭവം ഉണ്ടായത്.
അങ്കണവാടിയുടെ പൂട്ട് തകർത്ത് അകത്തു കടന്ന കള്ളന്മാർ, കുട്ടികൾക്ക് ഭക്ഷണം ഉണ്ടാക്കാൻ വച്ചിരുന്ന വെളിച്ചെണ്ണ, പച്ചക്കറികൾ, പരിപ്പ് തുടങ്ങിയ സാധനങ്ങൾ ഉപയോഗിച്ച് ചെറുപയർ ചേർത്ത ചോറും സാമ്പാറും ഉണ്ടാക്കി. തുടർന്ന് മൂന്ന് പ്ലേറ്റിൽ വിളമ്പി കഴിച്ച ശേഷം പാത്രങ്ങൾ വാഷ് ബേസിനിൽ വെക്കുകയും ബാക്കി വന്ന ചോറ് പുറത്തേക്ക് കളയുകയും ചെയ്തു. ഭക്ഷണ സാധനങ്ങൾ സൂക്ഷിച്ച പെട്ടികളുടെ പൂട്ട് പൊളിച്ച് സാധനങ്ങൾ വലിച്ചു വാരിയിട്ട നിലയിലായിരുന്നു.

തുടർന്ന് അടുത്തുള്ള പുത്തിലോട്ടെ കടയിലെ പൂട്ട് തകർത്ത് കയറി സിഗരറ്റ് പാക്കറ്റുകളും 500 രൂപയും മോഷ്ടിച്ചു.
അങ്കണവാടി വർക്കർ കെ. മനീഷയുടെ പരാതിയിൽ ചന്തേര പോലീസ് സ്ഥലത്തെത്തി അന്വേഷണം ആരംഭിച്ചു. കള്ളന്മാർ ഉപയോഗിച്ച പാത്രങ്ങളിൽ നിന്ന് വിരലടയാളം ശേഖരിച്ചിട്ടുണ്ട്.
ഈ സംഭവം പ്രദേശവാസികളിൽ വലിയ ഞെട്ടലും രോഷവുമുണ്ടാക്കി. കുട്ടികൾക്കുള്ള ഭക്ഷണം മോഷ്ടിച്ച കള്ളന്മാർക്കെതിരെ കർശന നടപടി സ്വീകരിക്കണമെന്നാണ് നാട്ടുകാരുടെ ആവശ്യം.