മന്ത്രിക്ക് കാസര്‍കോടിനെ വേണ്ടെങ്കില്‍ കാസര്‍കോടിന് മന്ത്രിയെ വേണോ?

പാനൂരിന്റെ സിംഹകുട്ടി നമ്മുടെ കൃഷിമന്ത്രി കെ.പി മോഹനന്‍ ഉഗ്രപ്രതാപിയാണ്. ആരോടും എന്തും വെട്ടി തുറന്നു പറയും. വെട്ടൊന്ന് തുണ്ടം രണ്ട് എന്ന രീതിക്കാരനാണ്. നിയമസഭയെന്നോ മന്ത്രിയെന്നോ മറ്റോ പുള്ളിക്കാരന് ഭേദമില്ല. ദേഷ്യം വന്നാല്‍ ഇരിക്കുന്ന സ്ഥാനമാനങ്ങളും അപ്പടി അങ്ങ് മറക്കും. പാനൂരിലെ സിംഹകുട്ടിയായതിനാല്‍ 18 അടവും പൂഴികടകനും മോഹനേട്ടനു വശമാണ്. ഈ അത്യപൂര്‍വ്വമായ മെയ്‌വഴക്കമുള്ള സംസ്ഥാന മന്ത്രി സഭയിലെ ഏക മന്ത്രിയാണ് അദ്ദേഹം. ഇത്രയും ചുമതലാബോധമുള്ള മന്ത്രി സംസ്ഥാനത്തില്ലെന്നാണ് പുതിയ സംസാരം.

ഈ ചുമതലാ ബോധത്തിന്റെ ദുരന്തമാണ് കാസര്‍കോട് ജില്ലാ ഇന്ന് നേരിടുന്നത്. സി.ടി അഹമ്മദലിയും ചെര്‍ക്കള അബ്ദുല്ലയും പയ്യന്നൂര്‍ക്കാരി ശ്രീമതി ടീച്ചറും കാസര്‍കോടിന്റെ ചുമതല സ്തുത്യര്‍ഹമായി നിറവേറ്റിയവരാണ്. സ്വാതന്ത്ര്യദിനത്തിനും റിപ്പബ്ലിക്ക് ദിനത്തിനും സല്യൂട്ടടിക്കാനുണ്ടെന്നറിഞ്ഞാല്‍ ടീച്ചര്‍ രണ്ടുദിവസം മുമ്പേ കാസര്‍കോട്ടെത്തും.