വ്യാപാരികളുടെ ജനസേവനം ഇങ്ങനെ...
Feb 16, 2013, 07:50 IST
ഒരു രാഷ്ട്രീയ സംഘടനയല്ലെങ്കിലും കേരള വ്യാപാരി വ്യവസായി ഏകോപന സമിതി വിചാരിച്ചാലും നമ്മുടെ നാട്ടില്‍ ചിലതൊക്കെ നടക്കും എന്ന് തെളിയിക്കുകയായിരുന്നു കഴിഞ്ഞ ദിവസം കാസര്‍കോട്ട് നടന്ന സംഘടനയുടെ ജില്ലാ സമ്മേളനം. റോഡ് മുടക്കി പ്രകടനം നടത്താനും പടക്കം പൊട്ടിച്ച് ധൂര്‍ത്ത് കാണിക്കാനും സമ്മേളിച്ച് കരുത്ത് തെളിയിക്കാനും വ്യാപാരികളും ഒട്ടും പിറകിലായിക്കൂടല്ലോ. ഒരാഴ്ചയോളം വൈവിധ്യമാര്‍ന്ന അനുബന്ധ പരിപാടികളോടെ നടന്ന സമ്മേളനത്തിന്റെ സമാപന ദിവസമായിരുന്നു കാസര്‍കോട്ട് പ്രകടനവും ആയിരങ്ങള്‍ പങ്കെടുത്ത പൊതു സമ്മേളനവും നടന്നത്.
നഗരത്തിന്റെ പല ഭാഗങ്ങളില്‍ നിന്നായി ആരംഭിച്ച് പ്രധാന നിരത്തുകളിലൂടെയൊക്കെ സഞ്ചരിച്ച്, മണിക്കൂറുകളോളം ഗതാഗത തടസ്സമുണ്ടാക്കിയാണ് പടുകൂറ്റന്‍ പ്രകടനം കടന്നുപോയത്. നാല് ഒട്ടകങ്ങളും അതിന്റെ പുറത്ത് നാല് ആളുകള്‍ ഇരുന്നും പ്രകടനത്തിന് ശക്തി പകര്‍ന്നു. നിശ്ചല ദൃശ്യങ്ങളും വനിതകളുടെ ചെണ്ട മേളവും പ്രകടനത്തിന് പൊലിമ വര്‍ദ്ധിപ്പിച്ചു. എല്ലാം രാഷ്ട്രീയക്കാര്‍ ചെയ്യുന്നത് പോലെത്തന്നെ. രാഷ്ട്രീയക്കാര്‍ ചെയ്യാത്ത ഒരു കാര്യം കൂടി വ്യാപാരികള്‍ ചെയ്തു. സമ്മേളന ദിവസം ജില്ല മുഴുവന്‍ വ്യാപാര സ്ഥാപനങ്ങള്‍ സ്വമനസ്സാലെ അടച്ചിടുകയോ, അടപ്പിക്കുകയോ ചെയ്തു. ഹോട്ടലുകള്‍ പോലും തുറക്കാനനുവദിച്ചില്ല. ശക്തി അങ്ങനെയും കൂടി അവര്‍ നമുക്ക് കാട്ടിത്തന്നു. കാസര്‍കോട് നഗരത്തില്‍ മാത്രം സമ്മേളനക്കാര്‍ക്ക് ദാഹമകറ്റാനും വിശപ്പടക്കാനും ഹോട്ടലുകള്‍ തുറക്കാന്‍ അനുവാദം നല്‍കി. സാധാരണ ഹര്‍ത്താല്‍ ദിനങ്ങളില്‍ കടകളടപ്പിക്കുന്നതിനെതിരെയും ജനങ്ങളുടെ ദുരിതങ്ങളെക്കുറിച്ചും സഞ്ചാരസ്വാതന്ത്രത്തെക്കുറിച്ചും വാചാലരാവുന്ന വ്യാപാരികളാണ് ഹോട്ടലിനെ ആശ്രയിക്കുന്നവരെയൊക്കെ പട്ടിണിക്കിട്ടും മണിക്കൂറുകളോളം ഗതാഗത സ്തംഭനം സൃഷ്ടിച്ചും സമ്മേളനം ആഘോഷിച്ചത്.
വ്യാപാരികള്‍ നമ്മുടെ നാട്ടില്‍ ഒരു നിര്‍ണായക ശക്തി തന്നെയാണ്. അവരുടെ സേവനങ്ങള്‍ കുറച്ച് കാണിക്കുന്നില്ല. അവരുടെ അവകാശ പോരാട്ടങ്ങളെയും ശക്തി പ്രകടനത്തെയും നിന്ദിക്കുന്നുമില്ല. കടകള്‍ അടപ്പിച്ചും വഴി തടസപ്പെടുത്തിയും ആളുകളുടെ ചെവി പൊട്ടുമാറ് പടക്കം പൊട്ടിച്ചും വേണമായിരുന്നോ ഈ കരുത്ത് കാട്ടല്‍ എന്ന കാര്യത്തിലാണ് വിയോജിപ്പുള്ളത്. കാസര്‍കോട് ജില്ലയിലെ പതിനൊന്നോളം പഞ്ചായത്തുകള്‍ എന്‍ഡോസള്‍ഫാന്‍ ബാധിത മേഖലയാണ്. നിരവധി ആളുകള്‍ ഇപ്പോഴും അവിടങ്ങളില്‍ മരിച്ചുജീവിക്കുന്നു. അവരില്‍ ആര്‍ക്കെങ്കിലും എന്തെങ്കിലും ചെയ്തുകൊടുക്കാന്‍ വ്യാപാരി സംഘടന തയ്യാറായതായി കേട്ടിട്ടില്ല. നമ്മളറിയാതെ എന്തെങ്കിലും ചെയ്തില്ല എന്ന് പറയാനും വയ്യ. അറിഞ്ഞിടത്തോളം ഒരു രോഗിക്ക് മരുന്നുവാങ്ങാനുള്ള സഹായം പോലും ലക്ഷങ്ങള്‍ പൊടിച്ച് നടത്തിയ സമ്മേളനവുമായി ബന്ധപ്പെട്ട് നല്‍കിയിട്ടില്ല.
എന്‍ഡോസള്‍ഫാന്‍ ദുരിതബാധിതരെയും പാവങ്ങളെയും സഹായിക്കാന്‍ വിദേശത്ത് കഷ്ടപ്പെട്ട് പണിയെടുക്കുന്നവര്‍ വരെ തങ്ങളാലാവുന്ന സഹായം ചെയ്യുമ്പോള്‍ തങ്ങളുടെകണ്‍മുമ്പില്‍ പിടയുന്ന മനുഷ്യജീവികളെ വിസ്മരിച്ചുകൊണ്ടാണ് വ്യാപാരികളുടെ സമ്മേളന മാമാങ്കം എന്നതും ശ്രദ്ധിക്കേണ്ട ഒരു സംഗതിയാണ്. സമാപനത്തോടനുബന്ധിച്ച് ആകാശത്ത് വിസ്മയം സൃഷ്ടിച്ച് മണിക്കൂറുകളോളം പൊട്ടിച്ചുകളഞ്ഞ പടക്കത്തിന്റെ പ്രകമ്പനം ഇപ്പോഴും നഗരവാസികളുടെ കാതുകളില്‍ നിന്നും മാറിയിട്ടില്ല. ഈ പടക്കം പൊട്ടലിന്റെ ശബ്ദം കേട്ട ഏതെങ്കിലും എന്‍ഡോസള്‍ഫാന്‍ രോഗികള്‍ അതിന്റെ പണത്തില്‍ ഒരംശം തങ്ങള്‍ക്ക് തന്നിരുന്നുവെങ്കില്‍ എന്നു ആശിച്ചുപോയാല്‍ അവരെ കുറ്റം പറയാന്‍ പറ്റുമോ? സാധാരണ സമ്മേളനങ്ങളില്‍ കണ്ടു വരാത്തരീതിയില്‍ അത്യാര്‍ഭാടമായി നടത്തിയ സമ്മേളനമായതുകൊണ്ടാണ് ഇങ്ങനെ ചോദിച്ചുപോവുന്നത്. എന്നുവെച്ച് നാട്ടിലെ എന്‍ഡോസള്‍ഫാന്‍ ഇരകളെ മൊത്തം സഹായിക്കേണ്ടത് വ്യാപാരികളുടെ ഉത്തരവാദിത്തമാണെന്നല്ല പറഞ്ഞുവരുന്നത്.വ്യാപാരികള്‍ക്കും ജില്ലാ സമ്മേളനവുമായി ബന്ധപ്പെട്ട ചില സഹായങ്ങള്‍ ചെയ്യാമായിരുന്നു എന്നാണ് സൂചിപ്പിച്ചുവന്നത്.
സമ്മേളനം സംഘടിപ്പിക്കാന്‍ മാത്രമായി 30ലക്ഷത്തോളം രൂപ ചെലവഴിച്ചതായാണ് സംഘടനയുടെ അനൗദ്യോഗിക കണക്ക്. എന്നാല്‍ യൂണിറ്റ് തലത്തില്‍ നിന്നും സമ്മേളനത്തിന് എത്തേണ്ട വാഹനയാത്രാ ചെലവ്, വാദ്യമേളം, ഫ്ലക്‌സ്, നിശ്ചലദൃശ്യം തുടങ്ങി എല്ലാ ചിലവും കൂടുമ്പോള്‍ സമ്മേളന ചെലവ് ഒരു കോടി കവിയുമെന്നാണ് സംഘടനാ നേതാക്കള്‍ തന്നെ പറയുന്നത്. ധൂര്‍ത്തിന്റെ കൂത്തരങ്ങായി മാറിയ സമ്മേളനത്തിന്റെ യഥാര്‍ത്ഥ കണക്ക് എന്തു തന്നെയായാലും ഒരു കാര്യം ഉറപ്പിച്ചു പറയാം, സംഘാടകരുടെ കൈയ്യില്‍ നിന്നും ഒരുപൈസ പോലും ചെലവായില്ലെന്ന്. സമ്മേളനചെലവിന് സംഘടനാംഗങ്ങള്‍ നിര്‍ബന്ധമായും നല്‍കേണ്ട മിനിമം തുക 150 രൂപയാണ്. ഇത്കൂടാതെ ഇടത്തരം വ്യാപാരികളും പ്രമാണിമാരായ വ്യാപാരികളും 5000രൂപ മുതല്‍ ഒരു ലക്ഷം രൂപ വരെ സംഭാവന നല്‍കിയിട്ടുണ്ടെന്നാണ് അറിയുന്നത്. ഇത്രയൊക്കെ പിരിച്ചിട്ടും സാധാരണ ജനങ്ങളുടെ ഉന്നമനത്തിനായോ പൊതുആവശ്യാര്‍ത്ഥമോ ഒരു നയാപൈസ പോലുമോ സംഘടന ചെലവാക്കിയില്ല.
പ്രത്യക്ഷമായും പരോക്ഷമായും തങ്ങള്‍ എത്രയോ ആയിരങ്ങള്‍ക്ക് തൊഴിലും ഉപജീവനമാര്‍ഗങ്ങളും നല്‍കുന്നുവെന്നും നാടിന്റെ നട്ടെല്ല് വ്യാപാരികളാണെന്നും മറ്റും മേനി പറയുന്ന ഏകോപന സമിതി വ്യാപാര രംഗത്തെ കരിഞ്ചന്തയും കൊള്ളലാഭമെടുക്കലും മായം ചേര്‍ക്കലും നികുതിവെട്ടിപ്പും മറ്റും തടയാന്‍ ഒരു ചെറുവിരല്‍ പോലും അനക്കിയതായോ വ്യാപാരികള്‍ക്കിടയില്‍ അതിനെതിരെ ഒരു ബോധവല്‍ക്കരണ ക്ലാസ് നടത്തിയതായോ അറിവില്ല. സംഘടനയുടെ തലപ്പത്തുള്ളവര്‍ സമ്മേളനത്തേയും ഒരു കച്ചവടമാക്കുകയായിരുന്നു.
ഒരു സംഘടനക്ക് അവകാശ ബോധം മാത്രമുണ്ടായാല്‍ പോരെന്നും തങ്ങള്‍ ജീവിക്കുന്ന സമൂഹത്തോട് ചില ബാധ്യതകള്‍ നിറവേറ്റാനുണ്ടെന്ന തിരിച്ചറിവും വേണ്ടിയിരിക്കുന്നു. സാമൂഹ്യബോധം പുലര്‍ത്താന്‍ അവര്‍ക്ക് അത്ര താല്‍പര്യമില്ല എന്നാണ് കാസര്‍കോട്ടുനടത്തിയ സമ്മേളന ധൂര്‍ത്ത് വ്യക്തമാക്കുന്നത്. സമീപ ഭാവിയില്‍ തന്നെ ഈ സംഘടനയും വോട്ട് കച്ചവടത്തിലേക്കും അധികാര രാഷ്ട്രീയത്തിലേക്കും നീങ്ങുമെന്നാണ് ഇപ്പോഴത്തെ സ്ഥിതിവെച്ചുനോക്കുമ്പോള്‍ വ്യക്തമാവുന്നത്.
-രവീന്ദ്രന്‍ പാടി
Keywords: KVVES, Article, kasaragod, Road, Police, Strike, Endosulfan, Raveendran Padi, Kerala News, International News, National News, Gulf News, Health News, Educational News, Business News, Stock news, Gold News.
നഗരത്തിന്റെ പല ഭാഗങ്ങളില്‍ നിന്നായി ആരംഭിച്ച് പ്രധാന നിരത്തുകളിലൂടെയൊക്കെ സഞ്ചരിച്ച്, മണിക്കൂറുകളോളം ഗതാഗത തടസ്സമുണ്ടാക്കിയാണ് പടുകൂറ്റന്‍ പ്രകടനം കടന്നുപോയത്. നാല് ഒട്ടകങ്ങളും അതിന്റെ പുറത്ത് നാല് ആളുകള്‍ ഇരുന്നും പ്രകടനത്തിന് ശക്തി പകര്‍ന്നു. നിശ്ചല ദൃശ്യങ്ങളും വനിതകളുടെ ചെണ്ട മേളവും പ്രകടനത്തിന് പൊലിമ വര്‍ദ്ധിപ്പിച്ചു. എല്ലാം രാഷ്ട്രീയക്കാര്‍ ചെയ്യുന്നത് പോലെത്തന്നെ. രാഷ്ട്രീയക്കാര്‍ ചെയ്യാത്ത ഒരു കാര്യം കൂടി വ്യാപാരികള്‍ ചെയ്തു. സമ്മേളന ദിവസം ജില്ല മുഴുവന്‍ വ്യാപാര സ്ഥാപനങ്ങള്‍ സ്വമനസ്സാലെ അടച്ചിടുകയോ, അടപ്പിക്കുകയോ ചെയ്തു. ഹോട്ടലുകള്‍ പോലും തുറക്കാനനുവദിച്ചില്ല. ശക്തി അങ്ങനെയും കൂടി അവര്‍ നമുക്ക് കാട്ടിത്തന്നു. കാസര്‍കോട് നഗരത്തില്‍ മാത്രം സമ്മേളനക്കാര്‍ക്ക് ദാഹമകറ്റാനും വിശപ്പടക്കാനും ഹോട്ടലുകള്‍ തുറക്കാന്‍ അനുവാദം നല്‍കി. സാധാരണ ഹര്‍ത്താല്‍ ദിനങ്ങളില്‍ കടകളടപ്പിക്കുന്നതിനെതിരെയും ജനങ്ങളുടെ ദുരിതങ്ങളെക്കുറിച്ചും സഞ്ചാരസ്വാതന്ത്രത്തെക്കുറിച്ചും വാചാലരാവുന്ന വ്യാപാരികളാണ് ഹോട്ടലിനെ ആശ്രയിക്കുന്നവരെയൊക്കെ പട്ടിണിക്കിട്ടും മണിക്കൂറുകളോളം ഗതാഗത സ്തംഭനം സൃഷ്ടിച്ചും സമ്മേളനം ആഘോഷിച്ചത്.
വ്യാപാരികള്‍ നമ്മുടെ നാട്ടില്‍ ഒരു നിര്‍ണായക ശക്തി തന്നെയാണ്. അവരുടെ സേവനങ്ങള്‍ കുറച്ച് കാണിക്കുന്നില്ല. അവരുടെ അവകാശ പോരാട്ടങ്ങളെയും ശക്തി പ്രകടനത്തെയും നിന്ദിക്കുന്നുമില്ല. കടകള്‍ അടപ്പിച്ചും വഴി തടസപ്പെടുത്തിയും ആളുകളുടെ ചെവി പൊട്ടുമാറ് പടക്കം പൊട്ടിച്ചും വേണമായിരുന്നോ ഈ കരുത്ത് കാട്ടല്‍ എന്ന കാര്യത്തിലാണ് വിയോജിപ്പുള്ളത്. കാസര്‍കോട് ജില്ലയിലെ പതിനൊന്നോളം പഞ്ചായത്തുകള്‍ എന്‍ഡോസള്‍ഫാന്‍ ബാധിത മേഖലയാണ്. നിരവധി ആളുകള്‍ ഇപ്പോഴും അവിടങ്ങളില്‍ മരിച്ചുജീവിക്കുന്നു. അവരില്‍ ആര്‍ക്കെങ്കിലും എന്തെങ്കിലും ചെയ്തുകൊടുക്കാന്‍ വ്യാപാരി സംഘടന തയ്യാറായതായി കേട്ടിട്ടില്ല. നമ്മളറിയാതെ എന്തെങ്കിലും ചെയ്തില്ല എന്ന് പറയാനും വയ്യ. അറിഞ്ഞിടത്തോളം ഒരു രോഗിക്ക് മരുന്നുവാങ്ങാനുള്ള സഹായം പോലും ലക്ഷങ്ങള്‍ പൊടിച്ച് നടത്തിയ സമ്മേളനവുമായി ബന്ധപ്പെട്ട് നല്‍കിയിട്ടില്ല.
എന്‍ഡോസള്‍ഫാന്‍ ദുരിതബാധിതരെയും പാവങ്ങളെയും സഹായിക്കാന്‍ വിദേശത്ത് കഷ്ടപ്പെട്ട് പണിയെടുക്കുന്നവര്‍ വരെ തങ്ങളാലാവുന്ന സഹായം ചെയ്യുമ്പോള്‍ തങ്ങളുടെകണ്‍മുമ്പില്‍ പിടയുന്ന മനുഷ്യജീവികളെ വിസ്മരിച്ചുകൊണ്ടാണ് വ്യാപാരികളുടെ സമ്മേളന മാമാങ്കം എന്നതും ശ്രദ്ധിക്കേണ്ട ഒരു സംഗതിയാണ്. സമാപനത്തോടനുബന്ധിച്ച് ആകാശത്ത് വിസ്മയം സൃഷ്ടിച്ച് മണിക്കൂറുകളോളം പൊട്ടിച്ചുകളഞ്ഞ പടക്കത്തിന്റെ പ്രകമ്പനം ഇപ്പോഴും നഗരവാസികളുടെ കാതുകളില്‍ നിന്നും മാറിയിട്ടില്ല. ഈ പടക്കം പൊട്ടലിന്റെ ശബ്ദം കേട്ട ഏതെങ്കിലും എന്‍ഡോസള്‍ഫാന്‍ രോഗികള്‍ അതിന്റെ പണത്തില്‍ ഒരംശം തങ്ങള്‍ക്ക് തന്നിരുന്നുവെങ്കില്‍ എന്നു ആശിച്ചുപോയാല്‍ അവരെ കുറ്റം പറയാന്‍ പറ്റുമോ? സാധാരണ സമ്മേളനങ്ങളില്‍ കണ്ടു വരാത്തരീതിയില്‍ അത്യാര്‍ഭാടമായി നടത്തിയ സമ്മേളനമായതുകൊണ്ടാണ് ഇങ്ങനെ ചോദിച്ചുപോവുന്നത്. എന്നുവെച്ച് നാട്ടിലെ എന്‍ഡോസള്‍ഫാന്‍ ഇരകളെ മൊത്തം സഹായിക്കേണ്ടത് വ്യാപാരികളുടെ ഉത്തരവാദിത്തമാണെന്നല്ല പറഞ്ഞുവരുന്നത്.വ്യാപാരികള്‍ക്കും ജില്ലാ സമ്മേളനവുമായി ബന്ധപ്പെട്ട ചില സഹായങ്ങള്‍ ചെയ്യാമായിരുന്നു എന്നാണ് സൂചിപ്പിച്ചുവന്നത്.
സമ്മേളനം സംഘടിപ്പിക്കാന്‍ മാത്രമായി 30ലക്ഷത്തോളം രൂപ ചെലവഴിച്ചതായാണ് സംഘടനയുടെ അനൗദ്യോഗിക കണക്ക്. എന്നാല്‍ യൂണിറ്റ് തലത്തില്‍ നിന്നും സമ്മേളനത്തിന് എത്തേണ്ട വാഹനയാത്രാ ചെലവ്, വാദ്യമേളം, ഫ്ലക്‌സ്, നിശ്ചലദൃശ്യം തുടങ്ങി എല്ലാ ചിലവും കൂടുമ്പോള്‍ സമ്മേളന ചെലവ് ഒരു കോടി കവിയുമെന്നാണ് സംഘടനാ നേതാക്കള്‍ തന്നെ പറയുന്നത്. ധൂര്‍ത്തിന്റെ കൂത്തരങ്ങായി മാറിയ സമ്മേളനത്തിന്റെ യഥാര്‍ത്ഥ കണക്ക് എന്തു തന്നെയായാലും ഒരു കാര്യം ഉറപ്പിച്ചു പറയാം, സംഘാടകരുടെ കൈയ്യില്‍ നിന്നും ഒരുപൈസ പോലും ചെലവായില്ലെന്ന്. സമ്മേളനചെലവിന് സംഘടനാംഗങ്ങള്‍ നിര്‍ബന്ധമായും നല്‍കേണ്ട മിനിമം തുക 150 രൂപയാണ്. ഇത്കൂടാതെ ഇടത്തരം വ്യാപാരികളും പ്രമാണിമാരായ വ്യാപാരികളും 5000രൂപ മുതല്‍ ഒരു ലക്ഷം രൂപ വരെ സംഭാവന നല്‍കിയിട്ടുണ്ടെന്നാണ് അറിയുന്നത്. ഇത്രയൊക്കെ പിരിച്ചിട്ടും സാധാരണ ജനങ്ങളുടെ ഉന്നമനത്തിനായോ പൊതുആവശ്യാര്‍ത്ഥമോ ഒരു നയാപൈസ പോലുമോ സംഘടന ചെലവാക്കിയില്ല.
പ്രത്യക്ഷമായും പരോക്ഷമായും തങ്ങള്‍ എത്രയോ ആയിരങ്ങള്‍ക്ക് തൊഴിലും ഉപജീവനമാര്‍ഗങ്ങളും നല്‍കുന്നുവെന്നും നാടിന്റെ നട്ടെല്ല് വ്യാപാരികളാണെന്നും മറ്റും മേനി പറയുന്ന ഏകോപന സമിതി വ്യാപാര രംഗത്തെ കരിഞ്ചന്തയും കൊള്ളലാഭമെടുക്കലും മായം ചേര്‍ക്കലും നികുതിവെട്ടിപ്പും മറ്റും തടയാന്‍ ഒരു ചെറുവിരല്‍ പോലും അനക്കിയതായോ വ്യാപാരികള്‍ക്കിടയില്‍ അതിനെതിരെ ഒരു ബോധവല്‍ക്കരണ ക്ലാസ് നടത്തിയതായോ അറിവില്ല. സംഘടനയുടെ തലപ്പത്തുള്ളവര്‍ സമ്മേളനത്തേയും ഒരു കച്ചവടമാക്കുകയായിരുന്നു.
ഒരു സംഘടനക്ക് അവകാശ ബോധം മാത്രമുണ്ടായാല്‍ പോരെന്നും തങ്ങള്‍ ജീവിക്കുന്ന സമൂഹത്തോട് ചില ബാധ്യതകള്‍ നിറവേറ്റാനുണ്ടെന്ന തിരിച്ചറിവും വേണ്ടിയിരിക്കുന്നു. സാമൂഹ്യബോധം പുലര്‍ത്താന്‍ അവര്‍ക്ക് അത്ര താല്‍പര്യമില്ല എന്നാണ് കാസര്‍കോട്ടുനടത്തിയ സമ്മേളന ധൂര്‍ത്ത് വ്യക്തമാക്കുന്നത്. സമീപ ഭാവിയില്‍ തന്നെ ഈ സംഘടനയും വോട്ട് കച്ചവടത്തിലേക്കും അധികാര രാഷ്ട്രീയത്തിലേക്കും നീങ്ങുമെന്നാണ് ഇപ്പോഴത്തെ സ്ഥിതിവെച്ചുനോക്കുമ്പോള്‍ വ്യക്തമാവുന്നത്.
-രവീന്ദ്രന്‍ പാടി
Keywords: KVVES, Article, kasaragod, Road, Police, Strike, Endosulfan, Raveendran Padi, Kerala News, International News, National News, Gulf News, Health News, Educational News, Business News, Stock news, Gold News.
Tags
Share this story
