യുവകർഷകർക്ക് പ്രതീക്ഷകൾ നൽകി കുമ്പള കൃഷി ഓഫീസർ കെ നാണുക്കുട്ടൻ

(www.kasargodvartha.com 14.09.2020) കൃഷി ഭവനുകൾ കർഷകന്റെ ആശാ കേന്ദ്രമായി നിലനിൽക്കണമെന്നൊക്കെ ഒരു ചൊല്ലുണ്ട്, ആ വഴിയേ സഞ്ചരിക്കുകയാണ് കുമ്പള കൃഷി ഭവനിലെ കൃഷി ഓഫീസർ കെ നാണുക്കുട്ടൻ. കഴിഞ്ഞ കുറച്ചു മാസങ്ങളായി കുമ്പള പഞ്ചായത്ത് പരിധിയിൽപ്പെട്ടവർ നാണുക്കുട്ടൻ എന്ന പേര് കേൾക്കാത്തതായിട്ടുണ്ടാവില്ല. കൃഷിക്കാർക്കിടയിൽ അത്രയും ജനപ്രിയനാവാൻ അദ്ദേഹത്തിന്ന് സാധിച്ചിരിക്കുന്നു. ഒരു പക്ഷെ കുമ്പള ഗ്രാമ പഞ്ചായത്തിലെ കാർഷിക സാധ്യതകളെ ഇത്രയധികം മനസിലാക്കിയ മറ്റൊരാൾ ഉണ്ടായിട്ടില്ല എന്ന് തന്നെ പറയാം.

കൃഷിയുടെയും, കൃഷിക്കാരുടെയും പ്രശ്നങ്ങൾ ഇന്ന് ഏറെ സങ്കീർണ്ണമാണ്. ഒരു കാലത്ത് നമ്മുടെയൊക്കെ മുഖ്യ ഉപജീവനമാർഗ്ഗമായിരുന്ന കാർഷികവൃത്തിയിൽ നിന്ന് മിക്കവരും വിട്ടു പോകുന്നത് കാർഷിക മേഖല നേരിടുന്ന പ്രശ്നങ്ങളെ അതിജീവിക്കാൻ കഴിയാത്തതിനാൽ കൂടിയാണെന്ന് അദ്ദേഹം വിശ്വസിക്കുന്നു.

'കർഷകൻ കടത്തിൽ ജനിക്കുന്നു, കടത്തിൽ ജീവിക്കുന്നു, കടത്തിൽ മരിക്കുന്നു....' ഇത് എങ്ങിനെ ഇന്ത്യ എന്ന കാർഷിക രാജ്യത്ത് സംഭവിക്കുന്നു....? ഇവിടെയാണ്‌ കൃഷിഭവനുകൾ ഉണർന്നു പ്രവർത്തിക്കേണ്ടത്... അതിന് മാതൃകയാവുകയാണ് കുമ്പള കൃഷി ഭവനും, കൃഷി ഓഫീസറും.


കർഷകന്റെ അത്താണിയായ കൃഷി ഭവനുകളുടെ സേവനം കർഷകർക്ക് ലഭ്യമാക്കണം, അടിസ്ഥാന കാർഷിക പ്രശ്നങ്ങൾ ഫലപ്രദമായി പരിഹരിക്കാനാവണം എങ്കിലേ കാർഷിക മേഖലക്ക് ഉണർവ്വുണ്ടാവൂ. കെ നാണുക്കുട്ടൻ എന്ന കൃഷി ഓഫീസർ കൃഷിയിടങ്ങളിലിറങ്ങി കർഷകർക്കൊപ്പമാണ് സഞ്ചരിക്കുന്നത് എന്നുള്ളതും ഇദ്ദേഹത്തെ വ്യത്യസ്ഥനാക്കുന്നു. കുമ്പളയിൽ ഏകദേശം 150 ഓളം ഏക്കർ കൃഷിഭൂമിയുണ്ടെന്ന് പറയപ്പെടുന്നു.

ലക്ഷ്യബോധമില്ലാത്ത പദ്ധതികളിലൂടെ കോടിക്കണക്കിനു രൂപ കാർഷിക മേഖലയിൽ സർക്കാർ ചിലവഴിക്കുമ്പോഴും അത് കാർഷിക മേഖലയെ സജീവമാക്കി കാണുന്നില്ല എന്നതാണ് വാസ്തവം. മണ്ണിന്റെ മരണമാണ് ഇന്ന് കൃഷിയിടങ്ങളിലെ മുഖ്യ പ്രശ്നമെന്ന് നാണുക്കുട്ടൻ പറയുന്നു.

സ്വന്തമായി കൃഷിയിടങ്ങൾ സൃഷ്‌ടിച്ച ഒരുപാട് യുവകർഷകർ ഇന്ന് കുമ്പള കൃഷി ഭവന് കീഴിലുണ്ട്. ഈ മാതൃക മുഴുവൻ കൃഷിയിടങ്ങളിലും സാധ്യമാക്കാൻ ഇച്ഛാശക്തിയോടെ യഥാർത്ഥ ഇടപെടലാണ് കൃഷി ഭവനിലൂടെ കൃഷി ഓഫീസർ ചെയ്തു കൊണ്ടിരിക്കുന്നത്. വിത്തുമുതൽ വിപണി വരെയും, കൃഷിയിട പരിപാലനത്തിനും കർഷകന്റെ ആവശ്യങ്ങൾക്കൊപ്പം നിൽക്കാൻ ഈ ഉദ്യോഗസ്ഥൻ കാണിക്കുന്ന താല്പര്യം എടുത്തു പറയേണ്ടത് തന്നെയാണ്.

കോവിഡിന്റെ പശ്ചാത്തലത്തിൽ കേരള കാർഷിക മേഖലയിൽ സമഗ്രമായ മാറ്റം ഉണ്ടാക്കുന്നതിന്നും, കൃഷിയിലും, പച്ചക്കറിയിലും സ്വയം പര്യാപ്തത നേടുന്നതിന്ന് വേണ്ടിയും 'സുഭിക്ഷ കേരളം' എന്ന പദ്ധതി ഗവണ്മെന്റ് ആവിഷ്കരിച്ചിട്ടുണ്ട്. തരിശ് ഭൂമി കൃഷിക്ക് യോഗ്യമാക്കുക, ഒപ്പം വിദേശത്ത് നിന്ന് തൊഴിൽ നഷ്ടപ്പെട്ടു വരുന്നവർ, കാർഷിക മേഖലയിൽ നിന്ന് അകന്ന് നിൽക്കുന്നവർ ഇവരെയൊക്കെ കൃഷിയിലേക്ക് അടുപ്പിക്കുക തുടങ്ങിയവയാണ് പദ്ധതിയുടെ ലക്ഷ്യം. ഇതിന്റെ ഭാഗമായി കുമ്പള പഞ്ചായത്തിൽ വാർഡ് മെമ്പർമാരുടെയും, ജില്ലാ കളക്ടറുടെ 'ആപ്പ് ' ന്റെ സഹായത്തോടെയും തരിശു ഭൂമി സർവ്വേ നടത്തി സ്ഥലം കണ്ടെത്തുകയും ചെയ്തിരുന്നു.

കൃഷിയോട് വിമുഖത കാണിക്കുന്ന ചെറുപ്പക്കാരിൽ നിന്ന് താല്പര്യത്തോടെ മുമ്പോട്ട് വരുന്നവരെ കാണുമ്പോൾ സന്തോഷം തോന്നുന്നുവെന്ന് നാണുക്കുട്ടൻ പറയുന്നു. ഇവർക്ക് സുഭിക്ഷ കേരളം പദ്ധതിയിൽപ്പെടുത്തി പരമാവധി സഹായം ചെയ്തു കൊടുക്കുകയും ചെയ്യുന്നു.