National Highway | കാസർകോടിന് തിരിച്ചടി; ദേശീയ പാത സബ് ഡിവിഷനിലെ അസിസ്റ്റന്റ് എക്സിക്യൂടീവ് എൻജിനീയറുടെ തസ്തിക കോഴിക്കോട്ടേക്ക് മാറ്റി; പുന:സ്ഥാപിക്കണമെന്ന് എൻ എ നെല്ലിക്കുന്ന് എംഎൽഎ

കാസർകോട്: (KasargodVartha) പൊതുമരാമത്ത് വകുപ്പിന്റെ കീഴിലുള്ള ദേശീയ പാത സബ് ഡിവിഷൻ ഓഫീസിലെ അസിസ്റ്റന്റ് എക്സിക്യൂടീവ് എൻജിനീയറുടെ തസ്തിക കോഴിക്കോട് കെട്ടിട വിഭാഗം ഉത്തരമേഖല ഓഫീസിലേക്ക് മാറ്റി ഉത്തരവായി. കേന്ദ്ര തുക ഉപയോഗിച്ച് ജില്ലയിൽ ചെയ്തുവരുന്ന മുഴുവൻ പ്രവൃത്തികളുടെയും നിർമാണവും പരിപാലനവും ഈ ഓഫീസിന്റെ പരിധിയിലാണ് വരുന്നത്.
  
അസിസ്റ്റന്റ് എക്സിക്യൂടീവ് എൻജിനീയറുടെ തസ്തിക ഇല്ലാതായതിലൂടെ ഓഫീസിന്റെ ദൈനംദിന പ്രവർത്തനം തടസപ്പെട്ടിരിക്കുകയാണെന്ന് എൻ എ നെല്ലിക്കുന്ന് എംഎൽഎ പറഞ്ഞു. കേന്ദ്ര തുക ഉപയോഗിച്ച് നിലവിൽ ചെയ്തുകൊണ്ടിരിക്കുന്നതും പുതുതായി കിട്ടാവുന്നതുമായ പ്രവൃത്തികളെയും ഇത് സാരമായി ബാധിക്കുമെന്ന് അദ്ദേഹം ചൂണ്ടിക്കാട്ടി.