Bumper Winner | നേരം ഇരുട്ടി വെളുക്കുമ്പോഴേക്കും കോടിശ്വരന്‍; സമ്മര്‍ ബംപര്‍ ആലക്കോട്ടെ ഓടോ റിക്ഷ തൊഴിലാളിക്ക്

 

'ആറ് മണിക്കാണ് ടികറ്റ് വില്‍ക്കുന്ന ഇടത്ത് വന്നത്. ആ സമയത്ത് SC 308797 എന്ന നമ്പര്‍ അവിടെ ഉണ്ടായിരുന്നു. തിരിച്ച് പോയി ഏഴര ആയപ്പോള്‍ വീണ്ടും വന്നു. അപ്പോഴും ടികറ്റ് ഇവിടെ ഉണ്ട്. ഇതാരും കൊണ്ടുപോയില്ലേ എന്ന് ചോദിച്ചതിനു ശേഷമാണ് ടികറ്റ് എടുത്തത്. കറക്ട് വീഴുകയും ചെയ്തു. ദൈവത്തിന്റെ കളിയാണിത്', എന്നാണ് അപ്രതീക്ഷിത ഭാഗ്യം തേടിയെത്തിയതിനെ കുറിച്ച് നാസര്‍ മാധ്യമങ്ങളോട് പ്രതികരിച്ചത്.

ബമ്പര്‍ അടിക്കുമെന്ന പ്രതീക്ഷയില്‍ തന്നെയാണ് നാസര്‍ ടികറ്റ് എടുത്തത് എന്നാണ് ഏജന്റ് രാജുവും പറയുന്നത്.

'ഒരു ടികറ്റേ ബാക്കി ഉണ്ടായിരുന്നുള്ളൂ. ഈ ടികറ്റിന് അടിക്കാന്‍ സാധ്യതയുണ്ടെന്ന് നാസര്‍ പറഞ്ഞിട്ട് പോയി. പത്ത് മിനുറ്റ് കഴിഞ്ഞ് വീണ്ടും വന്നപ്പോള്‍ ടികറ്റ് ഇവിടെ തന്നെ ഉണ്ട്. ഇതടിക്കും എന്ന് പറഞ്ഞ് ടികറ്റ് എടുക്കുകയും ചെയ്തു. അതിന് സമ്മാനം കിട്ടുകയും ചെയ്തു. സമ്മാനം അടിച്ച വിവരം പുള്ളി തന്നെയാണ് വന്ന് പറഞ്ഞത്. അടിക്കുമെന്ന് പറഞ്ഞതും അടിച്ചെന്ന് പറഞ്ഞതും പുള്ളി തന്നെയാണ്'- എന്നായിരുന്നു രാജുവിന്റെ കമന്റ്.

ബുധനഴ്ച ഉച്ച കഴിഞ്ഞ് രണ്ട് മണിയോടെയാണ് സമ്മര്‍ ബമ്പര്‍ ഭാഗ്യക്കുറി നറുക്കെടുപ്പ് നടന്നത്. SC 308797 എന്ന നമ്പറിനാണ് ഒന്നാം സമ്മാനം എന്നും കണ്ണൂരാണ് ടികറ്റ് വിറ്റതെന്നും പിന്നാലെ അറിയാന്‍ സാധിച്ചിരുന്നു. എന്നാല്‍ ആരാകും ആ ഭാഗ്യവാന്‍ എന്ന കാത്തിരിപ്പില്‍ ആയിരുന്നു കേരളം മുഴുവന്‍. ഒടുവില്‍ നാസര്‍ പരസ്യമായി രംഗത്തെത്തുകയും ചെയ്തു. ഏറെ കാലത്തിനു ശേഷമാണ് ഒരു ബംപര്‍ സമ്മാനം കണ്ണൂരില്‍ അടിക്കുന്നതെന്ന പ്രത്യേകതയുമുണ്ട്.