Moral Policing | 'മംഗ്ളൂറിൽ മലയാളി യുവാവിനും, യുവതിക്കും നേരെ സദാചാര പൊലീസ് ചമഞ്ഞ് അക്രമം, വീഡിയോ പകർത്തുകയും ചെയ്തു'; നാല് പേർ അറസ്റ്റിൽ; 'പിടിയിലായത് ഹിന്ദുത്വ സംഘടനാ പ്രവർത്തകർ'

മംഗ്‌ളുറു: (KasaragodVartha) മലയാളി യുവാവിനും ബെംഗ്ളുറു സ്വദേശിനിയായ യുവതിക്കും നേരെ സദാചാര പൊലീസ് ചമഞ്ഞ് അക്രമം നടത്തിയെന്ന കേസിൽ നാല് യുവാക്കൾ അറസ്റ്റിൽ. ദക്ഷിണ കന്നഡ ജില്ലയിലെ പ്രശാന്ത ഭണ്ഡാരി (38), ഉമേഷ് (23), സുധീർ (26), കീർത്തൻ പൂജാരി (20) എന്നിവരാണ് അറസ്റ്റിലായത്. ഇവർ ഹിന്ദുത്വ അനുകൂല സംഘടനാ പ്രവർത്തകരാണെന്ന് പൊലീസ് വൃത്തങ്ങൾ പറഞ്ഞു.
   യുവതിയും യുവാവും പനമ്പൂർ ബീചിൽ ഒരുമിച്ചിരിക്കെ പ്രതികൾ അക്രമിക്കാൻ ശ്രമിച്ചുവെന്നാണ് പരാതി. യുവാക്കൾ ഇവരെ ചോദ്യം ചെയ്യുകയും കയ്യേറ്റം ചെയ്യാൻ ശ്രമിക്കുകയും വീഡിയോ പകർത്തുകയും ചെയ്തതായും പരാതിയിൽ പറയുന്നു. യുവതി പനമ്പൂർ പൊലീസിനെ വിവരം അറിയിച്ചതിനെ തുടർന്ന് പൊലീസ് സംഘമെത്തിയാണ് അക്രമികളെ പിടികൂടിയത്.