Victim | 'സാമൂഹ്യ മാധ്യമത്തിലൂടെയുള്ള പരിചയം അടുപ്പമായി; വീട്ടുകാരുടെ ഇടപെടലിൽ അകന്നു; പിന്നാലെ ബന്ധത്തിൽ നിന്ന് പിന്മാറിയാൽ പിതാവിനെ കൊല്ലുമെന്നതടക്കം യുവാവിന്റെ ഭീഷണി; ബന്ധുവിന്റെ കല്യാണം മുടക്കുമെന്ന് പറഞ്ഞതും ആശങ്കയായി'; കണ്ണീരായി പത്താം ക്ലാസ് വിദ്യാർഥിനിയുടെ മരണം, പ്രണയപ്പകയിൽ പൊലിഞ്ഞത് ഒരുപെൺകുട്ടിയുടെ ജീവിതം

  
ഇക്കഴിഞ്ഞ ജനുവരി 23ന് വൈ​കീ​ട്ടാ​ണ് പെണ്‍കു​ട്ടി​യെ വീ​ട്ടി​ന​ക​ത്ത് വി​ഷം അകത്തുചെന്ന നി​ല​യി​ല്‍ കണ്ടെത്തിയത്. തുടർന്ന് ദിവസങ്ങളോളം മംഗ്ളൂറിലെ ആശുപത്രിയിൽ അത്യാസന്ന നിലയിൽ ചികിത്സയിലായിരുന്നു. കഴിഞ്ഞ ദിവസം വിദഗ്ധ ചികിത്സയ്ക്കായി ബെംഗ്ളൂറിലെ അപോളോ ആശുപത്രിയിലേക്ക് മാറ്റിയെങ്കിലും ആരോഗ്യനിലയിൽ പുരോഗതിയുണ്ടാകാത്തതിനെ തുടർന്ന് തിരികെ കൊണ്ടുവരുന്നതിനിടെ തിങ്കളാഴ്ച പുലർച്ചെ രണ്ട് മണിയോടെയാണ് മരണം സംഭവിച്ചത്.

സംഭവത്തിൽ പെൺകുട്ടിയുടെ സുഹൃത്ത് കാസർകോട് പൊലീസ് സ്റ്റേഷൻ പരിധിയിലെ അ​ന്‍വ​ർ (24), ഇയാൾക്ക് ഒത്താശ ചെയ്തുവെന്ന് ആരോപണമുള്ള സാഹിൽ എന്നിവരെ പൊലീസ് അറസ്റ്റ് ചെയ്തിട്ടുണ്ട്. ഇരുവർക്കുമെതിരെ പോക്സോ നിയമത്തിലെ വിവിധ വകുപ്പുകൾ, ആത്മഹത്യാ പ്രേരണം എന്നീ കുറ്റങ്ങളാണ് ചുമത്തിയിരിക്കുന്നത്. കേസെടുത്തതിന് പിന്നാലെ ഒളിവിൽ പോയ അൻവറിനെ ബെംഗ്ളൂറിൽ നിന്നാണ് പിടികൂടിയത്. യുവാവ് ഇപ്പോൾ റിമാൻഡിൽ കഴിയുകയാണ്.
  

ആറുമാസം മുമ്പാണ് പെൺകുട്ടി ഇൻസ്റ്റഗ്രാമിലൂടെ അൻവറിനെ പരിചയപ്പെടുന്നത്. അൻവറുമായുള്ള അടുപ്പം അറിഞ്ഞ ബന്ധുക്കൾ പെണ്‍കുട്ടിയെ പി​ന്തി​രി​പ്പി​ക്കാ​ന്‍ ശ്ര​മം നടത്തിയിരുന്നു. ഇതോ​ടെ ത​ന്നെ ഇ​നി വി​ളി​ക്ക​രു​തെ​ന്ന് പ​റ​ഞ്ഞ് പെൺകുട്ടി ഫോ​ണ്‍ നമ്പര്‍ ബ്ലോ​ക് ചെയ്തതായി ബന്ധുക്കൾ വ്യക്തമാക്കുന്നു. ഇതിന് പിന്നാലെ സ്കൂളിൽ പോകുന്ന സമയത്ത് വഴി തടഞ്ഞ് അൻവർ ഭീഷണിപ്പെടുത്തുകയുമായിരുന്നുവെന്നാണ് പരാതി. പിതാവായ തന്നെ കൊല്ലുമെന്നും കുടുംബത്തിലെ ഒരു പെൺകുട്ടിയുടെ വിവാഹം മുടക്കുമെന്നുമൊക്കെ അൻവർ ഭീഷണിപ്പെടുത്തിയതായും പെൺകുട്ടിയുടെ പിതാവ് കാസർകോട് വാർത്തയോട് വെളിപ്പെടുത്തിയിട്ടുണ്ട്.