Covid | പെട്ടന്നൊരു ദിവസം ശബ്ദം നിലച്ചു പോവാം! കോവിഡിന് രുചിയും മണവും മാത്രമല്ല ഇതും ഇല്ലാതാക്കാൻ കഴിയും; പുതിയ പഠനം പുറത്ത്

അതേസമയം, പുതിയ ഒരു പഠനത്തിൽ, രുചിക്കും മണത്തിനും പുറമെ കൊറോണ അണുബാധ ഇപ്പോൾ തൊണ്ടയിലെ ശബ്ദം ഇല്ലാതാക്കുന്നുവെന്ന് ശാസ്ത്രജ്ഞർ കണ്ടെത്തി. ഇത്തരത്തിലുള്ള ആദ്യ സംഭവത്തിൽ, കോവിഡ് -19 കാരണം സ്വരനാളപാളിയിലെ പക്ഷാഘാതം (Vocal cord paralysis) എന്ന അവസ്ഥ റിപ്പോർട്ട് ചെയ്തു.

കൊറോണ അണുബാധ നാഡീവ്യവസ്ഥയെ ബാധിക്കുകയും വോക്കൽ കോഡുകളുടെ പക്ഷാഘാതത്തിന് കാരണമാവുകയും ചെയ്യുമെന്ന് അമേരിക്കയിലെ മസാച്യുസെറ്റ്‌സ് ഐ ആൻഡ് ഇയർ ഹോസ്പിറ്റലിലെ ഗവേഷകർ നിഗമനം ചെയ്തു. ശ്വാസകോശത്തില്‍ നിന്ന് ശ്വാസനാളിയിലൂടെ കടന്നുവരുന്ന വായു കാരണമുണ്ടാകുന്ന വോക്കല്‍ കോര്‍ഡിന്റെ (Vocal cord) കമ്പനമാണ് ശബ്ദം.

പീഡിയാട്രിക്സ് ജേണലിൽ പ്രസിദ്ധീകരിച്ച പഠന റിപ്പോർട്ടിൽ, കൊറോണ മൂലമുണ്ടാകുന്ന ഗുരുതരമായ ഈ പ്രശ്നത്തെക്കുറിച്ച് ശാസ്ത്രജ്ഞർ മുന്നറിയിപ്പ് നൽകിയിട്ടുണ്ട്. റിപ്പോർട്ടുകൾ പ്രകാരം, കൊറോണ വൈറസ് ബാധിച്ചതായി സ്ഥിരീകരിച്ച് കുറച്ച് ദിവസങ്ങൾക്ക് ശേഷം, 15 വയസുള്ള ഒരു പെൺകുട്ടിക്ക് പെട്ടെന്ന് ശ്വസിക്കാൻ ബുദ്ധിമുട്ട് അനുഭവപ്പെട്ടു. ആശുപത്രിയിൽ നടത്തിയ പരിശോധനയിൽ നാഡീവ്യവസ്ഥയിൽ കോവിഡിന്റെ പാർശ്വഫലങ്ങളാൽ വോക്കൽ കോഡ് പക്ഷാഘാതം സംഭവിച്ചതായി കണ്ടെത്തി. പെൺകുട്ടിക്ക് നേരത്തെ തന്നെ ആസ്ത്മ, ഉത്കണ്ഠ തുടങ്ങിയ പ്രശ്നങ്ങൾ ഉണ്ടായിരുന്നു.

എൻഡോസ്‌കോപ്പിക് പരിശോധനയിൽ കൗമാരക്കാരിയുടെ രണ്ട് വോക്കൽ കോഡുകളിലും പ്രശ്‌നമുണ്ടെന്ന് കണ്ടെത്തിയതായി ഗവേഷകർ പറഞ്ഞു. കോവിഡ് ആരംഭിച്ചതിന് ശേഷം കൗമാരക്കാരിൽ ഇത് ആദ്യമായാണ് വോക്കൽ കോർഡ് പക്ഷാഘാതം സംഭവിക്കുന്നതെന്ന് പഠന രചയിതാക്കൾ പറയുന്നു, എന്നിരുന്നാലും ഈ അവസ്ഥ മുതിർന്നവരിൽ മുമ്പ് റിപ്പോർട്ട് ചെയ്യപ്പെട്ടിട്ടുണ്ട്. മുമ്പും കൊറോണ കാരണം പല തരത്തിലുള്ള സങ്കീർണതകൾ റിപ്പോർട്ട് ചെയ്യപ്പെട്ടിട്ടുണ്ട്, അതിനാൽ ഇത് ശ്വാസകോശ സംബന്ധമായ അണുബാധകളിൽ മാത്രം ഒതുങ്ങുന്ന രോഗമല്ലെന്ന് പറയാം.