കനത്തമഴയില്‍ സംരക്ഷണമതില്‍ തകര്‍ന്നു; കോളനി നിവാസികള്‍ ഭീതിയില്‍

മുളിയാര്‍: (www.kasargodvartha.com 21.07.2019) മുതലപ്പാറ ജവരിക്കുളത്ത് വെള്ളമൊഴുക്ക് തടയാന്‍ ഗ്രാമ പഞ്ചായത്ത് നിര്‍മ്മിച്ച സംരക്ഷണ മതില്‍ തകര്‍ന്നതോടെ 22 ഓളം കുടുംബങ്ങള്‍ ദുരിതത്തിലായി. മതില്‍ തകര്‍ന്നതോടെ വെള്ളമൊഴുക്കിന്റെ ഗതി മാറി പല വീടുകളും, സ്ഥലവും തകര്‍ച്ചയുടെ വക്കിലാണ്. പ്ലാന്റേഷന്‍ കോര്‍പറേഷന്റെ ഏക്കര്‍ കണക്കിന് പാറസ്ഥലത്ത് നിന്ന് ഒഴുകിയെത്തുന്ന ജലം വന്‍ ശക്തിയിലൂടെയാണ് ഒഴുകുന്നത്.

പ്രദേശത്തെ പള്ളിക്ക് സമീപവും വെള്ളം കെട്ടി നിന്ന് ജനങ്ങളും, മദ്രസാ വിദ്യാര്‍ത്ഥികളും ദുരിതത്തിലാണ്. ജവരിക്കുളം കോളനിയില്‍ സംരക്ഷണമതില്‍ പുനര്‍ നിര്‍മ്മിക്കണമെന്ന് നാട്ടുകാര്‍ ആവശ്യപ്പെട്ടു. മുസ്ലിം ലീഗ് നേതാക്കളായ കെ ബി മുഹമ്മദ് കുഞ്ഞി, ബി എം അബൂബക്കര്‍, ഷരീഫ് കൊടവഞ്ചി, മന്‍സൂര്‍ മല്ലത്ത്, ഷരീഫ് മല്ലത്ത് തുടങ്ങിയവര്‍ സ്ഥലം സന്ദര്‍ശിച്ചു.