ഡി വൈ എഫ് ഐ നേതാക്കള്‍ തമ്മിലുള്ള തര്‍ക്കത്തില്‍ പോലീസിന്റെ സാന്നിധ്യത്തില്‍ നടന്ന ചര്‍ച്ചകഴിഞ്ഞ് മടങ്ങുകയായിരുന്ന നാഷണല്‍ യൂത്ത് ലീഗ് നേതാവിന്റെ കാര്‍ തകര്‍ത്തു

ബേകല്‍: (www.kasargodvartha.com 21.09.2018) ഡി വൈ എഫ് ഐ നേതാക്കള്‍ തമ്മിലുള്ള തര്‍ക്കത്തില്‍ പോലീസിന്റെ സാന്നിധ്യത്തില്‍ നടന്ന ചര്‍ച്ചകഴിഞ്ഞ് മടങ്ങുകയായിരുന്ന നാഷണല്‍ യൂത്ത് ലീഗ് നേതാവിന്റെ കാര്‍ തകര്‍ത്തു. ഐ എന്‍ എല്‍ ജില്ലാ നേതാവും നാഷണല്‍ യൂത്ത് ലീഗ് ജില്ല ട്രഷററുമായ ഹനീഫ് പി എച്ചിന്റെ കാറാണ് തകര്‍ക്കപ്പെട്ടത്.

കോട്ടിക്കുളത്ത് വെച്ചാണ് സംഭവം. പാലക്കുന്നിലെയും കളനാട്ടെയും രണ്ട് ഡി വൈ എഫ് ഐ നേതാക്കള്‍ തമ്മിലുള്ള വ്യക്തിവിരോധമാണ് കാര്‍ ആക്രമിക്കലില്‍ കലാശിച്ചതെന്നാണ് വിവരം. മാങ്ങാട് നടന്ന രക്തസാക്ഷി അനുസ്മരണ പരിപാടിക്കിടയിലാണ് രണ്ട് നേതാക്കള്‍ തമ്മില്‍ കൊമ്പ് കോര്‍ത്തത്. ഇത് സംബന്ധിച്ച് പോലീസില്‍ പരാതിയൊന്നും എത്തിയിരുന്നില്ല. ഇതിന്റെ തുടര്‍ച്ചയായി കളനാട്ടെ ഡി വൈ എഫ് ഐ നേതാവിനെ അനുകൂലിക്കുന്ന ശരത് എന്ന പ്രവര്‍ത്തകനെ ചിലര്‍ പെരിയട്ടടുക്കത്ത് വെച്ച് ആക്രമിച്ചിരുന്നു.

ഈ സംഭവത്തില്‍ ശരത് ബേക്കല്‍ പോലീസില്‍ പരാതി നല്‍കിയിരുന്നു. ഈ പരാതിയെ കുറിച്ച് ചര്‍ച്ച ചെയ്യുന്നതിനായി വെളളിയാഴ്ച ബേക്കല്‍ സി ഐ വി കെ വിശ്വംഭരന്‍ ഇരു വിഭാഗത്തെയും ചര്‍ച്ചയ്ക്ക് വിളിച്ചിരുന്നു. പാലക്കുന്നിലെ ഡി വൈ എഫ് ഐ പ്രവര്‍ത്തകന്‍ നാഷണല്‍ യൂത്ത് ലീഗ് നേതാവിന്റെ കാറിലാണ് ബേക്കല്‍ സ്‌റ്റേഷനിലെത്തിയത്.

പാലക്കുന്നിലെ ഡി വൈ എഫ് ഐ നേതാവിനെ സഹായിച്ചതിന്റെ പേരിലാണ് ഐ എന്‍ എല്‍ നേതാവിന്റെ കാര്‍ കളനാട് സ്വദേശിയായ ഡി വൈ എഫ് ഐ നേതാവിന്റെ ആളുകള്‍ തകര്‍ത്തതെന്നാണ് സൂചനകള്‍ പുറത്ത് വന്നിരിക്കുന്നത്. കാര്‍ അക്രമിച്ചത് ആര്‍ എസ് എസുകാരുടെ സഹായത്തോടെയാണെന്നാണ് ഐ എന്‍ എല്‍ ആരോപിക്കുന്നത്. എന്നാല്‍ ഡി വൈ എഫ് ഐയിലെ മറുചേരിയാണ് കാര്‍ തകര്‍ത്തതെന്നാണ് പോലീസ് നല്‍കുന്ന സൂചന.