Upgrade | കേരളത്തിന് ഇരട്ടി മധുരം: തിരുവനന്തപുരം-കാസർകോട് പാതയിൽ പുതിയ 20 കോച്ച് വന്ദേ ഭാരത് എക്സ്പ്രസ് എത്തുന്നു; നിലവിലെ ട്രെയിൻ മറ്റൊരു റൂട്ടിലേക്ക് മാറ്റാൻ സാധ്യത

കാസർകോട്: (KasargodVartha) കേരളത്തിലെ ജനപ്രിയ ട്രെയിനുകളിലൊന്നായ തിരുവനന്തപുരം-കാസർകോട് വന്ദേ ഭാരത് എക്സ്പ്രസ് കൂടുതൽ സൗകര്യങ്ങളോടെ പുതിയ രൂപത്തിൽ എത്താനൊരുങ്ങുന്നു. 2025-ൽ നിലവിലെ 16 കോച്ച് ട്രെയിനിനു പകരം 20 കോച്ചുകളുള്ള പുതിയ വന്ദേ ഭാരത് എക്സ്പ്രസ് സർവീസ് ആരംഭിക്കുമെന്ന് ഓൺ മനോരമ റിപ്പോർട്ട് ചെയ്‌തു.

യാത്രക്കാരുടെ എണ്ണത്തിലുള്ള വർധനവും ആവശ്യമായ കൂടുതൽ സൗകര്യങ്ങളും കണക്കിലെടുത്താണ് റെയിൽവേയുടെ ഈ സുപ്രധാന തീരുമാനം. നിലവിലുള്ള 16 കോച്ച് ട്രെയിൻ മറ്റൊരു റൂട്ടിലേക്ക് മാറ്റുമെന്നാണ് സൂചന. ആലപ്പുഴ വഴിയുള്ള എട്ട് കോച്ച് വന്ദേ ഭാരത് എക്സ്പ്രസിനു പകരം ഈ ട്രെയിൻ ഉപയോഗിക്കണമെന്ന യാത്രക്കാരുടെ ആവശ്യം ശക്തമാണ്. ഇത് പരിഗണനയിലാണെന്നും റെയിൽവേ അധികൃതർ സൂചന നൽകി.

ഏതാനും ആഴ്ചകൾക്കു മുൻപാണ് കേരളത്തിന് 10 പുതിയ വന്ദേ ഭാരത് (നമോ ഭാരത്) ട്രെയിനുകൾ അനുവദിക്കുമെന്ന് റെയിൽവേ പ്രഖ്യാപിച്ചത്. ഇതിനു പിന്നാലെയാണ് നിലവിലെ വന്ദേ ഭാരത് എക്സ്പ്രസിന്റെ കോച്ചുകൾ വർദ്ധിപ്പിക്കാനുള്ള തീരുമാനം വരുന്നത്. പുതിയ 20 കോച്ച് ട്രെയിൻ ചാര, കറുപ്പ്, ഓറഞ്ച് നിറങ്ങളിലായിരിക്കും എത്തുക. 

നിലവിൽ വ്യാഴാഴ്ച ഒഴികെ എല്ലാ ദിവസവും സർവീസ് നടത്തുന്ന 20634 തിരുവനന്തപുരം-കാസർകോട് വന്ദേ ഭാരത് എക്സ്പ്രസ് രാവിലെ 5.15ന് തിരുവനന്തപുരത്തു നിന്ന് പുറപ്പെട്ട് ഉച്ചയ്ക്ക് 1.20ന് കാസർകോട്ടെത്തും. 586 കിലോമീറ്റർ ദൂരം എട്ട് മണിക്കൂർ കൊണ്ട് പിന്നിടുന്ന ഈ എക്സ്പ്രസിന് കൊല്ലം ജംഗ്ഷൻ, ചെങ്ങന്നൂർ, കോട്ടയം, എറണാകുളം, തൃശൂർ, ഷൊർണൂർ, കോഴിക്കോട്, കണ്ണൂർ, കാസർകോട് എന്നിങ്ങനെ എട്ട് സ്റ്റോപ്പുകളുണ്ട്. മടക്കയാത്രയിൽ (20633) കാസർകോട് നിന്ന് ഉച്ചയ്ക്ക് 2.30ന് പുറപ്പെട്ട് രാത്രി 10.40ന് തിരുവനന്തപുരത്ത് തിരിച്ചെത്തും.

പുതിയ 20 കോച്ച് ട്രെയിൻ വരുന്നതോടെ കൂടുതൽ യാത്രക്കാർക്ക് പ്രയോജനം ലഭിക്കുമെന്നും യാത്രാസൗകര്യങ്ങൾ മെച്ചപ്പെടുത്തുമെന്നും റെയിൽവേ പ്രതീക്ഷിക്കുന്നു. നിലവിലെ ട്രെയിൻ ആലപ്പുഴ റൂട്ടിലേക്ക് മാറ്റുന്നതിലൂടെ ആ റൂട്ടിലെ യാത്രാക്ലേശത്തിന് ഒരു പരിധി വരെ പരിഹാരമുണ്ടാകുമെന്നും കരുതുന്നു.

#VandeBharatExpress #Kerala #IndianRailways #Travel #NewTrain #KeralaTourism