New Logo | കാസർകോടിന്റെ ടൂറിസം മുഖം മിനുക്കുന്നു; ആകർഷകമായ ലോഗോ പുറത്തിറക്കി; ശക്തമായ ബ്രാൻഡ് ആയി മാറുക ലക്ഷ്യം

കാസർകോട്: (KasargodVartha) ജില്ലയുടെ ടൂറിസം മേഖലയ്ക്ക് പുതിയ ഉണർവ് നൽകി കൊണ്ട് ആകർഷകമായ ലോഗോ പ്രകാശനം ചെയ്തു. ജില്ലയുടെ പ്രകൃതി സൗന്ദര്യവും സാംസ്കാരിക പൈതൃകവും ലോകത്തിനു മുന്നിൽ എത്തിക്കുക എന്ന ലക്ഷ്യത്തോടെ കാസർകോട് ജില്ലാ ടൂറിസം പ്രൊമോഷൻ കൗൺസിൽ (ഡി.ടി.പി.സി.) ആണ് പുതിയ ലോഗോ രൂപകൽപ്പന ചെയ്ത് പ്രകാശനം ചെയ്തത്. കാസർകോടിന്റെ സാംസ്കാരിക തനിമയും പ്രകൃതിയുടെ മനോഹാരിതയും ടൂറിസം സാധ്യതകളും ലോഗോയിൽ പ്രതിഫലിക്കുന്നു.

കാസർകോടിന്റെ തനതായ പ്രത്യേകതകളെ പ്രതിനിധീകരിക്കുന്ന ലോഗോ, പ്രദേശത്തെ പ്രശസ്തമായ സ്മാരകങ്ങൾ, പരമ്പരാഗത കലാരൂപങ്ങൾ, മനോഹരമായ പ്രകൃതിദൃശ്യങ്ങൾ എന്നിവയിൽ നിന്ന് പ്രചോദനം ഉൾക്കൊണ്ടാണ് രൂപകൽപ്പന ചെയ്തിരിക്കുന്നത്. ലോഗോയുടെ പ്രകാശനത്തിലൂടെ കാസർകോടിന്റെ ടൂറിസം പ്രവർത്തനങ്ങൾക്ക് ദേശീയ തലത്തിലും അന്തർദേശീയ തലത്തിലും ശക്തമായ ഒരു ബ്രാൻഡ് ഐഡന്റിറ്റി സൃഷ്ടിക്കാൻ സാധിക്കുമെന്നാണ് പ്രതീക്ഷ.

സ്വദേശികളും വിദേശികളുമായ ടൂറിസ്റ്റുകൾക്ക് ജില്ലയുടെ ടൂറിസം സാധ്യതകൾ തുറന്നുകാട്ടുന്ന രീതിയിൽ സ്വകാര്യ ടൂറിസം സംരംഭകരുടെ സഹകരണത്തോടെ മാർക്കറ്റിംഗ് പ്രവർത്തനങ്ങൾ ഏകോപിപ്പിച്ച് നടപ്പിലാക്കുകയാണ് ഡി.ടി.പി.സിയുടെ പ്രധാന ലക്ഷ്യം. പുതിയ ലോഗോയുടെ പ്രകാശനത്തോടെ കാസർകോടിന്റെ ടൂറിസം മേഖല കൂടുതൽ വികസനം പ്രാപിക്കുമെന്നും കൂടുതൽ സഞ്ചാരികളെ ആകർഷിക്കുമെന്നും പ്രതീക്ഷിക്കുന്നു.

രജിസ്ട്രേഷൻ, മ്യൂസിയം, പുരാവസ്തു മന്ത്രി കടന്നപ്പള്ളി രാമചന്ദ്രൻ ലോഗോ പ്രകാശനം നിർവഹിച്ചു. ഡി.ടി.പി.സി എക്സിക്യൂട്ടീവ് കമ്മിറ്റി അംഗം സി. എച്ച്. കുഞ്ഞമ്പു എം.എൽ.എ അധ്യക്ഷത വഹിച്ചു. ഇ. ചന്ദ്രശേഖരൻ എം.എൽ.എ, എൻ. എ. നെല്ലിക്കുന്ന് എം.എൽ.എ, ജില്ലാ പഞ്ചായത്ത് പ്രസിഡന്റ് ഷാനവാസ് പാദൂർ, സബ് കളക്ടർ പ്രതീക് ജയീൻ തുടങ്ങിയവർ പങ്കെടുത്തു. 

ടൂറിസം വകുപ്പ് ഡെപ്യൂട്ടി ഡയറക്ടർ ജി ശ്രീകുമാർ, ബി.ആർ.ഡി.സി. മാനേജിംഗ് ഡയറക്ടർ ഷിജിൻ പി., കാസർകോട് ജില്ലാ ഹൗസ്‌ബോട്ട് ഓണേഴ്സ് അസോസിയേഷൻ സെക്രട്ടറി വിനോദ് അച്ചാന്തുരുത്തി, നീലേശ്വരം ബേക്കൽ ടൂറിസം ഓർഗനൈസേഷൻ ജനറൽ സെക്രട്ടറി ബിജു രാഘവൻ തുടങ്ങിയവരും ചടങ്ങിൽ സംബന്ധിച്ചു. ജില്ലാ കലക്ടർ കെ ഇമ്പശേഖർ സ്വാഗതവും ഡി.ടി.പി.സി. സെക്രട്ടറി ജിജേഷ് കുമാർ നന്ദിയും രേഖപ്പെടുത്തി.

 #KasaragodTourism, #TourismLogo, #KeralaTourism, #TourismPromotion, #KasaragodCulture, #Branding